இந்திராணி முகர்ஜி, பீட்டர் முகர்ஜிக்கு விவாகரத்து வழங்கியது கோர்ட்

மும்பை
மகளை கொலை செய்த வழக்கில், சிறையில் அடைக்கப்பட்டுள்ள இந்திராணி - பீட்டர் முகர்ஜி தம்பதிக்கு, மும்பை நீதிமன்றம், நேற்று விவாகரத்து வழங்கியது.

மஹாராஷ்டிரா மாநிலம், மும்பையில், 2012ல், ஷீலா போரா, 24, என்ற பெண், மர்மமான முறையில் கொலை செய்யப்பட்டு கிடந்தார்.

இது பற்றி, சி.பி.ஐ., நடத்திய விசாரணையில், ஷீலா போராவை, அவரது தாய் இந்திராணியும், அவரது மூன்றாவது கணவரும், 'ஸ்டார் இந்தியா' நிறுவனத்தின் தலைமை செயல் அதிகாரியாக இருந்தவருமான பீட்டர் முகர்ஜியும் சேர்ந்து, கொலை செய்துள்ளது தெரிய வந்தது.

பீட்டர் முகர்ஜியும், இந்திராணியும், 2002ல் திருமணம் செய்து கொண்டனர். இந்திராணிக்கு, முதல் கணவர் மூலம் பிறந்தவர், ஷீலா போரா. இவர், பீட்டர் முகர்ஜியின் முதல் மனைவிக்கு பிறந்த மகனை காதலித்தார். இந்த தகாத உறவை துண்டிக்க, ஷீலா போரா மறுத்ததால், அவரை, தன் கணவர் பீட்டர் முகர்ஜி உதவியுடன், இந்திராணி கொலை செய்தது, விசாரணையில் தெரிய வந்தது.

இதையடுத்து, இருவரும் கைது செய்யப்பட்டனர். இந்திராணி, மும்பை பைகுலா சிறையிலும், பீட்டர் முகர்ஜி, மும்பை ஆர்தர் சாலை சிறையிலும் அடைக்கப்பட்டுள்ளனர்.

இதற்கிடையில், இந்திராணி, விவாகரத்து கேட்டு, கடந்த ஆண்டு, பீட்டர் முகர்ஜிக்கு, 'நோட்டீஸ்' அனுப்பினார். விவாகரத்து வழங்க, பீட்டர் முகர்ஜியும் சம்மதித்தார். இந்த வழக்கு, மும்பை குடும்ப நல நீதிமன்றத்தில் நடந்து வந்தது.

இந்நிலையில், இருவருக்கும் விவாகரத்து வழங்கி, நீதிமன்றம் நேற்று உத்தரவிட்டது. மேலும், சொத்துக்களும் இரு தரப்பு சம்மத்துடன் பிரித்துக் கொள்ளப்பட்டன.

தினமலர்