சதுர்த்தி விழாவால் களைகட்டும் பிள்ளையார்பட்டி

-
சிவகங்கையிலிருந்து 45 கிலோ மீட்டர் தொலைவில் உள்ளது பிள்ளையார்பட்டி. இங்கு பழமையான கற்பக விநாயகர் கோயில் உள்ளது. மூலவராக கற்பக விநாயகர் உள்ளார். இங்கு உமாதேவி சமேத சந்திரசேகரர், சிவகாமசுந்தரி சமேத நடராஜர், சண்டிகேஸ்வரர் சிலைகள் உள்ளன. தல விருட்சமாக மருதமரம் உள்ளது. கோயிலில் கொடிமரம் உள்ளது.

தல வரலாறு

ஆயிரத்து 600 ஆண்டு பழமையான இந்த கோயில், மகேந்திர பல்லவர் காலத்தில் கட்டப்பட்டது. தற்போது குறிப்பிட்ட சமூகத்தினரால் நிர்வகிக்கப்படுகிறது.

முருகப்பெருமானுக்கு 6 படை வீடு இருப்பது போன்று, விநாயகருக்கும் 6 படை வீடுகள் உள்ளன. இந்த தலத்தில் உள்ள கற்பக விநாயகர் கோயில் ஐந்தாவது படை வீடாக உள்ளது.

இங்குள்ள விநாயகர் சன்னதி குடைவரை கோயிலாகும். விநாயகர் சதுர்த்தியன்று 18படி அளவில் முக்குறுணி அரிசியால் செய்த ராட்சத கொழுக்கட்டை நைவேத்தியம் செய்யப்படுகிறது. இவை கோயிலின் சிறப்புகளாகும்.

*****

திருமணத்தடை நீக்க வேண்டியும், குழந்தை பாக்கியம் வேண்டியும், கல்வியில் சிறந்து விளங்க வேண்டியும் மூலவரை பக்தர்கள் வணங்குகின்றனர். வேண்டுதல் நிறைவேறியவர்கள் மூலவருக்கு அபிஷேகம் செய்தும், வஸ்திரம் அணிவித்தும் நேர்த்திக்கடன் செலுத்துகின்றனர்.

கோயில் நடை தினமும் காலை 6 மணி முதல் 12 மணி வரையிலும், மாலை 4 மணி முதல் இரவு 8 மணி வரையிலும் திறந்திருக்கிறது. இங்கு வருடந்தோறும் விநாயகர் சதுர்த்தியை முன்னிட்டு 10 நாள் திருவிழா நடக்கிறது. இந்தாண்டு திருவிழா வரும் செப்.2ல் கொண்டாடப்படுகிறது.

இதையொட்டி கடந்த 24ம் தேதி காலை 10.40 மணிக்கு கொடியேற்றத்துடன் விழா துவங்கியது. முன்னதாக விநாயகருக்கும், அங்குசத்தேவருக்கும் சிறப்பு அபிஷேகங்கள் மற்றும் பூஜைகள் நடந்தன. விழாவையொட்டி உற்சவ விநாயகர் வெள்ளி மூஷிக வாகனத்தில் எழுந்தருளி அருள்பாலித்தார்.

தொடர்ந்து அன்றிரவு மூஷிக வாகனத்தில் கற்பக விநாயகர் எழுந்தருளி திருவீதி உலா நடந்தது. விழாவை முன்னிட்டு தினமும் காலையில் வெள்ளி கேடயத்திலும், இரவு சிம்ம வாகனம், பூத வாகனம் உள்ளிட்ட வாகனங்களில் உற்சவர் வீதி உலா வருகிறார்.

9ம் நாள் விழாவாக வரும் செப்.1ம் தேதி காலையில் உற்சவர் திருத்தேரில் எழுந்தருளும் நிகழ்ச்சி நடைபெறும். மாலை 4.30 மணி முதல் இரவு 10 மணி வரை சிறப்பு சந்தனக்காப்பு அலங்காரத்தில் பக்தர்களுக்கு கற்பக விநாயகர் அருள் பாலிப்பார். மாலை 4 மணியவில் பக்தர்கள் வடம் பிடித்து இழுக்க தேரோட்டம் நடக்கிறது.

அன்றிரவு யானை வாகனத்தில் எழுந்தருளி உற்சவர் வீதிஉலா வருவார். மறுநாள் காலை கோயில் குளத்தில் தீர்த்தவாரி உற்சவம் நடைபெறும். மதியம் உச்சிகால பூஜை நடக்கும். அன்றிரவு பஞ்சமூர்த்திகள் திருவீதிஉலா நடைபெறும்.
-
தினகரன்