கழுகு 2 – விமர்சனம்

-
கிருஷ்ணா, காளி வெங்கட் இருவரும் அநாதைகள். சின்னச்சின்ன திருட்டுகள் செய்து ஜாலியாக பொழுதுபோக்குகின்றனர். திருட்டு வழக்கு ஒன்றில் கைதாகும் அவர்கள் மீது, வெடிகுண்டு தயாரிப்புக்கு உதவிய வழக்கு பாய்கிறது. இதையடுத்து போலீஸ் காவலில் இருந்து ஆளுக்கொரு போலீஸ் துப்பாக்கியுடன் தப்பித்துவிடுகின்றனர். அவர்களை மடக்கி காட்டுக்குள் அழைத்து செல்கிறார், காட்டு கங்காணி எம்.எஸ்.பாஸ்கர்.

காட்டுக்குள் செந்நாய்களின் தொல்லை அதிகமாக இருப்பதால், பாதுகாப்புக்கு வேட்டைக்காரர்களை எம்.எஸ்.பாஸ்கர் தேடி வந்த இடத்தில்தான் அவர்கள் சிக்குகின்றனர். எனவே, தற்போதைய சூழ்நிலைக்கு மறைந்து வாழ இடம் தேவை என்பதால், எம்.எஸ்.பாஸ்கருடன் அங்கு ஐக்கியமாகி விடுகின்றனர். பிறகு எம்.எஸ்.பாஸ்கரின் மகள் பிந்து மாதவியை காதலிக்கிறார், கிருஷ்ணா. துப்பாக்கியால் சுட தெரியாத அவர்கள், செந்நாய் கூட்டத்தை எப்படி சமாளிக்கின்றனர்? கிருஷ்ணா, பிந்து மாதவி காதல் நிறைவேறியதா என்பது கிளைமாக்ஸ்.

கிருஷ்ணாவின் நடிப்பில் நல்லதொரு முன்னேற்றம். பிந்து மாதவி காதலிப்பதை பயத்துடன் ஏற்பது, செந்நாய்களுக்கு பயந்து ஓடுவது, காளி வெங்கட்டுடன் காமெடி செய்வது என்று, தனது பங்கை சிறப்பாக செய்துள்ளார். பிந்து மாதவியும் நடிப்பில் குறை வைக்கவில்லை. ஆனால், காட்டு வேலைக்கு செல்லும் பெண்களிடம் இருக்கும் துணிச்சலும், துறுதுறுப்பும் மிஸ்சிங்.

ஹரிஸ் பெரடி, எம்.எஸ்.பாஸ்கர் இருவரும் தங்கள் கேரக்டரை கச்சிதமாக செய்துள்ளனர். ஒரு குத்துப்பாட்டுக்கு ஆடிவிட்டு செல்கிறார், யாஷிகா ஆனந்த். அடர்ந்த காட்டின் அழகை அற்புதமாக பதிவு செய்துள்ளார், ராஜா பட்டாச்சார்யா. வானத்தில் தொடங்கி, காட்டுக்கு உள்ளே நுழைந்து, சிறிய பாதையில் வருகின்ற ஜீப்பில் முடியும் முதல் ஷாட்டில் இருந்தே தொடங்கிவிடுகிறது விஷுவல் ட்ரீட்.

யுவன்சங்கர்ராஜாவின் பின்னணி இசை படத்துக்கு பலம். ‘சகலகலாவல்லி’யும், ‘ஏலமலகாடு’ம் நேயர் விருப்பமாக மாறும். திருடர்கள் திடீர் வேட்டைக்காரர்களாக மாறுவது, செந்நாய் தொல்லை தருவது, திருட்டுத்தனமாக மரம் வெட்டுதல் என்று புதிய களத்தில் கதை தொடங்கும்போது, நிமிர்ந்து உட்கார வைக்கிறது படம். பிறகு காதல் காட்சிகளாக நகர்ந்து, முதுமக்கள்தாழி, தங்கப்புதையல், ெதாடர்ச்சியாக நடக்கும் கொலைகள் என்று, திசை மாறி பறக்கிறது கழுகு-2.

தினகரன்