இருசாமியார்கள்

சுவாமி! தாங்கள் அணிந்திருக்கிற காவி உடையும், தலையில் காணப்படுகிற ஜடா முடியும் தாங்கள் இந்த உலக வாழ்க்கையைத் துறந்த சந்நியாசி என்பதை அடையாளம் காட்டுகின்றன!

தாங்களும் அப்படித்தானே?

ஆம் சுவாமி! நானும் ஒரு சந்நியாசிதான்! இருந்தாலும் உங்களிடம் ஒரு கேள்வி!

கேளுங்கள்!

ஒரு சந்நியாசி எப்படி இருக்க வேண்டும்?

இந்தக் கேள்விக்குப் பரமஹம்சரே பதில் சொல்லி இருக்கிறாரே!

எப்படி?

ஒரு கணவன், மனைவி! இருவரும் உலக வாழ்க்கையைத் துறந்து சந்நியாசம் ஏற்றுக் கொள்கிறார்கள். ஒரு பாதை வழியே நடந்து கொண்டிருக்கிறார்கள். வழியில் ஒரு வைரக்கல் கிடக்கிறது. கணவன் அதைப் பார்க்கிறான். இது மனைவியின் கண்ணில் பட்டால் ஒரு வேளை அவளுக்கு இதன் மீது ஆசை வந்து அவள் தன் ஆன்மீக பலத்தை இழந்துவிடுவாளோ என்று அஞ்சி உடனே அந்த வைரக் கல்லை மறைத்துக் கொள்கிறான். மனைவிக்குத் தெரியாமல் மண்ணில் புதைத்து விடலாம் என்று நினைத்து மண்ணைத் தோண்டுகிறான். அதற்குள் மனைவி அங்கு வந்து சேர்ந்து என்ன விஷயம் என்று விசாரிக்கிறாள். கணவன் மறைக்க முயல்கிறான். என்றாலும் அது அவள் கண்ணில் பட்டு விடுகிறது!

ஐயோ! அப்புறம்?

கணவன் என்ன நினைத்து அப்படி செய்கிறான் என்பதை புரிந்து கொண்டு, சுவாமி, வைரத்திற்கும் மண்ணாங் கட்டிக்கும் இன்னமும் கூட வித்தியாசம் தெரிவதாக இருந்தால்... அப்புறம் என்னத்துக்காக உலகத்தைத் துறந்து வந்தீர்கள்? என்று கேட்கிறாள்.

உண்மையான சந்நியாசிகளுக்கு உலக போகங்கள் யாவும் ஒன்று மில்லாதவையாகத் தோன்றும். அதை விளக்குவதற்காகத்தான் இந்தக் கதை!

நன்றி சுவாமி! கடைசியாக ஒரு கேள்வி!

கேளுங்கள்!

தாங்கள் ஏன் சந்நியாசியானீர்?

அது ஒரு ரகசியம்! கொஞ்சம் கிட்டே வாருங்கள் உங்களிடம் மட்டும் சொல்கிறேன். என் மாமனார் ஒருத்தர்.. தன்னுடைய மகளை என் தலையில் கட்ட நினைத்து அதற்கான ஏற்பாடுகளைத் தீவிரமாகச் செய்துகொண்டிருக்கிறார். இந்த இக்கட்டிலிருந்து தப்பிப்ப தற்காக இக்கோலத்தில் அலைந்து கொண்டிருக்கிறேன். தயவு செய்து இதை யாரிடமும் சொல்லிவிடாதீர்கள்!

சொல்லவேண்டிய அவசியம் இல்லை!

ஏன்?

நான் தான் உங்கள் மாமனார்!