சபாநாயகர் அதிகாரத்தை வரையறை செய்ய பார்லி.,க்கு சுப்ரீம் கோர்ட் அறிவுறுத்தல்

4
புதுடில்லி 'சபாநாயகர் ஒரு அரசியல் கட்சி உறுப்பினராக இருக்கும்போது எம்.எல்.ஏ.க்களை தகுதி நீக்கம் செய்யும் அதிகாரத்தை அவருக்கு அளிப்பது சரியா என்பது குறித்து பார்லிமென்டில் விவாதித்து முடிவு எடுக்க வேண்டிய நேரம் வந்து விட்டது. எம்.எல்.ஏ.க்களை தகுதி நீக்கம் செய்வது குறித்த முடிவை எடுக்க சு

வட கிழக்கு மாநிலமான மணிப்பூரில் முதல்வர் பிரேன் சிங் தலைமையிலான பா.ஜ. ஆட்சி நடக்கிறது. இங்கு 2017ல் நடந்த சட்டசபை தேர்தலில் காங்கிரஸ் சார்பில் போட்டியிட்டு வெற்றி பெற்ற ஷ்யாம் குமார் தேர்தல் முடிந்ததும் பா.ஜ. வில் இணைந்தார். மணிப்பூர் மாநில சுற்றுச் சூழல் மற்றும் வனத்துறை அமைச்சர் பதவியும் இவருக்கு வழங்கப்பட்டது.

கட்சி தாவல் தடை சட்டத்தின் கீழ் இவரது பதவியை பறிக்கும்படி சபாநாயகரிடம் காங். - எம்.எல்.ஏ.க்கள் மனு கொடுத்தும் நடவடிக்கை எடுக்கப்படவில்லை. உயர் நீதிமன்றத்தில் முறையிட்டபோதும் காட்சி தாவல் தடை சட்டத்தில் நடவடிக்கை எடுப்பதில் சபாநாயகருக்கு உள்ள அதிகாரத்தை சுட்டிக் காட்டி அதற்கு எதிராக உத்தரவு பிறப்பிக்க மறுத்து விட்டது.

இதை எதிர்த்து காங். - எம்.எல்.ஏ.க்கள் உச்ச நீதிமன்றத்தில் மனு தாக்கல் செய்தனர். இந்த மனு நீதிபதி ஆர்.எப்.நாரிமன் தலைமையிலான அமர்வு முன் நேற்று விசாரணைக்கு வந்தது. அப்போது நீதிபதிகள் பிறப்பித்த உத்தரவு:கட்சி தாவல் தடை சட்டத்தின் கீழ் ஷ்யாம் குமாருக்கு எதிராக நடவடிக்கை எடுக்கும்படி காங். - எம்.எல்.ஏ.க்கள் கொடுத்த மனு மீது நடவடிக்கை எடுக்காமல் சபாநாயகர் காலம் தாழ்த்தக் கூடாது. குறிப்பிட்ட கால வரையறுக்குள் சபாநாயகர் இந்த முடிவை எடுக்க வேண்டும்.

இந்த மனு மீது சபாநாயகர் நான்கு வாரங்களுக்குள் நடவடிக்கை எடுத்து முடிவை அறிவிக்க வேண்டும். சபாநாயகர் எடுத்த முடிவில் திருப்தி ஏற்படவில்லை எனில் காங். - எம்.எல்.ஏ.க்கள் நீதிமன்றத்தை அணுகலாம். எம்.பி. மற்றும் எம்.எல்.ஏ.க்கள் ஒரு கட்சியிலிருந்து மற்றொரு கட்சிக்கு தாவுவதை தடுப்பதற்காகவே கட்சி தாவல் தடை சட்டம் அமல் படுத்தப்பட்டது.

ஆனால் சபாநாயகர் ஒரு அரசியல் கட்சியின் உறுப்பினராக இருக்கும்போது எம்.எல்.ஏ.க்களை தகுதி நீக்கம் செய்யும் அதிகாரத்தை அவருக்கு அளிப்பது சரியாக இருக்குமா என்பது குறித்து பார்லிமென்டில் விவாதித்து முடிவு எடுக்கப்பட வேண்டும்; அதற்கான நேரம் வந்து விட்டது.கட்சி தாவல் தடை சட்டத்தின் கீழ் எடுக்கப்படும் நடவடிக்கை நேர்மையாக இருக்க வேண்டும்.

குறிப்பாக எம்.எல்.ஏ.க்களை தகுதி நீக்கம் செய்வது தொடர்பான முடிவை எடுக்கும் அதிகாரத்தை சபாநாயகருக்கு அளிப்பதற்கு பதிலாக சுதந்திரமான தனி அதிகாரம் உடைய ஒரு அமைப்பிடம் அந்த அதிகாரத்தை கொடுப்பது குறித்து ஆலோசித்து முடிவு எடுக்க வேண்டும்.இவ்வாறு நீதிபதிகள் உத்தர பிறப்பித்தனர்.

தினமலர்