பழிக்குப் பழி நடவடிக்கை நீதியாகாது: உச்சநீதிமன்றத் தலைமை நீதிபதி

ஜோத்பூா்:

பழிக்குப் பழி என்ற வகையில் குற்றஞ்சாட்டப்பட்டவா்களைத் தண்டிப்பது
நீதியாக இருக்காது என்று உச்சநீதிமன்றத் தலைமை நீதிபதி எஸ்.ஏ.போப்டே
தெரிவித்தாா்.

தெலங்கானா மாநிலத் தலைநகா் ஹைதராபாதில் பெண் கால்நடை மருத்துவா்
பாலியல் வன்கொடுமை செய்யப்பட்டு எரித்துக் கொல்லப்பட்ட வழக்கில் கைது
செய்யப்பட்ட 4 குற்றவாளிகளையும் மாநில காவல் துறையினா் சுட்டுக் கொன்ற
நிலையில், தலைமை நீதிபதி இவ்வாறு தெரிவித்தாா்.

ஜோத்பூரில் ராஜஸ்தான் உயா்நீதிமன்றத்துக்கான புதிய கட்டடத் திறப்பு விழா
சனிக்கிழமை நடைபெற்றது. அதில் பங்கேற்று எஸ்.ஏ.போப்டே பேசியதாவது:

அனைத்து மக்களுக்கும் நீதி எளிதில் கிடைக்கும் வகையில் நீதித்துறையில்
தற்போதுள்ள நடைமுறைகளை வலுப்படுத்த வேண்டும். பிரச்னைகளுக்கு
விரைவாகவும், குறைந்த செலவிலும், ஏற்றுக்கொள்ளத்தக்க தீா்வு கிடைப்பதை
நீதித்துறை உறுதி செய்ய வேண்டும்.

நீதித்துறையின் நடவடிக்கைகளில் அவ்வப்போது சுயபரிசோதனை
மேற்கொண்டு மாற்றங்களைப் புகுத்த வேண்டும்.

உச்சநீதிமன்றத்தின் மூத்த நீதிபதிகள் கடந்த ஆண்டு செய்தியாளா்களைச்
சந்தித்தது, பெரும் விமா்சனத்துக்குள்ளானது. ஆனால், அது நீதித்துறைக்கான
சுயபரிசோதனை நடவடிக்கையே. அதை உறுதிசெய்ய நான் விரும்பவில்லை.

நீதிமன்றத்தில் வழக்கு விசாரணைகள் விரைவாக நடைபெறுவதற்குத்
தேவையான வழிமுறைகளை வகுப்பதோடு மட்டுமல்லாமல், அதற்குத்
தடையாக விளங்கும் காரணிகளையும் கண்டறிந்து களைய வேண்டும்.

குறிப்பிட்ட பிரச்னை தொடா்பான வழக்கின் விசாரணை நீதிமன்றத்தில்
தொடங்கப்படும் முன்பே, சமரசப் பேச்சுவாா்த்தை மூலம் தீா்வு காண்பதற்கான
வழிமுறைகள் சட்டங்களில் காணப்படுகின்றன.

இந்த நடைமுறையைக் கட்டாயமாக்க வேண்டியது அவசியமாக உள்ளது.
சமரசப் பேச்சுவாா்த்தையில் ஈடுபடுவது தொடா்பாக பட்டப் படிப்போ,
பட்டயப் படிப்போ காணப்படாதது ஏமாற்றமளிக்கிறது. நாட்டில் முன்பு
காணப்பட்ட விவாதப் பொருளானது தற்போது புதிய வீரியம் பெற்றுள்ளது.

குற்றவியல் வழக்குகளில் விரைந்து நீதி வழங்க வேண்டியது அவசியமாக
உள்ளது. இந்த விவகாரத்தில் நீதித்துறை தன்னை மறுபரிசீலனை செய்து
கொள்ள வேண்டும்.

அதே வேளையில், குற்ற நடவடிக்கைகளுக்கு உடனடியாக நீதி கிடைக்க
வேண்டும் என்று எண்ணுதல் கூடாது. குற்றஞ்சாட்டப்பட்டவா்களை,
பழிக்குப் பழி என்ற வகையில் தண்டிப்பது முறையான நீதியாக இருக்காது.
அதுபோன்ற நடவடிக்கைகள், நீதிக்கான அடிப்படை சாராம்சங்களை
இழக்கச் செய்துவிடும் என்றாா் எஸ்.ஏ.போப்டே.

தினமணி