பாஸ்போர்ட் அலுவலகத்தில் மோதல்

திருச்சி: திருச்சி மண்டல பாஸ்போர்ட் அலுவலகத்தில், காவலாளிகளுக்கும், விண்ணப்பதாரர்களுக்கும் ஏற்பட்ட பிரச்னையால், விண்ணப்பதாரர்கள் சாலை மறியலில் ஈடுபட்டனர். திருச்சி மண்டல பாஸ்போர்ட் அலுவலகக் கட்டுப்பாட்டில், திருச்சி, தஞ்சை, நாகை, கரூர், புதுக்கோட்டை, திருவாரூர், பெரம்பலூர், அரியலூர் ஆகிய எட்டு மாவட்டங்கள் உள்ளன. ஒவ்வொரு ஆண்டின் கடைசி நாளும், பாஸ்போர்ட் அலுவலகத்தில் கட்டண உயர்வு பீதி காரணமாக கும்பல் நிரம்பி வழியும்.

அதன்படி, நேற்று பாஸ்போர்ட் அலுவலகத்துக்கு மேற்கண்ட மாவட்டங்களைச் சேர்ந்தவர்கள், புதிய பாஸ்போர்ட் விண்ணப்பிக்க, புதுப்பிக்க உள்ளிட்ட பல்வேறு காரணங்களுக்காக, அதிகாலை 4 மணி முதலே, அலுவலகம் உள்ளே செல்ல வழங்கப்படும் டோக்கன் வாங்க வரிசையில் நின்றிருந்தனர். காலை 10 மணிக்கு டோக்கன் வழங்கும் அலுவலர் வந்தார். சிறிது நேரத்தில் பாஸ்போர்ட் அலுவலக பாதுகாப்பு பணியில் உள்ள காவலாளிகள் மூலம், புரோக்கர்கள் பணம் கொடுத்து சிலரை அலுவலகத்தின் உள்ளே அனுப்பினர். இது, அதிகாலை முதல் வரிசையில் காத்திருந்த விண்ணப்பதாரர்கள் மத்தியில் கோபத்தை ஏற்படுத்தியது.

இதுகுறித்து, பெண்கள், காவலாளிகளிடம் கேட்டதற்கு, அவர்கள், அந்த பெண்களை தகாத வார்த்தைகளால் திட்டியதோடு, அவர்களை தள்ளியும் விட்டனர். இதில், ஒரு இளம்பெண் காயமடைந்தார். இச்சம்பவம், வரிசையில் நின்றவர்களை ஆத்திரமடையச் செய்தது. அவர்கள் காவலாளிகளை முற்றுகையிட்டு தட்டிக் கேட்டனர். பாஸ்போர்ட் அலுவலகத்தின் வாசல் கதவை மூடிய காவலாளிகள், டோக்கன் வழங்க முடியாது என்று பிரச்னை செய்தனர். விண்ணப்பதாரர்கள், கதவை திறக்க வலியுறுத்தி முற்றுகை போராட்டம் நடத்தியும், கதவு திறக்கப்படவில்லை. தகவலறிந்த போலீசார், தவறு, பாஸ்போர்ட் அலுவலகம் மீது தான் என்பதை தெரிந்து கொண்டு, "மக்களை முடிந்தால் பார்த்துக் கொள்ளுங்கள்' என்று கூறிவிட்டு சென்றுவிட்டனர்.

ஒரு மணி நேரத்துக்கும் மேலாக அலுவலக கதவு திறக்கப்படாததால், ஆத்திரமடைந்த விண்ணப்பதாரர்கள் சிலர், மெயின்ரோட்டில் சாலை மறியல் செய்ய முற்பட்டனர். அப்போது, அங்கு வந்த போலீசார் அவர்களை லேசான தடியடி நடத்தி கலைத்தனர். பின், அலுவலகத்தின் உள்ளே சென்ற போலீசார் அங்கு முற்றுகையிட்டிருந்த விண்ணப்பதாரர் மீது தடியடி நடத்தி கலைத்து, அவர்களை மீண்டும் வரிசையில் நிற்க வைத்தனர். அதன்பின், எவ்வித பிரச்னையும் இன்றி வந்திருந்த அனைவரும், பாஸ்போர்ட் அலுவலக டோக்கன் பெற்று உள்ளே சென்றனர்.