கை தட்டினால் கிடைக்கும் பலன்

கை தட்டுவது, உலகம் முழுவதும் உள்ள ஒரு நல்ல பழக்கம். பொது நிகழ்ச்சிகளில், நம் மகிழ்ச்சியை காட்ட, கை தட்டுகிறோம்.
வட மாநிலத்தை சேர்ந்த, கிருஷ்ண சந்தர் பஜாஜ், வயது, 52. அவரின் இரு கண்களும், 'குளுகோமா' என்னும் நீர் அழுத்த நோயால் பாதிக்கப்பட்டு, கண் பார்வையை இழந்தார். அவருக்கு, அறுவை சிகிச்சை செய்து கொள்ளும் தைரியம் இல்லை.
எனவே, யோகி ஒருவர் கூறியதை அடுத்து, தினமும் விடியற்காலையில் எழுந்து, அரை மணி நேரம், கை தட்டும் பயிற்சியை செய்து, இழந்த பார்வையை மீண்டும் பெற்றுள்ளார்.
இவரின், இந்த புதிய பயிற்சி, '1997 லிம்கா உலக சாதனை' புத்தகத்தில் இடம்பெற்றுள்ளது. மேலும், கை தட்டும் முறை, உலக சுகாதார நிறுவனத்தால், சிறந்த பயிற்சியாக அங்கீகரிக்கப்பட்டுள்ளது.
விடியற்காலையில், கால்களில், 'சாக்ஸ்' அல்லது தோல் செருப்பு அணிந்து, கைகளில் சிறிதளவு தேங்காய் எண்ணெய் தடவி, ஒரு விரிப்பின் மேல் நின்று, கைகளை நெஞ்சுக்கு நேராக நீட்டிக் கொள்ள வேண்டும்.
ஒரு கை மீது, இன்னொரு கையின் உள்புறம் பொருந்துமாறு தட்ட வேண்டும். ஒரு நிமிடத்திற்கு, 60 முதல், 100 முறை தட்டலாம்.
தினமும், 20 நிமிடங்கள் தொடர்ந்து தட்ட வேண்டும். சில நொடிகள் ஓய்வு எடுத்துக் கொள்ளலாம். கை தட்டும் ஒலி, அதிகமாக கேட்க வேண்டும் என்று அவசியமில்லை. இப்பயிற்சிக்கு வயது வரம்பு இல்லை.
கை தட்டும்போது ஏற்படும் உஷ்ணம், உடல் முழுதும் சீராக பரவும். அந்த உஷ்ணம் வெளியில் போகாமல் இருப்பதற்காகவே, 'சாக்ஸ்' அல்லது தோல் செருப்பு அணிகிறோம்.
கை தட்டுவதில் சலிப்பு ஏற்படாமல் இருக்க, சில உத்திகளை கையாளலாம்.
தரையில் மண்டியிட்டு, முதலில் தெற்கு திசை நோக்கி, அத்திசையின் தேவதையை வணங்கி, எழுந்து நிற்க வேண்டும். பின், முழங்கை மடங்காமல், நெஞ்சுக்கு நேராக நீட்டி, கை தட்ட வேண்டும்.
சில நிமிடங்களுக்கு பின், தலைக்கு மேல் கைகளை உயர்த்தியும், பிறகு, கைகளை தொடைக்கு நேராக நீட்டியபடியும் கை தட்டலாம்.
பின், கைகளை முன்னும் பின்னும் வீசி, ஓய்வு எடுத்துக் கொள்ளலாம்.
இவ்வாறு, மேற்கு, வடக்கு, கிழக்கு திசைகளை நோக்கி, அந்தந்த திசை தேவதைகளை வணங்கி, மண்டியிட்டு இப்பயிற்சியை செய்யலாம்.
கைகளை தட்டும்போது, வலது கை, மேல் புறம் இருக்க வேண்டும். இடக்கை மேல் புறம் அமையுமாறு தட்டக் கூடாது.
கண்களை மூடி, கை தட்டும்போது, காலிலிருந்து தலை வரை, உடல் முழுவதும் அதிர்வு ஏற்படும்.
இந்த அதிர்வுகள், ரத்தக் குழாய்களில் உள்ள அடைப்புகளை நீக்கும். இதனால், தங்கு தடையின்றி ரத்தம் எல்லா பகுதிகளுக்கும் நன்கு ஓடும். ரத்தக் குழாய்களில் ஏற்பட்டுள்ள கொழுப்பு அடைப்புகளும் நீங்கும்.
நம் உடல் உறுப்புகளின் எல்லா நரம்புகளும், கைகளில் முடிவடைகின்றன. கை தட்டுவதால் ஏற்படும் இந்த அதிர்வுகள், நரம்பு மண்டலத்தில் உள்ள தேவையற்ற முடிச்சுகளை நீக்கும். நரம்பு மண்டலம் சீராகும். ரத்த ஓட்ட மண்டலமும், நரம்பு மண்டலமும் சீரானால், 90 சதவீத வியாதிகளுக்கு, விடை கொடுத்து விடலாம்.
கை தட்டும் பயிற்சியை ஒரு தியான பயிற்சி என்றே கூறலாம். இப்பயிற்சியால் சுவாசம் ஒழுங்குபடுகிறது, மனம் அமைதி அடைகிறது, மலச்சிக்கல் மற்றும் கழுத்து வலி நீங்குகிறது.
- இவ்வாறு கூறி முடித்தார், தியான பயிற்சியாள நண்பர்.
காசா, பணமா, நாளை காலை முதல், இப்பயிற்சியை மேற்கொள்வது என்று நினைத்துக் கொண்டேன்.

நாமும் தொடங்கவேண்டும்
நல்லது என்றாலும் காசு பணம் செலவழிக்கவேண்டாமே.
கையால், கைமேல் பலன்.

ரமணியன்