ஆளில்லாத விமானத்தை பறக்க விட்டு அதிரடி அமெரிக்காவை அதிர்ச்சியில் உறையவைத்த ரஷ்யா

-
மாஸ்கோ:
உலகில் ராணுவ பலத்தில் 2வது வலிமையான நாடாக
ரஷ்யா கருதப்படுகிறது. ரஷ்யாவின் விமானப் படை
பலத்தை மேம்படுத்த, அதிபர் புடின் தீவிர கவனம் செலுத்தி
வருகிறார்.

இதில், எதிரிகளால் வெற்றி கொள்ள முடியாத திறன்படைத்த
அணு ஆயுதங்கள், ஒலியைவிட 5 மடங்கு வேகம் கொண்டு
எதிரிகளின் இலக்கை தாக்கி அழிக்கும் சக்திபடைத்த
‘ஹைபர்சோனிக்’ ஏவுகணைகள் ஆகியவற்றை ராணுவத்தில்
சேர்க்கப்பட்டுள்ளது.

இந்த வரிசையில் நவீன தொழில்நுட்பத்துடன் உளவு விமானம்
ஒன்றை ரஷ்யா தயாரித்துள்ளது. ‘ஓகோட்னிக்’ (Okhotnik)
என்று இந்த ஆளில்லா விமானத்திற்கு பெயரிடப்பட்டு உள்ளது.

இந்த விமானத்தை பிரபல விமானத் தயாரிப்பு நிறுவனம்
சுகோய் தயாரித்துள்ளது. 20 டன் வெடிபொருளைச் சுமந்து
கொண்டு, 5 ஆயிரம் கி.மீ. தூரம் சென்று தாக்கும் திறன்
கொண்டது.

இந்த விமானத்தின் இறக்கைகள் 50 அடி நீளம் கொண்டது.
இந்த விமானம் ஒற்றை ஜெட் இன்ஜின் பொறுத்தப்பட்டது.
ஒரு மணி நேரத்திற்கு 620 மைல் தூரம் செல்லக் கூடியது.
இந்த விமானத்தை சில தினங்களுக்கு முன்பு ரஷ்யா பறக்க
விட்டு சோதனை செய்தது.

இந்த சோதனை வெற்றிகரமாக நடந்ததாக ரஷ்ய செய்தி
நிறுவனம் டாஸ் தெரிவித்துள்ளது. இந்த விமானத்தை
ராணுவத்தில் சேர்ப்பதன் மூலம் ரஷ்யாவின் வலிமையை
உலகிற்கு தெரியப்படுத்த புடின் நடவடிக்கை எடுத்துள்ளார்.

அதன் வெளிப்பாடே இந்த விமானத்தின் புறப்பாடு, நடுவானில்
பயணம், தரையிறங்கும் காட்சிகள் அடங்கிய ஒரு நிமிட வீடியோ
காட்சிகளை வெளியிடப்பட்டுள்ளது.

இந்த ஆளில்லா விமானம், அமெரிக்காவின் பி-2 போர்
விமானத்தைப் போன்று வலிமை படைத்தது. அமெரிக்க
விமானம் 3,100 மைல் சுற்றளவிற்கு பறந்து சென்று தாக்கும்
வல்லமை படைத்தது.

எரிபொருள் ஒரு முறை நிரப்பியவுடன், நியூயார்க் நகரில்
இருந்து போர்ச்சுக்கல் வரையில் சென்று திரும்பும் திறன்
படைத்தது. ரஷ்யாவின் புதிய கண்டுபிடிப்பான எஸ்-70
‘ஒகோட்னிக்’ அல்லது ‘ஹன்டர்’ என்று அழைக்கப்படும்
இந்த ஆளில்லா விமானம் தன்னுடைய 20 நிமிடங்கள்
சோதனையை எந்தவித சிக்கலும் இல்லாமல் நடத்தி
முடித்துள்ளது என்று ரஷ்ய ராணுவ அதிகாரிகள் பெருமையுடன்
கூறியுள்ளனர்.

டாப் 10 நாடுகள்
---------------------
உலகில் ராணுவ பலத்தில் டாப் - 10 நாடுகள் பட்டியலில்
இந்தியா 4வது இடத்தில் இடம்பெற்றுள்ளது. பகை
நாடுகளில் இருந்து தனது வளங்களையும், மக்களையும்
பாதுகாப்பதற்காக, ஒவ்வொரு நாட்டிற்கும் ராணுவ பலம்
மிக முக்கியமானதாக இருக்கிறது.

ஏராளமான நாடுகள் பல ஆயிரம் கோடிகளை ராணுவத்திற்கு
ஆண்டுதோறும் ஒதுக்கி வலிமை படுத்தி வருகின்றன.
இந்தநிலையில், ராணுவ பலத்தில் உலகின் மிக வலிமையான
10 நாடுகளை குளோபல் ஃபயர்பவர் அமைப்பும், கிரெடிட் சூசேவும்
இணைந்து கடந்த 2016ம் ஆண்டில் வெளியிட்டன.

இதில், அணு ஆயுத வல்லமை குறித்த தகவல்களில் முரண்பாடுகள்,
வெளிப்படைத்தன்மை இல்லாததால், ஆய்வில் அவை தவிர்க்கப்பட்டன.

பக்கத்து நாடுகளின் அச்சுறுத்தல்கள், உலக நாடுகளின்
அரசியல் மற்றும் ராணுவ தந்திரங்களை எதிர்கொள்ளும்
விதத்தில் இந்தியாவும் இந்த பட்டியலில் மிக முக்கியமான
இடத்தைப் பிடித்துள்ளது.

1. அமெரிக்கா, 2 ரஷ்யா, 3. சீனா, 4. இந்தியா, 5. இங்கிலாந்து,
6.பிரான்ஸ், 7. தென் கொரியா, 8. ஜெர்மனி, 9. ஜப்பான், 10. துருக்கி.
முதலிடத்தில் உள்ள அமெரிக்கா ஆண்டுதோறும் ராணுவத்திற்கு
மட்டும் சுமார் 600 பில்லியன் டாலர்களை கொட்டிக் கொடுக்கிறது.
ஆனால், இந்த நிதி ஒதுக்கீட்டை குறைக்க அந்த நாடு
திட்டமிட்டுள்ளது குறிப்பிடத்தக்கது.
-
--------------------------------
தினகரன்