'வந்தே பாரத்' அதிவேக ரயில் சோதனை ஓட்டம் வெற்றி

புதுடில்லி :
டில்லியிலிருந்து, ஜம்மு அருகேயுள்ள, கட்ராவுக்கு
இயக்கப்படவுள்ள, அதி நவீன வசதிகள் அடங்கிய,
'வந்தே பாரத்' எக்ஸ்பிரஸ் ரயிலின் சோதனை ஓட்டம்,
நேற்று வெற்றிகரமாக நடந்தது.

இதையடுத்து, வரும், 5ம் தேதியிலிருந்து, இந்த
வழித்தடத்தில், 'வந்தே பாரத்' ரயில் சேவை துவங்கவுள்ளது.

-

-
சென்னையில் உள்ள ரயில் பெட்டி தயாரிப்பு தொழிற்
சாலையில், 'டிரெயின் - 18' எனப்படும், அதி நவீன வசதிகள்
அடங்கிய ரயில் பெட்டிகள் தயாரிக்கப்பட்டன.

குளிர்சாதன வசதி

இந்த ரயிலில், தனியாக இன்ஜின் இருக்காது; ரயில்
பெட்டியிலேயே, அதற்கான வசதிகள் இருக்கும். இந்த ரயில்,
அதிகபட்சமாக, 180 கி.மீ., வேகத்தில் செல்லக் கூடியது.

முழுமையான குளிர்சாதன வசதி, சுழலும் இருக்கைகள்,
'வை - பை' வசதி, தானியங்கி கதவுகள், சுற்றுச்சூழலுக்கு
மாசு ஏற்படுத்தாத கழிப்பறைகள், ஜி.பி.எஸ்., அடிப்படையில்
இயங்கும் தகவல் மையம், எல்.இ.டி., விளக்குகள் உள்ளிட்ட
பல்வேறு வசதிகள் இந்த ரயிலில் உள்ளன.

'வந்தே பாரத்' என பெயரிடப்பட்டுள்ள இந்த ரயில், முதல்
முறையாக, டில்லி - வாரணாசி இடையே, சில மாதங்களுக்கு
முன் இயக்கப்பட்டது. பிரதமர் மோடி, இந்த போக்குவரத்தை
துவக்கி வைத்தார்.

இந்நிலையில், டில்லியிலிருந்து, ஜம்மு - காஷ்மீரின் கட்ராவுக்கு,
இந்த ரயிலை இயக்குவதற்கான முயற்சிகள் மேற்
கொள்ளப்பட்டன.

முன்பதிவு

இதற்கான சோதனை ஓட்டம், நேற்று வெற்றிகரமாக நடந்தது.
மற்ற ரயில்கள், இந்த வழித்தடத்தை கடக்க, 12 மணி
நேரமாகும். வந்தே பாரத் ரயில், எட்டு மணி நேரத்தில், இந்த
வழித்தடத்தை கடக்கும்.

சோதனை ஓட்டம் வெற்றிகரமாக முடிந்ததை அடுத்து, அடுத்த
மாதம், 5ம் தேதியிலிருந்து, டில்லி - கட்ரா வழித்தடத்தில், இந்த
ரயிலை இயக்க முடிவு செய்யப்பட்டுள்ளது. இதற்கான டிக்கெட்
முன்பதிவும் துவங்கியுள்ளதாக, ரயில்வே வட்டாரங்கள்
தெரிவித்தன.

இது குறித்து, ரயில்வே அதிகாரிகள் கூறுகையில், 'இந்த ரயிலை,
அதிகபட்சமாக, 180 கி.மீ., வேகத்தில் இயக்க முடியும். 'ஆனாலும்,
தண்டவாளத்தின் வலிமை உள்ளிட்ட மற்ற விஷயங்களை
கணக்கில் வைத்து, 130 கி.மீ., வேகத்தில் இயக்க, அதிகாரிகள்
உத்தரவிட்டு உள்ளனர்' என்றனர்.
-
------------------------------------
தினமலர்