நயன்தாராவுக்கு அண்ணன்

-
நாசர், பிரகாஷ்ராஜ் போன்று குணச்சித்திர நடிகராகவும்
வில்லனாகவும் நடிப்பில் அசத்துபவர் ஸ்ரீமன்.

சமீபத்தில் வெளியான ‘தர்பார்’ படத்தில் நயன்தாராவின்
அண்ணனாக நடித்து ரசிகர்கள் மனதில் இடம்பிடித்தவர்.
அந்தப் பட அனுபவத்தை நம்மிடம் பகிர்ந்துகொண்டார்.

‘‘நான் சினிமாவுக்கு வந்து 27 வருடங்களாகிவிட்டது.
ரஜினி சாருடன் நடிக்க வேண்டும் என்பது என்னுடைய
25 வருடக் கனவு. அந்த கனவு இப்போதுதான்
நிறைவேறியுள்ளது.

ரஜினி சாருடன் நடித்த அனுபவம் இனிமையானது.
அவருடனான முதல் காட்சியே கதவைத் திறந்து வாங்க
வாங்க என்று அழைப்பார். என்னுடைய நடிப்பைப்
பாராட்டியது அதைவிட சந்தோஷம்.
அந்தக் குரல் என்னுடைய இரண்டாவது இன்னிங்ஸை
சிறப்பாக துவக்கி வைத்தமாதிரி இருந்தது.

இந்தப் படத்தில் நடித்ததற்காக பல தரப்புகளிடமிருந்து
பாராட்டு கிடைத்துள்ளது. அந்தப் பாராட்டு முழுவதும்
இயக்குநர் ஏ.ஆர்.முருகதாஸ் சாரை மட்டுமே சேரும்.
சாருடன் எனக்கு சிறிது பழக்கம் இருக்கிறது.

அவருடைய முதல் படமான ‘தீனா’விலும் நான் இருந்தேன்.
இப்போது இமாலய அளவுக்கு உயர்ந்துள்ள நிலையில் அவர்
பண்ணிய ‘தர்பார்’ படத்திலும் நான் இருப்பது மகிழ்ச்சியாக
உள்ளது.

முருகதாஸ் சார் முழுமையான சிறந்த மனிதர் என்று
சொல்லலாம். அப்போது பார்த்த அதே மனிதநேயம், அதே
ஆர்வம், உத்வேகம், பழகும் விதம் எதுவுமே எள்ளின்
முனையளவும் மாறவில்லை.

தற்போது விஜய் சாருடன் ‘மாஸ்டர்’ படம் பண்ணுகிறேன்.
அந்தப் படத்திலும் எனக்கு பிரமாதமான ரோல். இயக்குநர்
லோகேஷ் கனகராஜ் மேக்கிங் வேற லெவல். வேலை வாங்கும்
விதமும் பிரமாதம். அந்தப் படத்தில் மீண்டும் என்னுடைய
நண்பர் விஜய்யுடன் நடித்தது மறக்க முடியாத அனுபவம்.

படம் வெளியாகும் சமயத்தில் அந்தப் படத்தைப் பற்றியும்
விஜய்யுடன் எனக்கிருக்கும் நட்பைப் பற்றியும் பேசுகிறேன்.
தமிழ், தவிர பிற மொழிகளிலும் பிஸியாக இருக்கிறேன்.
தற்போது இரண்டு தெலுங்குப் படங்களில் நடித்து வருகிறேன்.

இந்த வேடம்தான் வேண்டும் என்று எதிர்பார்ப்பது கிடையாது.
குயவன் கையில் இருக்கும் களிமண் போன்றுதான் என்னை
இயக்குநர்களிடம் ஒப்படைக்கிறேன். அவர்கள் என்னை எப்படி
வேண்டுமானாலும் சித்தரிக்கலாம்.
அதற்கு நான் ரெடி’’ என்று உற்சாகமாகச் சொல்லுகிறார் ஸ்ரீமன்.
----------------------------------

- எஸ்
வண்ணத்திரை