பட்டமளிப்பு விழாவில் ரகளை; வெளியேறினார் மே.வங்க கவர்னர்

கோல்கட்டா :
மேற்கு வங்க அரசுக்கும், மாநில கவர்னருக்கும்
இடையேயான மோதல், மோசமான கட்டத்துக்கு
சென்றுள்ளது.

குறிப்பிட்ட சில மாணவர்கள் ரகளையில் ஈடுபட்டதால்,
கோல்கட்டா பல்கலை பட்டமளிப்பு விழாவில் இருந்து,
மாநில கவர்னர் ஜக்தீப் தன்கர் வெளியேறினார்.

புதிய விதிகள்

மேற்கு வங்க மாநில கவர்னராக நியமிக்கப்பட்டதில்
இருந்து, ஜகதீப் தங்கருக்கு எதிராக, அம்மாநில முதல்வர்
மம்தா பானர்ஜியும், அவருடைய அமைச்சர்களும்
தொடர்ந்து கருத்து தெரிவித்து வருகின்றனர்.

மாநிலத்தில் உள்ள பல்கலைகளின் வேந்தராகவும் கவர்னர்
உள்ளார். ஆனால், வேந்தருக்கான சில அதிகாரங்களை
கட்டுப்படுத்தும் வகையில், சட்டசபையில் புதிய விதிகளை,
மம்தா பானர்ஜி அரசு கொண்டு வந்தது.

அதன்படி, பல்கலை விவகாரங்களில் கவர்னர் நேரடியாக
தலையிட முடியாது.

மாநில உயர்கல்வி அமைச்சர் மூலமாகவே, உத்தரவுகளை
பிறப்பிக்க வேண்டும்.இந்த நிலையில், கோல்கட்டா
பல்கலையின் பட்டமளிப்பு விழா நேற்று நடைபெற்றது.

இதில், நோபல் பரிசு வென்ற, இந்தியாவை பூர்வீகமாக
கொண்ட, அபிஜித் பானர்ஜிக்கு, கவுரவ டாக்டர் பட்டம்
வழங்குவதாக இருந்தது. இந்த நிகழ்ச்சியில் பங்கேற்க,
வேந்தர் என்ற முறையில், கவர்னர் ஜக்தீப் தன்கர் வந்தார்.

கோஷம்

அவர் வரும்போதே, மாணவர்கள் சிலர் அவருக்கு எதிராக
கோஷமிட்டனர். திரும்பி போகும்படி கோஷமிட்டனர்.
மேலும், சி.ஏ.ஏ., குறித்து விமர்சித்து பேனர்களையும் கையில்
வைத்திருந்தனர். மேடைக்குச் சென்ற அவர், அதன் பின்
பகுதியில், அபிஜித் பானர்ஜியை சந்தித்து பேசினார்.

நிகழ்ச்சி துவங்குவதற்கு முன், மாணவர்கள் சிலர்,
மேடையில் ஏறி, கவர்னருக்கு எதிராக கோஷமிட்டனர்.
அதையடுத்து, அவர், விழா அரங்கிலிருந்து வெளியேறினார்.

வேந்தர் இல்லாமலேயே, பட்டமளிப்பு விழா நடைபெற்றது
.'கோல்கட்டா பல்கலையில் திட்டமிட்டு நடத்தப்பட்ட
நிகழ்வுகள், மிகச் சிறந்த கலாசாரம் உள்ள மேற்கு வங்க
மாநில மக்களுக்கு நீண்ட நாட்களுக்கு உறுத்தலாக இருக்கும்.

'கலாசாரம் மற்றும் சபை மாண்பை சமரசம் செய்தவர்கள்,
அவர்களுடைய குணங்களை இங்கு பிரதிபலித்துள்ளனர்'
என, சமூக வலை தளத்தில் வெளியிட்டுள்ள செய்தியில்,
கவர்னர் குறிப்பிட்டுள்ளார்.

தினமலர்