கங்கண சூரியகிரகணத்தைஆராய்ச்சி செய்யும் தொழிலாளி

**சிவா** · **சிவா** Sun Jan 03, 2010 7:27 am

திருநெல்வேலி:பள்ளிபடிப்பைக் கூட தாண்டாத தொழிலாளி, சூரிய குடும்பம் குறித்து ஆராய்ந்து புத்தகங்கள் எழுதி வருகிறார்.திருநெல்வேலி மாவட்டம் தச்சநல்லூரை சேர்ந்தவர் மாரியப்பன்(60). தச்சு தொழிலாளியான இவர், மார்க்கோனி, தாமஸ்ஆல்வா எடிசன், ஸ்டீவன்சன், ஐன்ஸ்டீன் உள்ளிட்ட அறிவியல் அறிஞர்களின் உருவங்களையும், அவர்கள் உலகிற்கு தந்த படைப்புகளையும், மெகா சைஸ்களில் மரச்சிற்பங்களாக்கி காட்சிக்கு வைத்துள்ளார்.

மனித மூளை, "ஆக்கத்திற்குத்தான், அழிவுக்கு அல்ல' என்ற சிந்தனையுடன் இவர் தயாரித்த மரச்சிற்பம், சில ஆண்டுகளுக்கு முன், தேசிய அளவிலான கைவினைஞர்கள் விருது போட்டிக்கு தேர்வானது. சாதாரண தேங்காய் ஓடுகளில் அழகுப்பொருட்கள், மரச்சட்டை ஆகியவற்றைத் தயாரித்துள்ளார்.

நான்காம் வகுப்பே படித்துள்ள மாரியப்பன், அறிவியல் மீதான ஆர்வத்தால், சூரிய குடும்பம் குறித்த, ஆய்வை "அறிவியல் சிந்தனைகள்' என நூலாக வெளியிட்டுள்ளார். தற்போது மரத்தால் ஆன "டெலஸ்கோப்' தயாரித்துள்ளார். 10க்கும் மேற்பட்ட லென்ஸ்களை பொருத்தி சந்திரன், சூரியனை நெருக்கமாக கண்டு, ஆய்வுகளில் ஈடுபட்டு வருகிறார்.

சூரியகுடும்பம் குறித்து "பொருள் தோற்றம் குறித்த மனித தீர்வுகள்' என்ற புத்தகத்தையும் எழுதியுள்ளார். பொங்கலன்று, வானில் ஏற்பட உள்ள, கங்கணசூரிய கிரகணத்தை, தமது தொலைநோக்கி கருவியால் ஆய்வு மேற்கொள்ள உள்ளார்.