மெளன சிறை -{கவிதை} -கவிதைமணி

**ayyasamy ram** · **ayyasamy ram** Thu Dec 12, 2019 10:31 am

$மெளன சிறை -{கவிதை} -கவிதைமணி Silence_in_dark$

மௌன சிறை

எழுசீர்க் கழிநெடிலடி விருத்தம்

அன்புச் சிறையில் அடைக்கும் நம்மை
……….அமிழ்தத் தமிழின் வார்த்தைகளே..!
துன்பச் சிறையில் துளிரும் சொல்லாய்த்
……….துயரம் போக்கும் ஆறுதலே..!
மின்னல் போலே மனத்துள் உதிக்கும்
……….மெளனச் சிறையில் எண்ணமுமே..!
என்பும் தோலும் இருக்கும் வரையில்
……….எல்லாம் நமக்குத் தமிழ்த்தாயே..!
.
துள்ளும் உள்ளம் துவளா இன்பம்
……….தொய்வே இன்றி அலைததும்ப..!
பள்ளம் மேடும் பாய்ந்தே ஓடும்
……….பசுமைத் தமிழின் மூதுரையே..!
உள்ளும் புறமும் உலுக்கும் எண்ணம்
……….உதிர்க்கும் சொற்கள் அளவிலையே..!
மெள்ள மெள்ள மெளனச் சிறையில்
……….மொழியின் எழுச்சி அற்புதமே..!
.
செலவும் இல்லை சோம்பல் இல்லை
……….சுலபத் தமிழைக் கற்பதற்கே..!
விலக்கும் இல்லை வினையும் இல்லை
……….விளைவும் பயிராய்த் தமிழதுவே..!
வலமும் இல்லை இடமும் இல்லை
……….வளரும் அறிவின் எல்லையதே..!
மலரும் காதல் மங்காத் தமிழ்மேல்
……….மெளனச் சிறையில் விடுதலையாம்..!

- கவிஞர் பெருவை பார்த்தசாரதி

**

**ayyasamy ram** · **ayyasamy ram** Thu Dec 12, 2019 10:32 am

மெளன சிறை -{கவிதை}
- கவிஞர் மஹாரதி

எல்லோரும் பேசிக் கொண்டிருக்கிறார்கள்
எல்லோரும் கத்திக் கொண்டிருக்கிறார்கள்
எல்லோரும் சத்தத்தோடு சமர்செய்கிறார்கள்
வார்த்தைகள் பைத்தியக்காரனின் மூக்குச்சளியாய்
ஒழுகிக் கொண்டிருக்கின்றன

வன்மத்தின் ஆத்திரமாய்ச் சொற்கள்
மூத்திரமாய்ப் பெருக்கெடுத்து ஓடுகின்றன
அவனவன் மொழித்துப்பாக்கியை நாவில்
செருகிக்கொண்டுதான் வெளியே கிளம்புகிறான்

குறுக்கே சாத்தானைப் போல் ஓடிமறையும்
ஆட்டோக்காரனுக்கு ஒரு குண்டு
குண்டும்குழியுமான சாலையில் இருசக்கர வண்டி
பல்டி அடித்தால் அரசுக்கொரு குண்டு
போனில் கடன்வேண்டுமா என்று கேட்கும்
குரலுக்கொரு குண்டு
வட்டி தராதவனுக்கு ஒரு குண்டு
அம்மாவை மையம் வைத்துத் திட்டியவனுக்கு
ஒரு குண்டு

அரசுக்கட்டிலில் துயில்பவர்களுக்கு ஒரு குண்டு
சிம்மாசனம் நோக்கி ஓடுபவர்கள் ஒருவர்மீது
ஒருவர் வீசும் குண்டு
பூமி புடைநாற்றம் அடிக்கிறது
சப்தக்காடு சுடுகாடு கூச்சல்நாடு
தத்துவம் எல்லாம் கல்லறையில்
சத்தியம் எப்போதும் மெளனசிறையில்

**

**ayyasamy ram** · **ayyasamy ram** Thu Dec 12, 2019 10:33 am

மெளன சிறை -{கவிதை}
- கவிஞர் - ஆதியோகி

ஏனிந்த அடர் மௌனம்
என் அன்பே?
வார்த்தைகளைத்
தொலைத்து விட்டாயா?
இதயத்துள்
புதைத்து விட்டாயா? இல்லை
வரத்துடிக்கும் அவற்றை
வைராக்கியத்துடன்
சிறைபிடித்து வைத்திருக்கிறாயா?

