சுஷ்மாவின் இறுதி ஆசையை நிறைவேற்றிய மகள் பான்சூரி

-
புதுடில்லி:
மறைந்த, முன்னாள் வெளியுறவு அமைச்சர், சுஷ்மா சுவராஜின்
இறுதி ஆசையை, அவரது மகள் பான்சூரி நிறைவேற்றினார்.

பா.ஜ., மூத்த தலைவர்களில் ஒருவராக இருந்தவர்,
சுஷ்மா சுவராஜ். வெளியுறவு அமைச்சராக, 2014 - 19ம் ஆண்டு
வரை இருந்த சுஷ்மா, ஆகஸ்ட், 6ம் தேதி இறந்தார்.

இறப்பதற்கு சில மணி நேரத்திற்கு முன், சுஷ்மா, உச்ச நீதிமன்ற
மூத்த வழக்கறிஞர், ஹரீஷ் சால்வேயை தொலைபேசியில்
தொடர்பு கொண்டு பேசினார்.

அப்போது, பாகிஸ்தான் சிறையில் இருக்கும் இந்திய அதிகாரி
குல்பூஷன் ஜாதவ் வழக்கில், இந்தியாவுக்கு வெற்றி தேடி
தந்ததற்காக, சால்வேயை, சுஷ்மா பாராட்டினார்.

வழக்கில் வாதாடியதற்காக வழங்க வேண்டிய தொகை பற்றி
சுஷ்மா கேட்டதற்கு, 'எனக்கு ஒரு ரூபாய் மட்டும் கொடுங்கள்.
அது, எனக்கு விலை மதிக்க முடியாதது' என, ஹரீஷ் சால்வே
கூறினார்.

அதற்கு சுஷ்மாவும், என் வீட்டுக்கு நாளை வந்து வாங்கிக்
கொள்ளுங்கள்' என, பதில் அளித்தார்.

ஆனால், சில மணி நேரத்தில் சுஷ்மா இறந்து
விட்டதால், ஹரீஷ் சால்வேயால், அந்த ஒரு ரூபாயை பெற
முடியவில்லை.

'விலை மதிப்பில்லாத அந்த ஒரு ரூபாயை, சுஷ்மாவிடமிருந்து
என்னால் வாங்க முடியாமல் போனது, மிகவும் வருத்தமாக
உள்ளது' என, ஹரிஷ் சால்வே கண்ணீர் மல்க தெரிவித்திருந்தார்.

இந்நிலையில், வழக்கறிஞர், ஹரீஷ் சால்வேயை, நேற்று தன்
வீட்டுக்கு அழைத்த, சுஷ்மாவின் மகள் பான்சூரி, அவரிடம்,தன்
தாயின் கடைசி ஆசையை நிறைவேற்றும் வகையில், ஒரு
ரூபாய் கொடுத்தார். இதை பெற்றுக் கொண்டு ஹரீஷ் சால்வே
கூறுகையில், ''குல்பூஷன் ஜாதவ் வழக்கில், நான் வென்று விட்டால்,
எனக்கு விலைமதிக்க முடியாத ஊதியமாக, ஒரு ரூபாய் தருவதாக
என, சுஷ்மா தெரிவித்திருந்தார்

''நானும், பெற்றுக்கொள்வதாக கூறினேன். ஆனால், அவரிடம்
பெறமுடியவில்லை, இப்போது, அவரின் மகளிடம் பெற்றுக்
கொண்டேன்,'' என்றார்.

மூத்த வழக்கறிஞரான ஹரீஷ் சால்வே, ஒரு வழக்கிற்கு ஊதியமாக,
கோடிக்கணக்கில் பணம் வாங்குவார் என்பது குறிப்பிடத்தக்கது.
-
------------------------------
தினமலர்