காருக்கு, 30 மாதத்தில் 34 முறை, அரசு பணத்தில் டயர்கள் மாற்றம்

திருவனந்தபுரம்:

கேரள மின்துறை அமைச்சர் மாணி, தன் இன்னோவா
காருக்கு, 30 மாதங்களில், 34 முறை, அரசு பணத்தில்
டயர்களை மாற்றியுள்ளது, தெரிய வந்துள்ளது.

பரபரப்பு

கேரளாவில், முதல்வர் பினராயி விஜயன் தலைமையிலான, இடது ஜனநாயக முன்னணியின் ஆட்சி நடக்கிறது.மாநில மின்துறை அமைச்சராக இருப்பவர், இந்திய கம்யூனிஸ்ட் கட்சியின் மூத்த தலைவர், எம்.எம்.மாணி.இந்நிலையில், ஆர்வலர் ஒருவர், முதல்வர் மற்றும் அமைச்சர்கள், தங்கள் கார்களுக்கு, அரசு செலவில் டயர்கள் மாற்றிய விபரங்கள் பற்றி, ஆர்.டி.ஐ., எனப்படும், தகவல் அறியும் உரிமை சட்டத்தின் கீழ் கேட்டிருந்தார்.

இதற்கு, கேரள அரசு அளித்த பதிலில், மின்துறை அமைச்சர் மாணி, தன் இன்னோவா காருக்கு, 30 மாதங்களில், 34 முறை, அரசு பணத்தில் டயர்கள் மாற்றியிருப்பது தெரிய வந்துள்ளது. இது, கேரளாவில் பெரும் பரபரப்பை ஏற்படுத்தியுள்ளது.இது தொடர்பாக அளிக்கப்பட்டுள்ள புள்ளி விபரத்தில், மாணி, தன் காருக்கு, மாதத்துக்கு குறைந்தது ஒரு முறையாவது, டயர் மாற்றியுள்ளது தெரிய வந்துள்ளது.இதை எதிர்க்கட்சிகள் கடுமையாக விமர்சித்துள்ளன.

ரூ.3.5 லட்சம்

காங்., மூத்த தலைவர் ஒருவர் கூறியதாவது:கம்யூனிஸ்ட்கள், தாங்கள் மிகவும் எளிமையாக வாழ்பவர்கள் என, பெருமையுடன் கூறி கொள்கின்றனர்.ஆனால், அமைச்சர் மாணி, அரசு பணத்தில், சொகுசு வாழ்க்கை வாழ்ந்துள்ளார்,கார் டயர் ஒன்று, 10 ஆயிரம் ரூபாயிலிருந்து, 13 ஆயிரம் வரை விற்கப்படுகிறது, 30 மாதத்தில், கார் டயர்களுக்காக மட்டும், மாணி, 3.5 லட்சம் ரூபாய்க்கு மேல் செலவு செய்துள்ளார்.ஒரு புதிய டயரில், 40 ஆயிரம் கிலோ மீட்டர் துாரம் வரை பயணம் செய்ய முடியும். அப்படி இருக்கையில் மாதா மாதம் எப்படி டயர் வாங்க முடியும்.இவ்வாறு, அவர் கூறினார்.

1.24 லட்சம் கி.மீட்டர் பயணம்

கார் டயர்கள் மாற்றம் குறித்து, மின்துறை அமைச்சர் மாணி கூறியதாவது:என், இன்னோவா காருக்கு, 30 மாதங்களில், 34 டயர்கள் மாற்றப்பட்டது உண்மை தான். இன்னோவா காரின் டயரில், 20 ஆயிரம் கி.மீ., மட்டுமே பயணம் செய்ய முடியும். அதிலும் நான், மலைப்பகுதியில் தான் அதிகம் பயணம் செய்துள்ளேன். அதனால் தான், டயர்கள் மாற்றப்பட்டன. கடந்த, 30 மாதங்களில், இன்னோவா காரில், 1.24 லட்சம் கி.மீ., பயணித்துள்ளேன்.இவ்வாறு, மாணி கூறினார்.

தினமலர்