அலை கடலோரம் கோவிலில் அமர்ந்த செந்தில் குமரனே!

-
கண்டேன் கருணை கடலை!
-
கண்டேன் உனை கருணைதெய்வமே கலியுக தெய்வமே
பரவசம் அடைந்தேன் அடிமையானேன் உன்னிடம்
உன் அழகிய வதனம் கண்டேன் அன்பு கொண்டேன்
கருணை ததும்பும் கண்களில் அருளை கண்டு ரசித்தேன்

சிவந்த நெற்றியில் திருநீறு பூசி நடுவில் வைத்துள்ள
ஜவ்வாது சந்தன பொட்டு காந்தம் போல் இழுக்க கண்டேன்
எனை அரவணைத்து ஆசிர்வதிக்க போகும் கரங்களை நோக்கி
ஆனந்த வெள்ளத்தில் மூழ்கி தத்தளித்து திண்டாடினேன்

பகலவன் ஒளியை குறைக்கும் அற்புதமான பிரகாசமான
வேலை கண்டேன் ஞானம் அருள்வாயே என வேண்டி கொண்டேன்
பரந்த மார்பினில் பலவித நறுமண மலர் மாலைகளை கண்டேன்
வாசனையினால் உள்ளம் குளிர்ந்து மகிழ்ந்து சந்தோஷமடைந்தேன்

மிருதுவான பொன்மலர் திருவடிகளை கண்டு மகிழ்ந்தேன்
அகத்தில் உன் மலர் பாதங்களை நிறுத்தி திருப்தி அடைந்தேன்
உன் வாகனம் வண்ண மயில் தோகை விரித்தாட கண்டேன்
மனம் உருகி நீ ஆடுவதாக நினைத்து அதில் லயித்து விட்டேன்

சேவல் தலை ஆட்டி வா என அழைப்பதாய் நினைத்து
பார்த்து ரசித்து எல்லையில்லா பரமானந்தம் அடைந்தேன்
இருபக்கமும் அன்னையர் இருவரும் ஒயிலாய் நின்று
அருள் புரியும் கண் கொள்ளா காட்சியில் உருகி நின்றேன்

உன் அழகிய புகழை படித்து படித்து இன்பம் அடைகிறேன்
உன் புகழ் எழுத செய்த உன் அருளை கண்டு வியந்தேன்
புகழை சொல்ல சொல்ல பேரானந்தம் அடைகிறேன்
நீயின்றி நானில்லை நீயிருக்க பயம் கவலை இல்லை

என புரிந்து கொண்டு வாழும் அடியேன் உன் பொன்
கமல மலர் திருவடிகளை எப்பொழுதும் நினைத்து
உனை பக்குவத்துடன் பூஜை செய்திட வேண்டுகிறேன்
அலை கடலோரம் கோவிலில் அமர்ந்த செந்தில் குமரனே!

ஓம் ஓம் ஓம் ஓம் ஓம் ஓம்
-
-------------------------
நன்றி
கணபதி - சுப்ரமணியம் அருள் வலைப்பூ