ஆவினில் ரூ.9 -க்கு மினி பாக்கெட் பால்: நாளை முதல் விற்பனை

தமிழகம் முழுவதும் ஆவின் பால் விலை உயர்த்தப்பட்டுள்ள
நிலையில், வேலூர் ஆவின் நிறுவனம் 167 மில்லி லிட்டர்
கொண்ட மினி பால் பாக்கெட்டை ரூ. 9-க்கு அறிமுகம்
செய்துள்ளது.

வேலூர், திருவண்ணாமலை மாவட்டப் பால் உற்பத்தியாளர்கள்
கூட்டுறவு ஒன்றியமான ஆவின் தலைமை அலுவலகம் வேலூர்
சத்துவாச்சாரியில் செயல்பட்டு வருகிறது.

இங்கு தினந்தோறும் இரண்டு மாவட்டப் பால்
உற்பத்தியாளர்களிடமிருந்தும் சுமார் 5 லட்சம் லிட்டர் பால்
கொள்முதல் செய்யப்பட்டு, 2 லட்சம் லிட்டர் பால் சென்னைக்கு
அனுப்பப்படுகின்றன.  

மீதமுள்ள பாலில் 72 ஆயிரம் லிட்டர் பால் பாக்கெட்டுகளை
பொதுமக்கள் விற்பனைக்காகவும், நெய், பால்கோவா, மோர்,
லஸ்ஸி, குல்ஃபி உள்ளிட்ட பால் உப பொருள்களாகவும்
தயாரிக்கப்படுகின்றன.

இந்நிலையில், ஆவின் பால் கொள்முதல் விலையை லிட்டருக்கு
4 ரூபாயும், விற்பனை விலையை லிட்டருக்கு 6 ரூபாய் வீதமும்
தமிழக அரசு அண்மையில் உயர்த்தியது. பால் விலையேற்றத்துக்கு
பல்வேறு தரப்பினரிடையே எதிர்ப்புக் கிளம்பியதுடன், இந்த
விலையேற்றத்தால் ஏழை, நடுத்தர மக்கள்  பாதிக்கப்படுவர்
என்றும் குற்றஞ்சாட்டப்பட்டது.

இதையடுத்து, ஏழை, நடுத்தர மக்களின் நலனைக் கருத்தில்
கொண்டு வேலூர் ஆவின் நிறுவனம் 167 மி.லி கொண்ட மினி
பால் பாக்கெட்டை 9 ரூபாய்க்கு அறிமுகம் செய்துள்ளது.

இந்த புதிய பாக்கெட் பால் ஞாயிற்றுக்கிழமை முதல் பொது
மக்களுக்காக விற்பனை செய்யப்பட உள்ளதாவும் அதிகாரிகள்
தெரிவித்துள்ளனர்.  இதுகுறித்து அவர்கள் மேலும் கூறுகையில்,
ஆவின் பால் விலை ஏற்றத்தால் ரூ. 9-க்கு மினி பால் பாக்கெட்
அறிமுகம் செய்துள்ளோம். இந்த பாக்கெட் பாலில்
முழுக்கொழுப்புச் சத்தும் நிறைந்துள்ளது.

தனியார் நிறுவனங்கள் 165 மில்லி லிட்டர் பால் பாக்கெட்டை
ரூ.10-க்கு விற்பனை செய்யும் நிலையில், அவர்களைவிட ஆவினில்
2 மில்லி அதிகமாகவும், ஒரு ரூபாய் விலை குறைவாகவும் அறிமுகம்
செய்யப்பட்டுள்ளது. இந்த மினி பாக்கெட் பால் ஞாயிற்றுக்கிழமை
முதல் வேலூர், திருவண்ணாமலை மாவட்டங்களில் விற்பனை
செய்யப்படும் என்றனர்.
-
----------------------------------------------
தினமணி