இசைக்கலைஞரின் சிதாரை உடைத்த ஏர் இந்தியா

மும்பை:
ஏர் இந்தியா ஊழியர்கள், தனது சிதார் இசைக்கருவியை
முரட்டுத்தனமாக கையாண்டு உடைத்துவிட்டதாக,
பிரபல இசைக்கலைஞர் ஷூபேந்திர ராவ் குற்றம்
சாட்டியுள்ளார்.

இது தொடர்பாக கர்நாடகாவை சேர்ந்த ஷூபேந்திர ராவ்
தனது பேஸ்புக் பதிவில் கூறியிருப்பதாவது:

மீண்டும் ஒரு முறை இது நிகழ்ந்துவிட்டது. என்னுடைய சிதார்
இசைக்கருவி மீண்டும் ஒரு முறை உடைக்கப்பட்டுள்ளது.
இம்முறை நம் ஏர் இந்தியாவின் கைங்கரியம். அமெரிக்காவின்
நியூயார்க் நகரில் நடக்கும் கச்சேரிக்காக வந்தேன்.

ஆனால், சிதார் உடைந்த நிலையில் இங்க வந்துள்ளேன்.
எப்படி ஒருவர் இவ்வளவு அலட்சியமாகவும்,
உணர்வற்றவர்களாகவும் இருக்க முடியும்? இசைக்கருவி,
நட்டநடுவில் பிளந்துள்ளது.

சிதார் இசைக்கருவி இவ்வாறாக உடைய வாய்ப்பு இல்லை.
பலரும் தங்களுடைய ஆலோசனைகளை எனக்கு வழங்கி
வருகின்றனர்.

ஆனால், ஏர் இந்தியா அதிகாரிகள், ஊயழியர்கள் இன்னும்
கொஞ்சம் கவனமுடன் இசைக்கருவி விவகாரத்தில் செயல்பட
வேண்டும். எப்போது இது நிறுத்தப்படும்.

இசைக்கச்சேரிக்கு செல்பவர்களின் கருவியை உடைத்து
விட்டால், அவர்கள் கதி என்ன ஆகும். இப்போது எல்லாம்
பயணம் முடிந்த பிறகு பயணம் எப்படி இருந்தது என,
என்னிடம் யாரும் கேட்பதில்லை. மாறாக சிதார் நன்றாக
வந்து சேர்ந்ததா என்றே கேட்கின்றனர்.


சிதார் இசைக்கருவிக்குள் ஏதேனும் உள்ளதா என்பதை
ஆராய அதனை சோதனையின் போது உடைக்கின்றனர்.
ஸ்கேன் முறை ஏதும் இல்லையா. விமான நிறுவனங்கள்
இன்னொரு முறை எந்த ஒரு இசைக்கருவியை உடைத்தாலும்
கடும் அபராதம் விதிக்க வேண்டும்''. இவ்வாறு அந்த பதிவில்
கூறியுள்ளார்.

மேலும், மத்திய விமான போக்குவரத்து அமைச்சரின்
பேஸ்புக் பக்கத்தையும் டேக் செய்துள்ள ஷூபேந்திரா ராவ்,
உடைந்த, சிதார் இசைக்கருவி படத்தையும் வெளியிட்டுள்ளார்.

விமான பயணத்தில் இசைக்கருவி உடைந்தது
ஷூபேந்திராவுக்கு இது முதல்முறை அல்ல. கடந்த நவம்பரில்
அவர் டில்லியில் இருந்து சிட்னிக்கு சென்ற போதும் உடைந்து
விட்டது.

தினமலர்