பரங்கிக்காயின் கதை

**சிவா** · **சிவா** Tue Jan 12, 2010 7:34 pm

பரங்கிக்காயை `பெபோன்' என்று முதலில் குறிப்பிட்டவர்கள் கிரேக்கர்கள்தான். அதற்கு `பெரிய முழாம் பழம்' என்று அர்த்தம். `பெபோன்' என்பதுதான் பிரெஞ்சுக்காரர்களின் உச்சரிப்பில் `பொம்பன்' ஆனது. எப்போதும் பிரெஞ்சுக்காரர்கள் கூறுவதை ஏற்றுக்கொள்ளும் வழக்கமில்லாத ஆங்கிலேயர்கள் அதை `பம்பியோன்' என்று அழைத்தனர். கடைசியாக அமெரிக்கர்கள் `பம்கின்' என்ற வார்த்தையை உருவாக்கினார்கள்.

பரங்கிக்காய் வடஅமெரிக்காவில் தோன்றியதாகக் கருதப்படுகிறது. மெக்சிகோவில் கி.மு. 5500-க்கும் 7000-க்கும் இடைப்பட்ட காலத்தில் பரங்கி விதைகள் கண்டுபிடிக்கப்பட்டிருக்கின்றன. இன்று ஏறக்குறைய உலகின் அனைத்துப் பகுதிகளிலும் பரங்கிக்காய் விளைவிக்கப்படுகிறது.

பரங்கிக்காய் `ருசியுணவுகள்'

பூர்வகுடி அமெரிக்கர்கள், நீண்ட பரங்கிக்காய் துண்டுகளை வெட்டவெளி நெருப்பில் வாட்டிச் சாப்பிடுவதை வழக்கமாக வைத்திருந்தனர். காய்ந்த பரங்கிக்காய் துண்டுகளில் இருந்து விரிப்புகளையும் அவர்கள் நெய்தனர். இன்று பரங்கிக் காயை அவித்தும், சூப்பாகவும், கூட்டாகவும் சாப்பிடுவது உலகில் பொதுவழக்கமாக உள்ளது. அமெரிக்காவில் ஆரம்பத்தில் குடியேறியவர்கள் `பரங்கிக்காய் பை'யை (`பை' என்பது ஒருவகை உணவு) தயாரித்தனர். அவர்கள், பரங்கிக்காயின் மேல்பகுதியில் வெட்டியெடுத்து, விதைகளை அகற்றிவிட்டு, உள்ளே பால், நறுமணப்பொருட்கள், தேன் போன்றவற்றை இட்டு, தீக்கங்குகளால் சூடுபடுத்திச் சாப்பிட்டனர்.

`தீய ஆவிகளை'த் துரத்த...

பரங்கிக்காயானது மேலைநாடுகளில் வேடிக்கை அலங்காரப் பொருளாகவும் உள்ளது. குறிப்பாக, `அனைத்துப் புனிதர்' தினத்துக்கு முந்தைய வேடிக்கை நாளின்போது. அப்போது, மக்கள் பரங்கிக்காய்களைக் குடைந்து, முகம் போல உருவாக்கி, உள்ளே மெழுவர்த்திகளை ஏற்றி வைப்பதை வழக்கமாகக் கொண்டிருக்கின்றனர். அவற்றை ஜன்னலோரம் அல்லது வீட்டின் நுழைவாயிலில் வைக்கின்றனர். அவை தீய ஆவிகளைத் துரத்தும் என்று நம்புகிறார்கள். குறிப்பாக, `ஜாக் ஆப் தி லான்டர்ன்' என்ற அலங்கார அமைப்பு.

பரங்கிக்காய் நல்லதா?

படரும் கொடி இனத்தைச் சேர்ந்ததாகும் பரங்கிக்காய். இதில் கொழுப்பு, சோடியம் ஆகியவை குறைவாகவும், `லூட்டின்', `ஆல்பா', `பீட்டா கரோட்டின்' ஆகியவை அதிகமாகவும் உள்ளன. அவற்றை உடம்பானது `வைட்டமின் ஏ' ஆக மாற்றிக்கொள்கிறது. அது சிலவகைப் புற்றுநோய்களையும், கண்ணின் `காட்டராக்ட்' பாதிப்பையும் தவிர்ப்பதாக உள்ளது. உண்மையில், பரங்கிக்காய் ஓர் ஆரோக்கி யமான `சக்தி உணவாக'க் கருதப்படுகிறது. இதில் பொட்டாசியம், நார்ச்சத்து, வைட்டமின் `சி', `ஈ', `கே' ஆகியவை செறிந்துள்ளன. நிறைய தாது உப்புகளையும் கொண்டுள்ளது.

பரங்கிக்காயின் விதையில் கூட மக்னீசியம், இரும்பு, துத்தநாகம், பாஸ்பரஸ், பொட்டாசியம், செலீனியம், மாங்கனீஸ், தாமிரம் போன்றவை உள்ளன. மேலும், `டிரிப்டோபான்' என்ற அமினோ அமிலத்தையும் கொண்டிருக்கிறது. இது மனஅழுத்தத்தைப் போக்கும் தன்மைகளையும், அத்தியாவசியமான `பேட்டி ஆசிட்'களையும் கொண்டுள்ளது. பரங்கி விதைகளை பச்சையாகச் சாப்பிடுவது நல்லது. காரணம் வறுக்கப்பட்ட விதைகளில் சிதைந்த கொழுப்பு உள்ளது. அது ரத்த நாளங்களில் படிவை ஏற்படுத்தக்கூடும்.