ரூ.3,000 கோடி கட்டண பாக்கியை வசூலிக்க முடியாமல் தவிக்கும் பிஎஸ்என்எல்

ஊழியர்களுக்கு சம்பளம் கொடுக்க முடியாமல் திணறி வரும்
பொதுத்துறை தொலைத்தொடர்பு நிறுவனமான பிஎஸ்என்எல்
ரூ.3,000 கோடிக்கு மேல் கட்டண பாக்கியை வசூலிக்க முடியாமல்
திணறி வருவது தெரியவந்துள்ளது.

பிஎஸ்என்எல் இணைப்பு பெற்ற தொழில் நிறுவனங்கள்தான்
இந்த கட்டண பாக்கியை வைத்துள்ளன.

இந்த ஆண்டில் இதுவரை இரண்டு மாதங்கள் பிஎஸ்என்எல்
நிறுவனம் தனது ஊழியர்களுக்கு சம்பளத்தை ஒரு வாரம்
வரை தாமதமாக அளித்துள்ளது. இது அந்த நிறுவனம் எந்த
அளவுக்கு நிதி நெருக்கடியில் உள்ளது என்பதைக் காட்டுவதாக
அமைந்தது.

தொலைத்தொடர்புத் துறையில் ஒரு காலத்தில் கொடிகட்டிப்
பறந்த பிஎஸ்என்எல் நிறுவனம் இந்த அளவுக்கு சரிவை எதிர்
கொள்ள நிர்வாகச் சீரழிவு, தனியார் நிறுவனங்களின் வரவு,
கட்டணக் குறைப்பு போட்டி என பல காரணங்கள் கூறப்படுகின்றன.

இந்நிலையில் பிடிஐ செய்தி நிறுவனத்துக்கு பேட்டியளித்த
பிஎஸ்என்எல் தலைவரும், மேலாண் இயக்குநருமான
பி.கே.பூர்வார் கூறியதாவது:

பிஎஸ்என்எல் நிறுவனம் ரூ.3,000 கோடிக்கு மேல் கட்டண
பாக்கியை வசூலிக்க முடியாத நிலையில் உள்ளது.
பிஎஸ்என்எல் இணைப்பு பெற்றுள்ள பல தொழில்
நிறுவனங்கள் கட்டணத்தை செலுத்தாமல் பாக்கி
வைத்துள்ளதுதான் இதற்கு முக்கியக் காரணம்.

இந்த பாக்கித் தொகை எப்போது வசூலிக்கப்படும் என்பதை
வரையறுத்துக் கூற முடியாது. அடுத்து 2 முதல் 3 வாரங்களில்
குறிப்பிடத்தக்க அளவுக்கு கட்டணத்தை வசூலித்துவிட
முடியும் என்று நம்புகிறோம்.

நாட்டின் பல்வேறு பகுதிகளில் உள்ள பிஎஸ்என்எல்
நிறுவனத்துக்குச் சொந்தமான கட்டடங்கள் உள்ளிட்ட
இடங்களை வாடகைக்கு விடுவதன் மூலம் கூடுதல் வருவாய்
ஈட்ட முடிவு செய்யப்பட்டுள்ளது.

இதன் மூலம் ரூ.1,000 கோடி அளவுக்கு வருவாய் கிடைக்கும்.
இதற்கு முன்பு இதன் மூலம் ரூ.200 கோடி அளவுக்கு வருவாய்
கிடைத்தது என்றார் அவர்.

கடந்த சில ஆண்டுகளாக பிஎஸ்என்எல் நிறுவனத்தின் நஷ்டம்
அதிகரித்து வருகிறது. 2018-19-ஆம் நிதியாண்டில் அந்த
நிறுவனத்தின் நஷ்டம் ரூ.14,000 கோடியாக இருந்தது. அதன்
வருவாய் ரூ.19,308 கோடியாக குறைந்துவிட்டது. 1,65,179 பேர்
பிஎஸ்என்எல் நிறுவனத்தில் பணியாற்றி வருகின்றனர்.

நிறுவனத்தின் வருவாயில் 75 சதவீதம் ஊழியர்களின்
சம்பளத்துக்கே செலவிடப்படுகிறது. அதே நேரத்தில் தனியார்
தொலைத்தொடர்பு நிறுவனங்களின் வருமானத்தில்
3 முதல் 5.5 சதவீதம் மட்டுமே ஊழியர்களின் சம்பளமாக
உள்ளது.
-
----------------------------------------
தினத்தந்தி

இங்குமா?
பல நாடுகளில் மாத தொடக்கத்தில் அல்லது மாத முடிவில் பணம் கட்டியாக வேண்டும்.ஒரு வாரத்தில் கட்டவில்லை என்றால் சிவப்பு கடிதம் 14 நாட்களில் இணைப்பு துண்டிப்பு.