143 பேர் தப்பியது எப்படி....? தரையிறங்கும் நிலையில் விமானத்தின் சக்கரங்கள் திடீர் என இயங்கவில்லை: சென்னை விமான நிலையத்தில் பெரும் பரபரப்பு

**ayyasamy ram** · **ayyasamy ram** Fri 9 Aug 2019 - 9:04

சென்னை:
சென்னை விமான நிலையத்தில் தரையிறங்க இருந்த நிலையில் விமானத்தின் சக்கரங்கள் திடீரென இயங்காமல் போனதால் பெரும் பதற்றம் ஏற்பட்டது. அதன் பின்னர் சக்கரங்கள் தானே இயங்கி விமானம் தரையிறங்கிய சம்பவம் சென்னை விமான நிலையத்தில் பெரும் பரபரப்பை ஏற்படுத்தியது.

டெல்லியில் இருந்து ஏர் இந்தியா விமானம் நேற்று முன்தினம் இரவு 138 பயணிகள் மற்றும் 5 விமான ஊழியர்கள் உள்பட 143 பேருடன் நள்ளிரவு 12.30 மணிக்கு சென்னை நோக்கி வந்து கொண்டிருந்தது. சென்னை விமான நிலையத்தில் விமானம் தரையிறங்க தயாரானது. தரை இறங்குவதற்கு முன்னதாக ஓடு பாதையில் ஓட வேண்டிய விமானத்தின் சக்கரங்கள் சரியாக செயல்படுகிறதா என விமானி வழக்கம் போல் பரிசோதித்தார்.

அப்போது விமானத்தின் சக்கரங்கள் இயங்காமல் இருப்பதை கண்டு அதிர்ச்சி அடைந்தார். இந்நிலையில், விமானம் தரையிறங்க முடியாது என்பதால் விமானத்தை தொடர்ந்து வானில் வட்டமடிக்கச் செய்தார்.

அதோடு விமானத்தில் இருந்த விமான பொறியாளர் மற்றும் விமானி சேர்ந்து அந்த விமானத்தின் சக்கரங்களை இயங்க வைக்க முயற்சி செய்தனர். விமானம் சுமார் அரைமணிநேரம் வானில் பறந்தும் முயற்சி வெற்றி பெறவில்லை.

இந்நிலையில், விமானத்தை சென்னையில் தகுந்த பாதுகாப்புடன் அவசரமாக தரையிறக்குவதை தவிர வேறு வழியில்லை என்ற முடிவுக்கு வந்தனர். சென்னை விமான நிலைய கட்டுப்பாட்டு அறைக்கு விமானி தகவல் கொடுத்தார்.

இதையடுத்து கட்டுப்பாட்டு அதிகாரிகள் விமானம் அவசரமாக தரையிறங்க முழு பாதுகாப்பு ஏற்பாடுகளை துரிதமாக செய்ய உத்தரவுகள் பிறப்பிக்கப்பட்டன. இதையடுத்து விமான நிலையத்தில் பரபரப்பு ஏற்பட்டது. விமான ஓடு பாதையில் தீயணைப்பு வண்டிகள், மருத்துவ குழுவினர், அதிரடி படை வீரர்கள் என நிறுத்தப்பட்டனர்.

விமான ஓடுபாதையில் ஸ்பாஞ்சினால் ஆன மெத்தை போன்ற உறுதியான விரிப்புகள் விரிக்கப்பட்டு தயார் நிலையில் வைக்கப்பட்டது. அதன் பின்னர் சென்னை விமான நிலைய கட்டுப்பாட்டு அறையினர் விமானம் தரையிறங்க தகவல் கொடுத்தனர்.

நேற்று அதிகாலை 1.10 மணிக்கு விமானம் சென்னை விமான நிலையத்தில் தரையிறங்க தொடங்கியபோது திடீர் என எதிர்பாராமல் விமானத்தின் இயங்காத சக்கரங்கள் திடீர் என இயங்கத் தொடங்கின. இதனால் தரையிறங்கும் போது எந்த வித ஆபத்தும் இன்றி சாதாரணமாக விமானம் சென்னை விமான நிலையத்தில் பத்திரமாக தரையிறங்கியது.

விமானத்தில் இருந்த 143 பேரும் அதிர்ஷ்டவசமாக மயிரிழையில் உயிர் தப்பினர். இதையடுத்து அது வரையில் பதற்றத்தோடு இருந்த விமானத்தில் இருந்த அதிகாரிகள் மற்றும் விமான நிலையத்தில் இருந்த அதிகாரிகள் அனைவரும் நிம்மதி பெருமூச்சு விட்டு மகிழ்ச்சியுடன் ஒருவரை ஒருவரை கட்டிப்பிடித்து தழுவிக்கொண்டனர்.

இதனால் நேற்று அதிகாலை சென்னை விமான நிலையத்தில் பெரும் பரபரப்பு ஏற்பட்டது.

தினகரன்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக