திருமதி ஒய்.ஜி.ராஜலட்சுமி பார்த்தசாரதி காலமானார்

-
சென்னை: கல்வியாளர் ராஜலட்சுமி பார்த்தசாரதி(93),
மாரடைப்பால் இன்று(ஆக.,6) சென்னையில் காலமானார்.
மறைந்த ஒய்.ஜி.பார்த்தசாரதியின் மனைவியும்,
ஒய்.ஜி.மகேந்திரனின் தாயாருமானவர் இவர்,
பத்மா சேஷாத்ரி கல்வி குழுமத்தை உருவாக்கி அதன்
தாளாளராக இருந்தார்.

வயது மூப்பால் சிகிச்சை பெற்று வந்த இவர்,
கிரீம்ஸ் சாலையில் உள்ள, தனியார் மருத்துவமனையில்
மாரடைப்பால் காலமானார்.

இவரது மறைவுக்கு, கல்வியாளர்கள், நாடக மற்றும்
திரையுலக பிரமுகர்கள், பொதுமக்கள் பலரும் இரங்கல்
தெரிவித்துள்ளனர்.

சென்னையில் 1925ம் ஆண்டு நவ.,8ல் பிறந்தவர்
ராஜலட்சுமி பார்த்தசாரதி. பள்ளி மற்றும் கல்லூரி படிப்பை
சென்னையில் முடித்தவர், சிலகாலம் பத்திரிகை துறையில்
பணியாற்றினார்.

1958ம் ஆண்டு சென்னை, நுங்கம்பாக்கத்தில் 13 குழந்தைகளுடன்
பள்ளியை ஆரம்பித்தார்.
நாளடைவில், பத்மா சேஷாத்ரி பாலா பவன் என்ற மிகப்பெரிய
கல்வி சாம்ராஜ்யமாக விரிவடைந்தது. தற்போது இந்த குழுமத்தின்
பள்ளியில் சுமார் 8 ஆயிரம் மாணவர்கள் படித்து வருகின்றனர்.
சிபிஎஸ்இ கல்வி திட்டம் அமைய இவரும் முக்கிய பங்காற்றினார்.

மறைந்த ராஜலட்சுமி பார்த்தசாரதி சிறந்த கல்வியாளராக
திகழ்ந்தவர். தங்கள் பள்ளியில் படிக்கும் மாணவர்கள்
அனைவரைப் பற்றியும் அறிந்தவர். முன்னாள் மாணவர்கள்
பற்றியும் நினைவில் வைத்திருப்பவர்.

பொதுத்தேர்வு எழுதும் மாணவர்களை ஆண்டுதோறும்
தனித்தனியாக சந்தித்து ஆசீர்வதிப்பது இவரது வழக்கம்.

நாடகம், கலை, இசையில் ஆர்வம் உள்ளவர். சென்னையில்
நடக்கும் அனைத்து கலை விழாக்களிலும் கலந்து கொள்பவர்.
நேர்மறை சிந்தனை உள்ளவர். எதையும் நேர்மறையாகவே
சிந்திப்பவர்.

கல்வி சேவைக்காக, 2010ம் ஆண்டின் பத்மஸ்ரீ விருதை
பெற்றுள்ளார். இவர் சிறந்த பத்திரிகையாளராகவும் விளங்கியவர்.

தினமலர்