கவர்னர் சமாதானம்: மம்தா நிராகரிப்பு

கோல்கட்டா :
மேற்கு வங்க கவர்னர் மேற்கொண்ட சமாதான முயற்சிகளை, முதல்வர் மம்தா பானர்ஜி ஏற்கவில்லை.

மேற்கு வங்கத்தில், முதல்வர் மம்தா பானர்ஜி தலைமையிலான, திரிணமுல் காங்., ஆட்சி நடக்கிறது. மாநில கவர்னராக, ஜக்தீப் தன்கர் பொறுப்பேற்றதிலிருந்தே, பல விவகாரங்களில், கவர்னர் - முதல்வர் இடையே மோதல் ஏற்பட்டுள்ளது. இருவரும், ஒருவரையொருவர், பகிரங்கமாக விமரிசித்து வருகின்றனர்.

இந்நிலையில், நாட்டின், 71வது குடியரசு தினம் நேற்று முன்தினம் கொண்டாடப்பட்டது. இதையொட்டி, கோல்கட்டாவில் நடந்த விழாவில், தன் மனைவிக்கு, முதல்வர் மம்தாவின் இருக்கைக்கு அருகே இடம் ஒதுக்கும்படி, கவர்னர் தன்கர் கோரிக்கை விடுத்திருந்தார். ஆனால், 'பாதுகாப்பு மற்றும் மரபுப்படி அது சாத்தியமில்லை' என கூறி, அதிகாரிகள் மறுத்துவிட்டனர். குடியரசு தின விழா முடிந்த பின், முதல்வர் மம்தாவுடன், கவர்னரும், அவரது மனைவியும் சிறிது நேரம் பேசினர்.

மம்தாவுடன், தானும், மனைவியும் இருக்கும் புகைப்படங்களை, 'டுவிட்டர்' சமூக வலை தளத்தில் கவர்னர் தன்கர் வெளியிட்டிருந்தார். பின், நேற்று முன்தினம் மாலை, கவர்னர் மாளிகையில் நடந்த தேநீர் விருந்திலும், மம்தா பங்கேற்றார். அப்போது, அவர்களுக்கு இடையே நிலவி வரும் அதிருப்தி வெளியானது. நிகழ்ச்சியில், தேசிய கீதம் இசைக்கப்பட்டவுடன். தன்கரும், மம்தாவும், அடுத்ததடுத்த இருக்கைகளில் அமர்ந்தனர். ஆனால், சில நிமிடங்களிலேயே, மம்தா, அரசு உயர் அதிகாரிகள் அமர்ந்திருந்த பகுதிக்கு சென்று அமர்ந்தார்.

நிகழ்ச்சி முடிந்தவுடன், கவர்னிடம் சென்று, மம்தா விடைபெற்றார். அப்போது, கவர்னர், 'ராஜ்பவனுக்கு ஒருநாள் வந்து, காபி அல்லது தேநீர் குடித்து கொண்டே பேச வேண்டும்' என, மம்தாவுக்கு அழைப்பு விடுத்தார். இதற்கு மம்தா பதில் ஏதும் சொல்லாமல், புன்னகை பூத்துவிட்டு சென்றார்.
---
தினமலர்