அரசியலுக்கான தடம் ; ரஜினி வியூகம்

சென்னை : ரஜினி நடிக்கும், புதிய படத்திற்கு, வியூகம் என, பெயர் சூட்ட முடிவாகி உள்ளது. வரும், 2021ம் ஆண்டு தமிழக சட்டசபை தேர்தல் வெற்றிக்கும், கூட்டணிக்கும், வியூகம் அமைக்கும் வகையில், கதைக்களம் அமைக்கப்படுவதாக, ரஜினிக்கு ஆதரவான வட்டாரங்கள் தெரிவிக்கின்றன.



மாநில மாநாடு



பொங்கல் பண்டிகைக்கு, ரஜினி நடித்த, தர்பார் படம் வெளியாகிறது. பின், ரஜினி நடிக்கும் புதிய படத்திற்கு, 'வியூகம்' என, பெயர் சூட்ட முடிவு செய்யப்பட்டு உள்ளது. கடந்த, 2021ம் ஆண்டு சட்டசபை தேர்தலுக்கு முன், புது கட்சியை துவக்க, ரஜினி தீர்மானித்துள்ளார். தமிழ் மக்களின் பாசத்திற்கும், தமிழக மண்ணின் பெருமைக்கும் முக்கியத்துவம் தரும் வகையில், வியூகம் படக்காட்சி அமைப்புகள் இடம்பெற உள்ளன.

இதுகுறித்து, ரஜினி மக்கள் மன்ற வட்டாரங்கள் கூறியதாவது: அடுத்த ஆண்டு, ஏப்ரல் அல்லது மே மாதத்தில், புது கட்சியின் பெயர், கொடி, சின்னத்தை அறிவிக்க, மாநில மாநாடு நடத்த, ரஜினி திட்டமிட்டு உள்ளார். கடந்த, 2021 சட்டசபை தேர்தல் வெற்றிக்கு, வியூகம் அமைக்கும் வகையில், இப்படத்தில், திராவிட கட்சிகளின் ஆட்சியை விமர்சிக்கும் காட்சிகள் இடம்பெற உள்ளன.

புதுக்கட்சி துவக்கிய பின், வெற்றிக்கூட்டணிக்கான, 'வியூகம்' வகுக்கவும், தனக்கு நெருக்கமான அரசியல் ஆய்வாளர்களுடன், ரஜினி ஆலோசனை நடத்தவும் திட்டமிட்டு உள்ளார். அதாவது, ரஜினிக்கு நெருக்கமான படத் தயாரிப்பாளர் ஒருவர், சமீபத்தில், பா.ம.க.,வை சேர்ந்த முக்கிய தலைவர் ஒருவரை சந்தித்தார். அப்போது, ரஜினி துவக்கவுள்ள கட்சியுடன் கூட்டணி சேர, அவர் அழைப்பு விடுத்து உள்ளார். அதேபோல், வேறு சில கட்சிகளிடம், கல்வி நிறுவனங்களின் தலைவர் ஒருவர், ரஜினி சார்பில் கூட்டணி பேச்சு நடத்தி வருகிறார்.

அ.தி.மு.க., வில் உள்ள இரண்டாம் கட்டத் தலைவர்கள் சிலரும், ரஜினி கட்சியில் இணைவதற்கு, ரஜினிக்கு நெருக்கமானவர்களிடம், துாது அனுப்பி உள்ளனர். மேலும், சட்டசபை தேர்தலுக்கு முன், ரஜினி தலைமையில், 'மெகா' கூட்டணி அமைப்பதற்கான பூர்வாங்க பணிகளில், காங்கிரஸ் கட்சியை சேர்ந்த சென்னை பிரமுகர் ஒருவரும், திரைமறைவில் ஈடுபட்டுள்ளார்.



உத்தரவாதம்


ஆந்திரா மாநிலத்தில், முதல்வர் ஜெகன் மோகன்ரெட்டி தலைமையில், ஐந்து துணை முதல்வர்கள் பணியாற்றுவது போல், கூட்டணி கட்சிகளுக்கு, ஜாதி அடிப்படையில், துணை முதல்வர் பதவிகளை வழங்க உத்தரவாதம் அளித்து, கூட்டணி அமைக்கும், 'வியூகம்' வகுக்கப்பட்டு வருகிறது. இவ்வாறு, மன்ற வட்டாரங்கள் கூறின.

- நமது நிருபர் -தினமலர்