தவித்த இந்தியர்களுக்கு உதவிய பாக்., ஆசிரியர்

by **ayyasamy ram** Tue Aug 27, 2019 6:15 am

துபாய் :
ஐக்கிய அரபு எமிரேட்சில் ஏஜென்டால் ஏமாற்றப்பட்டு
ஆதரவற்று தவித்த ஒரு தமிழர் உள்ளிட்ட இரண்டு
இந்தியர்களுக்கு பாகிஸ்தானைச் சேர்ந்த ஆசிரியர் மனித
நேயத்துடன் உதவியது ஆச்சரியத்தை ஏற்படுத்தி உள்ளது.

தமிழகத்தைச் சேர்ந்தவர் சிவகுமார். கேரளாவைச்
சேர்ந்தவர் முகமது உஸ்மான். இவர்கள் இருவரும் சில
மாதங்களுக்கு முன் இந்தியாவைச் சேர்ந்த ஒரு ஏஜென்ட்
மூலம் வெளிநாட்டு வேலைக்கு செல்ல முயற்சித்தனர்.

அவர்களிடம் தலா 7 லட்சம் ரூபாய் வாங்கிய அந்த ஏஜென்ட்
ஆஸ்திரேலியாவுக்கு அனுப்பி வைப்பதாக கூறி
தாய்லாந்துக்கு அனுப்பி வைத்தார். தாய்லாந்து சென்றதும்
ஆஸ்திரேலிய 'விசா' தரப்படும் என்றும் தெரிவித்திருந்தார்.

ஆனால் விசா எதுவும் கிடைக்காததால் விமான
நிலையத்திலேயே காத்திருந்த அவர்கள் மீண்டும் இந்தியா
திரும்பினர். அதன் பின் அவர்களை ஐக்கிய அரபு எமிரேட்ஸ்
வழியாக ஆஸ்திரேலியாவுக்கு அனுப்பி வைப்பதாக அந்த
ஏஜென்ட் கூறினார்.

ஐக்கிய அரபு எமிரேட்சுக்கு வந்த அவர்கள் நிராதரவாக
தவித்தனர். அஞ்சமன் என்ற இடத்தில் பல நாட்களாக
காத்திருந்தும் ஆஸ்திரேலிய விசா அவர்களுக்கு
கிடைக்கவில்லை.

பிறகு தான் ஏஜென்டால் தாங்கள் ஏமாற்றப்பட்டது அவர்களுக்கு
தெரிய வந்தது. கடந்த நான்கு மாதங்களாக பாகிஸ்தான்
நாட்டைச் சேர்ந்த முகமது அசதுல்லா என்பவருக்கு சொந்தமான
இடத்தில் அவர்கள் தங்கியிருந்தனர்.

அவர்களது பரிதாப நிலையை அறிந்த அசதுல்லா இலவசமாக
உணவும் அளித்தார்.

இதைத் தொடர்ந்து அங்குள்ள இந்தியர்களிடம் பேசி சிவகுமார்
மற்றும் முகமது உஸ்மான் ஆகிய இருவரையும் இந்தியாவுக்கு
திருப்பி அனுப்ப உதவும்படி கோரிக்கை விடுத்தார்.

ஐக்கிய அரபு எமிரேட்சில் சட்டவிரோதமாக வசிப்பது குற்றம்
என்பதால் இருவரையும் விரைவிலேயே திருப்பி அனுப்ப
உள்ளதாக அசதுல்லா தெரிவித்தார். அசதுல்லா மத கல்வி
போதிக்கும் ஆசிரியராக பணியாற்றி வருகிறார்.
-
-------------------------------------
தினமலர்