மைக்ரோ கதை

**ayyasamy ram** · **ayyasamy ram** Thu Sep 05, 2019 6:13 pm

பத்துநாட்களுக்கு முன்பு துபாயில் இருக்கும்
மகனிடமிருந்து ரங்கநாதனுக்கு போன்.

""அப்பா... எங்கள் கம்பெனியிலே பிரச்னை. இன்னும்
சம்பளம் போடலை. இந்த மாதம் பணம் அனுப்ப முடியாது.
அடுத்த மாதம் சேர்த்து அனுப்புறேன்'' என்றான்.

ரங்கநாதனுக்குக் கையும் ஓடவில்லை. காலும் ஓடவில்லை.
இந்த மாதச் செலவுக்கு என்ன செய்யலாம் என்று யோசித்த
ரங்கநாதன், தன் மனைவி மீனாட்சியிடம் வளையல்களை
அடகு வைக்கக் கேட்டார். மீனாட்சியோ மறுத்துவிட்டாள்.

வேறு வழியில்லாமல் எதிர்வீட்டு சண்முகத்திடம் வட்டிக்கு
கடன் வாங்கினார்.

கடன் வாங்கிய மறுநாள், காலையில் பால் வாங்க ரங்கநாதன்
வீட்டை விட்டு வெளியே வந்தபோது, அவரைக் கைதட்டிக்
கூப்பிட்டான் சண்முகம்.

இதை சன்னல் வழியாகப் பார்த்த மீனாட்சி திடுக்கிட்டாள்.
ரங்கநாதனிடம் பால் பாக்கெட் வாங்கி வரச் சொல்லி
சண்முகம் காசு கொடுப்பதைப் பார்த்தாள் மீனாட்சி.

பால் வாங்கி திரும்ப வீட்டுக்கு வந்த ரங்கநாதனிடம், தன் இரு
வளையல்களையும் கழற்றிக் கொடுத்தாள் மீனாட்சி அடகு
வைக்க.

""அவன்ட்ட வாங்கின கடனை திருப்பி அவன் மூஞ்சியில்
அடிங்க. வயசுக்கு மூத்த உங்களை கைதட்டி மரியாதை
இல்லாமக் கூப்புடுறான்'' என்றாள் கோபமாக.
-
--------------------------------

சி.ஸ்ரீரங்கம், திருச்சி -13.
தினமணி கதிர்