ஒல்லியான பெண்களுக்கே ரசிகர்கள் அதிகம்!

-

டிவி திரையில் ஒல்லியான பெண்களையே பார்வையாளர்கள் அதிகம் பார்க்க விரும்புவதாக சமீபத்திய ஆய்வு ஒன்றில் தெரிய வந்துள்ளது.

இங்கிலாந்தின் டர்ஹாம் பல்கலைக்கழகத்தின் ஆய்வுக்குழு, அமெரிக்காவின் நிகாரகுவா பகுதியில் உள்ள பல கிராமங்களைச் சேர்ந்த மக்களை பயன்படுத்தி ஆய்வு மேற்கொண்டனர். அவர்களில் அதிக நேரம் டிவி பார்ப்பவர்கள் திரையில் ஒல்லியான பெண்களை ரசிப்பதாக தெரிவித்துள்ளனர். அதேநேரத்தில் நாள் ஒன்றுக்கு ஒரு சில மணி நேரங்களே டிவி பார்ப்பவர்கள் திரையில் குண்டான பெண்களை ரசிக்க விரும்புவதாகக் கூறினர்.

லிங்கன் பல்கலைக்கழக இணை ஆய்வாளர் டிரேசி தோர்ன்பரோ என்பவர் இதுகுறித்து கூறுகையில், 'நாங்கள் இப்பகுதியைச் சேர்ந்த கிராமவாசிகளுக்கு தொடர்ச்சியாக சில படங்களை ஒளிபரப்பினோம். அதில், குண்டான பெண்கள் மற்றும் ஒல்லியான பெண்கள் என கலவையாக இருந்தனர். இந்தப் படங்களை பார்த்தபிறகு, கிராமவாசிகள் உடல் அளவு குறித்து அதிகம் பேசினர். மேலும், அவர்கள் உடலை கட்டுக்கோப்பாக வைத்துக்கொள்வது குறித்த விழிப்புணர்வும் அடைந்துள்ளதாக நாங்கள் கருதுகிறோம். அதேநேரத்தில் அவர்களின் இந்த உணர்வுகள் நாளுக்குநாள் மாறக்கூடியவை' என்று தெரிவித்தார்.

நிகாரகுவா பகுதியில் உள்ள ஏழு கிராமங்களைச் சேர்ந்த ஆண்கள், பெண்கள் என 299பேர் இந்த ஆய்வில் பங்கேற்றனர். அவர்களிடம் இனம், கல்வி, வருமானம், பசி, மொழி மற்றும் தொலைக்காட்சி வெளிப்பாடு குறித்த கேள்விகள் அடங்கிய ஒரு வினாத்தாளை வழங்கி மதிப்பிடுமாறு கூறப்பட்டது. அதிலும், மாறுபட்ட உடல் வடிவங்கள் மற்றும் அளவுகள் கொண்ட பெண்களின் கவர்ச்சி படங்களை கொடுத்து மதிப்பிடுமாறும் கேட்கப்பட்டது. இதில் பெரும்பாலானோர்கள் மெல்லிய உடலுடைய பெண்களை ரசிப்பதாக கூறியுள்ளனர்.

இப்பகுதி மக்கள், மற்ற பகுதிகளை விட சற்று வித்தியாசமானவர்களாகவே தெரிந்தனர். அவர்களில் பெரும்பாலோருக்கு செய்தித்தாள் படிக்கும் பழக்கம் இல்லை; யாரிடமும் ஆண்ட்ராய்டு மொபைல் போன் இல்லை. டிவி மூலமாகவே அன்றாட நிகழ்வுகளை தெரிந்துகொள்கின்றனர். அதிலும், கேபிள் சந்தா செலுத்த முடிந்தவர்கள் மட்டுமே டிவி வைத்துள்ளனர். எனவே, டிவி பார்ப்பதன் வெளிப்பாட்டை தெரிந்துகொள்ளவே இப்பகுதி மக்களை தேர்வு செய்தோம் என்று ஆராய்ச்சியாளர் ஒருவர் தெரிவித்தார்.

மேலும், இப்பகுதி மக்கள் ஹாலிவுட் அதிரடி திரைப்படங்கள், பாடல்கள், ரியாலிட்டி ஷோக்கள் என கலவையாக அனைத்தையும் பார்ப்பதாகவும் அவர் தெரிவித்துள்ளார்.

தினமணி