நடிகை என்பதை கணவரிடம் சொல்லலை!

--
கடந்த, 1980களில், முதல் மரியாதை, கடலோரக்
கவிதைகள், மண்ணுக்குள் வைரம் போன்ற பல
படங்களில் நடித்துள்ள நடிகை ரஞ்சனி:

என் சொந்தப் பெயர், சசிகலா சாஷா. சினிமாவுக்காக,
இயக்குனர் பாரதிராஜா தான், ரஞ்சனி என, மாற்றினார்.
பூர்வீகம் தமிழகம் தான் என்றாலும், சிங்கப்பூரில்
நான்கு தலைமுறையாக வசித்து வந்தோம்;

வீட்டில், தமிழில் தான் பேசுவோம்.அப்பா, சிங்கப்பூரில்,
கல்லுாரி ஒன்றில் கணக்காளராக வேலை பார்த்தார்;
அங்கே, சினிமா வினியோகஸ்தராகவும் இருந்தார்.

பச்சைக்கொடி என்ற படத்தில் நடிக்கத் தான், பாரதிராஜா
என்னை ஒப்பந்தம் செய்திருந்தார். திடீரென சிவாஜியின்
, 'கால்ஷீட்' கிடைத்ததால், முதல் மரியாதை படத்தை
எடுக்கத் துவங்கினார் பாரதிராஜா. அதில் நடித்தேன்.

இப்படித் தான், என் திரையுலக பயணம் துவங்கியது.
நடிகையருக்கு வாழ்நாள் முழுக்க, நடிக்கும் வாய்ப்பு
கிடைக்காது; படிப்பு தான், வாழ்நாள் முழுவதும் கை
கொடுக்கும் என்பதால், சிங்கப்பூர் திரும்பி, படிக்கத்
துவங்கினேன்.

நானும் என் கணவர் பிர்ரீ கொம்பராவும், துவக்கத்தில்
நண்பர்களாகத் தான் பழகினோம். அதன் பின்
காதலர்களாகி விட்டோம். காதலிக்கும் போது, நடிகை
என்பது பற்றியோ, என் திரையுலக வாழ்க்கை குறித்தோ,
அவரிடம் எதுவும் கூறவில்லை.

சில நேரங்களில் அவர், என்னைப் பார்த்து
, 'நீ, தமிழ் நடிகை ரஞ்சனி மாதிரியே இருக்கே' என்பார்.
நானும், 'அப்படியா?' என்பேன், உண்மையை சொல்லாமல்.
ஒரு கட்டத்தில், அவரிடம் உண்மையை சொல்ல
வேண்டியதாகி விட்டது. முதலில் அதிர்ச்சி அடைந்தவர்,
பின் சமாதானமாகி விட்டார்.

ரியல் எஸ்டேட் தொழில் செய்யும் என் கணவருக்கு,
அடர்ந்த காடுகளில், வன விலங்குகளை படம் பிடிப்பதில்
ஆர்வம் அதிகம். இருவரும் சேர்ந்து தான், வனவிலங்கு
சரணாலயங்களுக்குச் செல்வோம்.

இந்தியா மற்றும் வெளிநாடுகளில் உள்ள காடுகளில்,
வன விலங்குகளை படம் பிடித்துள்ளோம். அவர், போட்டோ
பிடிப்பார்; நான், வீடியோ எடுப்பேன்.லண்டனில் இருந்த
போது, பெண்களுக்கு எதிரான குடும்ப வன்முறைகளுக்கு
எதிராக நான் போராடியதை அறிந்த, கேரளாவின்
எர்ணாகுளம் மாவட்ட கலெக்டர், 'நிர்பயா' திட்டத்தில்,
என்னை உறுப்பினர் ஆக்கி விட்டார்.

இப்போது கேரளாவில் நிரந்தரமாக வசிக்கிறேன்.
மலையாள செய்தி சேனல் விவாதங்களில் பங்கேற்கிறேன்.
கணவரின் தொழிலுக்கு உதவியாக இருக்கிறேன்.

நீண்ட காலத்திற்கு பின், ரிங் மாஸ்டர் என்ற மலையாள
படத்தில் நடித்தேன். நல்ல கதைகள் அமைந்தால்,
தொடர்ந்து நடிப்பேன்!
-
-----------------------------
தினமலர்