எதுவாயினும் என்னவளே!
கோடரியாய் என்
இதயம் பிளக்கும்,
கனத்த உன் மௌனத்தைக்
கலைத்து விடு...!
என்னை வதைக்குமிந்த
உன் விளையாட்டை
உடன் நிறுத்திவிடு...!
----

**ayyasamy ram** · **ayyasamy ram** Thu Dec 12, 2019 10:44 am

மெளன சிறை -{கவிதை}
--
மெளன சிறை -{கவிதை} -கவிதைமணி Be-silent

அமைதியைத் தேடி!
அலைபவர் கோடி!
வாடிய உள்ளங்கள் எல்லாம்!
தேடுவது நாடுவது
அமைதி! அமைதி!

மெளன சிறையில்!
மனதிற்குள் புலம்பும் கைதிகள்!
தண்ணீரில் மூழ்கிய நிலையில்!-- அவர்கள்
கண்ணீர் விடுவது யாருக்குத் தெரியும்?

எதுவும் நடக்காது என்று!
தெரிந்த அன்றே!
ஏமாற்றம் ! தடுமாற்றமாகி!
பேசமுடியாமல்!
மெளன சிறையாகிறோம்!

தனிமையில்
இனிமையா?
இனிமையில்
தனிமையா?
மௌனமே சிறையா?

சிறைக்குள் சிக்கிய
மௌனம் கலைந்தால்!
உள்ளத்தின் குமுறல்கள்!
கடும் வெள்ளமாய்!
பாய்ந்திடும்!
மௌன சிறைகள்
ஓய்ந்து விடும்!
எங்கும் மகிழ்ச்சி வெள்ளங்கள்!
பாய்ந்து விடும்!
வெளிப்படையாக பேசிட !
வெளிச்சங்கள்! தடைகளில்லை!

அவைகள்! வெளிச்சத்திற்கு வந்தால்!
மௌன சிறைகள்! எங்குமில்லை!

- கவிச்சித்தர் களக்காடுவ.மாரிசுப்பிரமணியன்

**

**ayyasamy ram** · **ayyasamy ram** Thu Dec 12, 2019 10:46 am

மெளன சிறை -{கவிதை} -கவிதைமணி QZimKSy1SwOX55mve3MN+kkk

-

கண்ணிமைக்கும் பொழுதொன்று
காற்றோடு கலந்திங்கு
கவி பாடி சென்றதுவோ

நித்தம் நித்தம் நிஜமொன்று
நின் மதியென நகர்ந்திங்கு
நிழலாடிச் சென்றதுவோ

சட்டம் போட்ட கால்களெல்லாம்
கண்டம் விட்டு கண்ணிமைக்கும்
காலமென்றானதுவோ

விட்டு விட்டு சென்றாலும்
விதையொன்று முளையாகி
விடையொன்று தேடாதோ

யாரோ நட்டு வைத்து
விட்டுச் சென்ற செடியொன்று
மொட்டு வைத்து
முட்டி மோதி
மலர்ந்திங்கு மணம் வீசாதோ!

- யோகராணி கணேசன்/ நோர்வே

Sponsored content · Sponsored content

மெளன சிறை -{கவிதை} -கவிதைமணி

மெளன சிறை -{கவிதை} -கவிதைமணி

Re: மெளன சிறை -{கவிதை} -கவிதைமணி

Re: மெளன சிறை -{கவிதை} -கவிதைமணி

Re: மெளன சிறை -{கவிதை} -கவிதைமணி

Re: மெளன சிறை -{கவிதை} -கவிதைமணி

Re: மெளன சிறை -{கவிதை} -கவிதைமணி

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக