வேலைவாய்ப்பின்மை 3 ஆண்டுகள் இல்லாத அளவுக்கு அதிகரிப்பு

புதுடெல்லி:

இந்தியாவின் பொருளாதார நிலைமை மந்தமாக இருப்பதாக புள்ளி விவரங்கள் தெரிவிக்கின்றன.

மேலும் இந்தியாவின் உள்நாட்டு உற்பத்தி (ஜி.டி.பி.) 5 சதவீதமாக குறைந்து இருப்பதாக தகவல் வெளியிடப்பட்டுள்ளது.

இதற்கிடையே நாட்டின் வேலைவாய்ப்பின்மை 3 ஆண்டுகளில் இல்லாத அளவுக்கு உயர்ந்து இருப்பதாக இந்திய பொருளாதார கண்காணிப்பு மையம் தெரிவித்துள்ளது.

ஆகஸ்டு மாதத்தில் இதன் விகிதம் 8.4 சதவீதமாக அதிகரித்து இருப்பதாக கூறப்பட்டுள்ளது. அதாவது நகர்புறங்களில் 9.6 சதவீதமும், கிராமப்புறங்களில் 7.8 சதவீதமும் உள்ளதாக அதில் கூறப்பட்டுள்ளது.

2016-ல் எடுக்கப்பட்ட ஆய்வை ஒப்பிடும்போது, 2 சதவீதம் வரை வேலைவாய்ப்பின்மை அதிகரித்துள்ளது.

பிரதமர் மோடி

பிரதமர் நரேந்திர மோடி 2014 தேர்தல் அறிக்கையில் ஆண்டுக்கு 1 கோடி வேலை வாய்ப்புகளை உருவாக்குவோம் என்று கூறி இருந்தார்.

ஆனால், இப்போதைய ஆய்வு அறிக்கையின்படி பார்த்தால் இருக்கிற வேலையும் பறிபோய் இருப்பதை காட்டுகிறது.

இந்தியாவில் ஏற்பட்டுள்ள பொருளாதார வீழச்சிதான் வேலை வாய்ப்பின்மைக்கு முக்கிய காரணம் என்று பொருளாதார நிபுணர்கள் கூறுகின்றனர்.

இது சம்பந்தமாக நிதி ஆயோக் அமைப்பின் முன்னாள் துணைத்தலைவர் அரவிந்த் பனகாரியா கூறியதாவது:-

2017-18-ம் ஆண்டில் நடத்தப்பட்ட தொழிலாளர்கள் சக்தி தொடர்பான ஆய்வு அறிக்கையில் வேலைவாய்ப்பின்மை 6.1 ஆக இருந்தது. சர்வதேச அளவில் பல நாடுகளில்கூட 6.1 சதவீதம் வேலைவாய்ப்பின்மை நிலவுகிறது. அது, இயற்கையானதுதான்.

ஆனால், இப்போது கடந்த ஆய்வை ஒப்பிடும்போது வேலைவாய்ப்பின்மை அதிகரித்து இருப்பது பிரச்சினைக்குரியது.

இந்தியாவில் அதிக தொழிலாளர் சக்தி உள்ளது. ஆனாலும், உற்பத்தி திறன் குறைவாக உள்ளது. குறைந்த சம்பளம் தான் அவர்களுக்கு வழங்கப்படுகிறது.

இதில் முன்னேற்றம் ஏற்பட்டு இருந்தாலும் போதிய அளவுக்கு இல்லை. அதை இன்னும் மேம்படுத்த வேண்டும்.

தேவை குறைந்தது, முதலீடு வீழ்ச்சி, கட்டுமான பொருட்களுக்கு ஜி.எஸ்.டி.யால் விலை உயர்வு போன்றவையும் பாதிப்பை ஏற்படுத்தும்.

இதில், அரசு விரைந்து நடவடிக்கை எடுக்கவில்லை என்றால் இதன் காரணமாகவும் வேலைவாய்ப்பின்மை அதிகரிக்கும்.

இவ்வாறு அவர் கூறினார்.

பிரதமரின் பொருளாதார ஆலோசனை குழு முன்னாள் உறுப்பினர் கோவிந்தராவ் கூறும்போது, நுகர்வு குறைந்தது, முதலீடு குறைந்தது போன்ற காரணங்களால் வருகிற மாதங்களில் இன்னும் வேலைவாய்ப்பின்மை அதிகரிக்கும்.

ஜி.எஸ்.டி. வரி, சிமெண்டு உள்ளிட்ட கட்டுமான பொருட்களில் விலை அதிகரித்துள்ளது. இதன் காரணமாக அமைப்புசாரா மற்றும் அமைப்பு சார்ந்த தொழில்களிலும் பாதிப்பு ஏற்பட்டு வேலைவாய்ப்பின்மை அதிகரிக்கலாம்.

வாகன தொழிலில் 2 லட்சத்து 15 ஆயிரம் பேர் வேலை வாய்ப்பை இழந்து இருக்கிறார்கள். இது போன்ற பல தொழில்களிலும் பாதிப்பு ஏற்படலாம் என்று கூறினார்.

ஏற்கனவே 2018 நிதி ஆண்டில் வெளியிடப்பட்ட ஆய்வு
அறிக்கையில் 6.1 சதவீத வேலை வாய்ப்பின்மை என்பது
கடந்த 45 ஆண்டுகளில் இல்லாத நிலையை எட்டி இருப்பதாக
கூறப்பட்டது.

அது, இப்போது 8 சதவீதமாக அதிகரித்து இருப்பது மோசமாக
இருப்பதை சுட்டிக்காட்டுகிறது.

தேசிய மாதிரி கணக்கெடுப்பு மையம் குறிப்பிட்ட காலத்துக்கு
ஒரு தடவை வேலைவாய்ப்பின்மை தொடர்பான ஆய்வறிக்கையை வெளியிடும். அந்த அறிக்கையை இன்னும் வெளியிடாமல்
தாமதப்படுத்தி வருவது குறிப்பிடத்தக்கது.
-
மாலைமலர்