'சவால்களை எதிர்கொள்ள ஆராய்ச்சிகள் அவசியம்'

-
சென்னை :
''தண்ணீர் பற்றாக்குறையை சமாளிக்க, கடல் நீரை துாய்மைப்படுத்த வேண்டும். இயற்கையோடும், கலாசாரத்தோடும் சேர்ந்து, காலநிலை மாற்றம் உள்ளிட்ட, அனைத்து சவால்களையும் எதிர்கொள்ள தேவையான தொழில்நுட்பங்களை உருவாக்க, ஆராய்ச்சிகள் அவசியம்,'' என, துணை ஜனாதிபதி வெங்கையா நாயுடு தெரிவித்தார்.

தேசிய கடல்சார், தொழில்நுட்ப நிறுவனத்தின், 25வது ஆண்டு விழா, சென்னை, பள்ளிக்கரணையில் நேற்று நடந்தது.

இதில், துணை ஜனாதிபதி வெங்கையா நாயுடு பேசியதாவது:

சுற்றுச்சூழல் கள ஆராய்ச்சியில், கடல் சார்ந்த ஆய்வுகளில், தமிழகம் முன்னோடியாக உள்ளது. முதலாம் நுாற்றாண்டில், சோழர்களால் அமைக்கப்பட்ட பூம்புகார் நகரம், கடல்சார் கட்டமைப்பில், நாம் சிறந்து விளங்கியதற்கான சரியான சான்று.

அயல்நாடுகள் உடனான வர்த்தகத்தில், தமிழக மன்னர்கள் சிறப்புடன் விளங்கினர்.நாட்டின் மக்கள்தொகை பெருகி வருகிறது; தண்ணீர் தேவையும் அதிகரித்துள்ளது. நாட்டில் நிலவி வரும் தண்ணீர் பற்றாக்குறையை சமாளிக்க, கடல் நீரை துாய்மைப்படுத்தும் நடவடிக்கைகளை மேற்கொள்ள வேண்டும்.

இயற்கையோடும், கலாசாரத்தோடும் சேர்ந்து உலக வெப்பமயமாதல், காலநிலை மாற்றம் உள்ளிட்ட, அனைத்து சவால்களையும் எதிர்கொள்ள தேவையான தொழில்நுட்பங்களை உருவாக்க வேண்டும். இது தொடர்பான ஆராய்ச்சிகளை மேற்கொள்ள வேண்டும்.

நம் நாடு, அறிவியல் துறையில் சிறந்து விளங்க, அதிகளவில் ஆராய்ச்சிகளை மேற்கொள்ள வேண்டும். கடல் சார்ந்த ஆராய்ச்சி, பாதுகாப்பு உள்ளிட்டவற்றில் முன்னேற்றம் அடைய, தேவையான நடவடிக்கைகளை எடுக்க வேண்டும்.இவ்வாறு, அவர் பேசினார்.

துணை முதல்வர் பன்னீர்செல்வம் பேசியதாவது:கடந்த, 1993ல், அப்போதைய முதல்வர் ஜெயலலிதாவால், இந்த கடல்சார் தொழில்நுட்ப நிறுவனம் துவங்கப்பட்டது.சிறப்பானதுசுனாமி உட்பட, இயற்கை சீற்ற காலங்களில், கடல் சார்ந்த ஆராய்ச்சியில், தேசிய கடல் தொழில்நுட்ப நிறுவனத்தின் பங்களிப்பு சிறப்பானதாக உள்ளது. இவ்வாறு, அவர் பேசினார்.

விழாவில், தமிழக கவர்னர் பன்வாரிலால் புரோஹித், மத்திய சுகாதாரத் துறை அமைச்சர் ஹர்ஷவர்தன், தமிழக வருவாய் துறை அமைச்சர் உதயகுமார் உட்பட, பலர் பங்கேற்றனர். பேரிடர் மேலாண்மை மற்றும் முன்னறிவிப்பு குறித்த நுாலும், தேசிய கடல்சார் தொழில்நுட்ப நிறுவனத்தின் தபால் கவரும் வெளியிடப்பட்டன.

தினமலர்