ஹூஸ்டன் பல்கலையில் தமிழ் இருக்கை; ரூ.14 கோடி நிதி திரண்டது

**ayyasamy ram** · **ayyasamy ram** Sat Oct 05, 2019 8:33 am

ஹூஸ்டன்:
அமெரிக்காவில் உள்ள ஹூஸ்டன் பல்கலைக் கழகத்தில்,
தமிழ் மொழிக்கென தனியாக இருக்கை உருவாக்க,
தமிழர்கள் மேற்கொண்ட முயற்சியால், 14.17 கோடி ரூபாய்
நிதி திரட்டப்பட்டுள்ளது.

அமெரிக்காவில், 2.50 லட்சத்துக்கும் மேற்பட்ட தமிழர்கள்
வசிக்கின்றனர். உலகத் தமிழர்கள் அனைவரின் பங்களிப்பால்,
அமெரிக்காவின் ஹார்வார்டு பல்கலைக் கழகத்தில், தமிழ்
இருக்கை நிறுவப்பட்டது.

ஹூஸ்டன் பல்கலைக் கழகத்தில் தமிழ் இருக்கை நிறுவ,
ஹெச்.டி.எஸ்.சி., எனப்படும், ஹூஸ்டன் தமிழ் கல்வி இருக்கை
அமைப்பு முயன்று வருகிறது. கடந்த ஆண்டு துவக்கப்பட்ட
இந்த அமைப்பு, அரசு சாரா தொண்டு நிறுவனமாகும்.

ஹூஸ்டன் பல்கலைக் கழகத்தில் தமிழ் இருக்கை அமைக்க,
42 கோடி ரூபாய் தேவைப்படுகிறது. இதில், 21 கோடி ரூபாயை
அமெரிக்க அரசு வழங்கும்; மீதி தொகையை, தமிழர்கள் சார்பில்
வழங்கப்பட வேண்டும்.

ஹெச்.டி.எஸ்.சி., உறுப்பினர்கள் சொக்கலிங்கம் சாம் கண்ணப்பன்,
டாக்டர் எஸ்.ஜி.அப்பன், சொக்கலிங்கம் நாராயணன், பெருமாள்
அண்ணாமலை, நாகமாணிக்கம் கணேசன், துபில் வி.நரசிம்மன்,
டாக்டர் திருவேங்கடம் ஆறுமுகம் ஆகியோர் தலைமையில், தமிழ்
மொழிக்கென தனி இருக்கை அமைப்பதற்காக, நிதி திரட்டும்
பணிகள் மேற்கொள்ளப்பட்டன.

இதற்காக, கிரேட் ஹூஸ்டன், டெக்சாஸ் உள்ளிட்ட பல்வேறு
நகரங்களில், நிதி திரட்டும் பணிகள் நடந்தன. இதுவரையிலும்,
14.71 கோடி ரூபாய் நிதி திரட்டப்பட்டுள்ளது.
-

இது குறித்து, ஹெச்.டி.எஸ்.சி., அமைப்பின் தலைவர்
சாம் கண்ணப்பன் கூறியதாவது:

ஹெச்.டி.எஸ்.சி., அமைப்பு, செழுமை மிக்க தமிழ் கலாசாரம்,
தமிழ் மொழி, இலக்கியம் ஆகியவற்றை தமிழர்களிடம் மட்டுமின்றி,
அமெரிக்க மக்களிடமும் கொண்டு செல்ல. பல்வேறு பணிகளை
செய்து வருகிறது.

தமிழின் சிறப்பையும், தனித்துவமான கலாசாரத்தையும்,
நம் மாணவர்கள் கற்கவும், பல்வேறு விஷயங்களை அறியவும்,
இந்த தமிழ் இருக்கை அமைக்கப்பட உள்ளது.
இவ்வாறு அவர் கூறினார்.

-----------------------------------
தினமலர்