பயிற்சியின்போது வெடித்துச் சிதறிய பீரங்கி: விசாரணைக்கு ராணுவம் உத்தரவு

ராஜஸ்தான் மாநிலம் பொக்ரானில் இந்திய ராணுவ வீரர்கள்
பீரங்கிகளை வைத்து போர்ப் பயிற்சி மேற்கொண்டபோது,
டி-90 பீரங்கியின் குழாய்ப் பகுதி வெடித்துச் சிதறியது.

இது தொடர்பாக விசாரணைக்கு உத்தரவிடப்பட்டுள்ளதாக
ராணுவம் தரப்பில் தெரிவிக்கப்பட்டுள்ளது.

இது தொடர்பாக ராணுவ செய்தித் தொடர்பாளர் கர்னல்
சோம்பித் கோஷ் செய்தியாளர்களிடம் கூறியதாவது:

ராஜஸ்தானின் ஜெய்சால்மர் மாவட்டம் பொக்ரானில் உள்ள
ராணுவப் பயிற்சி மையத்தில் புதன்கிழமை, டி-90 ரக
பீரங்கிகளை வைத்து ராணுவ வீரர்கள் பயிற்சி மேற்
கொண்டிருந்தனர்.

அப்போது, ஒரு பீரங்கியின் குழாய்ப் பகுதி திடீரென பலத்த
ஓசையுடன் வெடித்துச் சிதறியது. அதிருஷ்டவசமாக இந்த
சம்பவத்தில் யாருக்கும் காயம் ஏற்படவில்லை. எனினும்,
அந்த பீரங்கி பலத்த சேதமடைந்தது. பீரங்கி வெடித்துச்
சிதறியதற்குக் காரணம் என்ன என்பது உடனடியாகத்
தெரியவரவில்லை.

இது தொடர்பாக ராணுவ நீதிமன்றம் மூலம் விசாரிக்க
உத்தரவிடப்பட்டுள்ளது என்றார்.

டி-90 அதிநவீன தாக்குதல் ரக பீரங்கியாகும். இது ரஷியாவிடம்
இருந்து வாங்கப்பட்டது. 2001-ஆம் ஆண்டு ரஷியாவிடம் இருந்து
முதல்முறையாக டி-90 பீரங்கிகளை இந்தியா வாங்கியது.

தற்போது இந்திய ராணுவத்திடம் சுமார் 1,500-க்கும் அதிகமான
டி-90 பீரங்கிகள் உள்ளன. 2020-ஆம் ஆண்டு வரை இந்த பீரங்கிகளை
வாங்க ரஷியாவுடன் ஒப்பந்தம் மேற்கொள்ளப்பட்டுள்ளது.

இதற்கு முந்தைய ரக பீரங்கிகளுடன் ஒப்பிடும்போது,
டி-90 தயாரிப்பு செலவு குறைவு; மேலும் தானே இயங்கும் திறனுடையது
என்பதால், போர் வியூக வகுப்பாளர்களால் பெரிதும் விரும்பப்படும்
பீரங்கி ரகமாக இது உள்ளது.

சிரியாவில் நடைபெற்று வரும் உள்நாட்டுப் போரில் 2016-ஆம்
ஆண்டு ஐஎஸ் பயங்கரவாதிகளை முறியடிக்க டி-90 பீரங்கிகளைத்தான்
ரஷியா அதிகம் பயன்படுத்தியது.

ராக்கெட் தாக்குதலை எதிர்கொண்ட போதிலும் இந்த பீரங்கி
போர்க்களத்தில் தொடர்ந்து முன்னேறிச் செல்லும் திறனுடையது.
-
------------------------------------
தினமணி