கே.ஆர்.எஸ்., கபினி அணைகளுக்கு தண்ணீர் வரத்து அதிகரிப்புதமிழகத்திற்கு வினாடிக்கு 7,300 கனஅடி நீர் செல்கிறது

மண்டியா,

கர்நாடகத்தில் தென்மேற்கு பருவமழை தீவிரமாக
பெய்து வருகிறது. மாநிலத்தில் தட்சிண கன்னடா,
குடகு, சிக்கமகளூரு உள்ளிட்ட மாவட்டங்களில்
தொடர்ந்து கனமழை பெய்து வருகிறது.

பெங்களூருவிலும் கடந்த 2 தினங்களாக மழை பெய்து
வருகிறது. இதனால் மண்டியா மாவட்டம்
ஸ்ரீரங்கப்பட்டணா தாலுகா கண்ணம்பாடியில் உள்ள
கிருஷ்ணராஜ சாகர்(கே.ஆர்.எஸ்.), மைசூரு மாவட்டம்
எச்.டி.கோட்டை தாலுகா பீச்சனஹள்ளியில் உள்ள
கபினி ஆகிய அணைகளின் நீர்மட்டம் வேகமாக உயர்ந்து
வருகிறது.

இந்த 2 அணைகளில் இருந்து தான் தமிழகத்திற்கு காவிரியில்
தண்ணீர் திறந்து விடப்படுகிறது.

இந்த நிலையில் கே.ஆர்.எஸ். அணையின் நீர்பிடிப்பு பகுதியான
குடகு மற்றும் கபினி அணையின் நீர்பிடிப்பு பகுதியான கேரள
மாநிலம் வயநாடு ஆகிய பகுதிகளில் கடந்த சில தினங்களாக
தொடர்ந்து கனமழை பெய்து வருகிறது.

இதன்காரணமாக 2 அணைகளுக்கும் நீர்வரத்து அதிகரித்துள்ளது.

கே.ஆர்.எஸ்., கபினி

நேற்று காலை நிலவரப்படி 124.80 அடி உயரம் கொண்ட
கே.ஆர்.எஸ். அணையில் தற்போது 84.20 அடி தண்ணீர் உள்ளது.
அணைக்கு வினாடிக்கு 12,655 கனஅடி வீதம் தண்ணீர் வந்து
கொண்டிருக்கிறது. அணையில் இருந்து வினாடிக்கு
6,296 கனஅடி வீதம் தண்ணீர் திறந்துவிடப்பட்டுள்ளது.

நேற்று முன்தினம் அணைக்கு வினாடிக்கு 5,654 கனஅடி தண்ணீர்
வந்து கொண்டிருந்தது குறிப்பிடத்தக்கது.

இதேபோல, கடல் மட்டத்தில் இருந்து 2,284 அடி கொள்ளளவு
கொண்ட கபினி அணையில் நேற்று காலை நிலவரப்படி
2,276.27 அடி தண்ணீர் இருந்தது. அணைக்கு வினாடிக்கு
11,352 கனஅடி வீதம் தண்ணீர் வந்தது. அணையில் இருந்து
வினாடிக்கு 1,020 கனஅடி வீதம் தண்ணீர் திறந்து விடப்பட்டது.

நேற்று முன்தினம் கபினி அணைக்கு வினாடிக்கு 3,800 கனஅடி
வீதம் தண்ணீர் வந்து கொண்டிருந்தது குறிப்பிடத்தக்கது.

வினாடிக்கு 7,300 கனஅடி நீர் திறப்பு

இந்த 2 அணைகளில் இருந்தும் நேற்று காலையில் இருந்து
வினாடிக்கு 7,316 கனஅடி வீதம் தண்ணீர் தமிழகத்திற்கு காவிரி
ஆற்றில் திறந்துவிடப்பட்டுள்ளது.

நேற்று முன்தினம் இந்த அணைகளில் இருந்து வினாடிக்கு
7,025 கனஅடி தண்ணீர் திறந்து விடப்பட்டது. நீர்பிடிப்பு பகுதிகளில்
பெய்து வரும் தொடர் கனமழை காரணமாக கே.ஆர்.எஸ்., கபினி
அணைகளுக்கு நீர்வரத்து அதிகரிக்க தொடங்கி உள்ளதால்,
பின்வரும் நாட்களில் காவிரியில் திறக்கப்படும் தண்ணீரின்
அளவும் உயர வாய்ப்பு உள்ளது.
-
------------------------
தினத்தந்தி