என்னை கவனிக்க ஒரு உயிர் இப்போது இருக்கிறது!

-
என்னை கவனிக்க ஒரு உயிர் இப்போது இருக்கிறது!
Colors:

'காதலுக்கும், திருமணத்திற்கும் வயது கிடையாது' என,
கடந்த ஆண்டு டிச., 28ல் நிரூபித்த, கேரளாவின் திருச்சூர்
முதியோர் இல்லத்தில் வாழும் கொச்சினியன், 67 -
லட்சுமி, 66, தம்பதியில், லட்சுமி:

நான் தமிழ் பெண். எனக்கு, 16 வயது இருக்கும் போது,
48 வயதான கிருஷ்ணய்யருக்கு மணம் முடித்து வைத்தனர்;
எங்களுக்கு குழந்தை இல்லை. 22 ஆண்டுகளுக்கு முன்
கணவர் இறந்து விட்டார்; சொந்தம் என யாரும் இல்லை.

என் கணவரின் நண்பராக இருந்தவர் கொச்சினியன்.
கிருஷ்ணய்யர் இறக்கும் தருவாயில், கொச்சினியனிடம்,
'லட்சுமியை, பத்திரமாக பார்த்துக் கொள்' என்றார்.

அதன்படி கொச்சினியனும் அடிக்கடி வந்து என்னை
பார்த்து, நலம் விசாரித்து செல்வார். சொந்தம் என யாருமே
இல்லாத நிலையில், அவரின் அன்பு, எனக்கு ஆறுதலாக
இருக்கும்.

மூன்று மாதங்களுக்கு முன், குருவாயூர் கோவிலுக்கு செல்ல
போவதாக கூறி சென்றார். 'தனியாக போக வேண்டாம்...'
என்றேன். கேட்காமல் சென்று, அங்கு விழுந்து,
மருத்துவமனையில் அனுமதிக்கப்பட்டிருந்தார்.இரண்டு
மாதங்கள் சிகிச்சைக்குப் பின், வயநாட்டில் உள்ள, முதியோர்
இல்லத்தில் அவரை சேர்த்து உள்ளனர்.

அப்போது அங்கிருந்த அதிகாரிகள், 'உங்களின் உறவுக்காரர்
யாராவது இருக்கின்றனரா' என கேட்ட போது, என் பெயரை
சொல்லியுள்ளார். 'அவர் யார்' என, அவர்கள் கேட்டுள்ளனர்
, 'என் காதலி' என, கூறியுள்ளார்.

திருமணத்திற்கு பின், 'நமக்கு ஏதாவது ஒன்றென்றால்,
பார்த்துக் கொள்ள ஒரு உயிர் இருக்கிறது' என்ற நம்பிக்கை
பிறந்துள்ளது. இருவரும், ஒருவருக்கொருவர் அன்பும், ஆதரவுமாக,
மிச்சம் உள்ள காலத்தை, மகிழ்ச்சியாக கழிக்க உள்ளோம்.

எங்களது திருமணம், கனவைப் போல உள்ளது.
பக்கவாதத்தால் பாதிக்கப்பட்டுள்ள அவரின் சட்டை
பொத்தான்களை போட்டு விடுவது; நெற்றியில் சந்தனம்
வைத்து விடுவது; குடிக்க தண்ணீர் கொண்டு வந்து கொடுப்பது
என, மகிழ்ச்சியாக உள்ளேன்.

அவரும், எனக்காக தேநீர் வாங்கி வந்து தருகிறார்.
இருவரும் ஒன்றாக உணவருந்துவது என, மறுபிறவி போல
உணர்கிறோம். அவரை தினமும், முகச்சவரம் செய்ய சொல்கிறேன்.

அவருக்கு சில பற்கள் விழுந்து விட்டன; செயற்கை பற்கள்
பொருத்த வேண்டும். எங்களுக்கு மட்டுமல்ல. உலகத்திற்கே
புத்தம் புதிதான இப்படி ஒரு வாழ்வை நாங்கள் தொடர காரணமாக
இருந்தவர், முதியோர் இல்ல பொறுப்பாளர் ஜெயகுமார் தான்.

அவருக்கு, 46 வயதாகிறது; இன்னும் திருமணம் ஆகவில்லை.
அவருக்கு நல்ல மனைவி கிடைத்து, புது வாழ்க்கை அமைந்தால்
போதும்!

நன்றி-தினமலர்