சிறுவர் பாடல்கள் - தொடர் பதிவு

**ayyasamy ram** · **ayyasamy ram** Mon Aug 12, 2019 8:09 am

வாழை (சிறுவர் பாடல்)
-
வாழை மரம் பாரு…அதன்

வாழ்வைக் கொஞ்சம் கேளு!

வாழையடி வாழை –சுற்றி

வளரும் கன்று பாரு!

மலர்களெல்லாம் மேலே

வானம் பார்த்து பூக்கும்!

வாழை அதன் பூதான்

வளைந்து பூமி பார்க்கும்!

காய்கள், கனிகள், கிழங்கும்

இலைகள் தண்டும் வழங்கும்!

வாழை ‘மரமே’ ஆகுமா?

புல்லின் வகைய தாகுமே!

—
===================================
கவிஞர் வெள்ளாயாம்பட்டு சுந்தரம்
நன்றி; நல்ல நல்ல பாட்டு(சிறுவர் பாடல்கள்)

**ayyasamy ram** · **ayyasamy ram** Mon Aug 12, 2019 8:30 am

கலங்காதே கண்மணியே’ உனக்கீடு நீயே.. (சிறுவர் பாடல் )
-
கண்ணு பொன்னு கலங்காதே
காலம் மாறும்மா; நீ
வெற்றி நோக்கி நடந்தாலே
எல்லாம் மாறும்மா..
–
நீ சொன்னாச் சொல்லுக்கு சூரியன்நிக்கும்
சொல்லிப்பாரும்மா
உன் கவிழ்ந்தத் தலையில் உலகம்சாயும்
நிமிர்ந்து நில்லம்மா..
–
(கண்ணு பொன்னு கலங்காதே..)
–
விதவைன்னு சொன்னது யாரு
வரதட்சணை கேட்டது யாரு
மலடின்னு பழிச்சதாரு
மருமக(ள்)ன்னு கொன்னது யாரு
அடப் பெண்சிசுன்னுவிஷம் வைத்ததாரு?

எல்லாம் பெண்ணே நீயும்தானே
மாத்தி யோசிம்மா;
இந்தக் காலம் உனக்கு’ உனக்காக
திருப்பிப் போடும்மா..
–
(கண்ணு பொன்னு கலங்காதே..)
–
விண்வெளியெட்டி தொட்டுட்ட
ஸ்டெதாஸ்கோப் மாட்டிட்ட
அரசியலில் அறிவியலில்
முன்னேநடக்கத் துவங்கிட்ட
நீதிமன்றம் காவல்நிலையம்
– உன்னைச்
சேர்க்குது; நீ எழுந்துநடக்க நினைத்தாலே
சலாம் போடுது;
உனக்கு சலாம் போடுது..
–
(கண்ணு பொன்னு கலங்காதே..)
–
கலாச்சாரச் சர்க்கரை – தேவைறிந்துப்
போட்டுக்கோ
சாதிமதம் ஏற்றத் தாழ்வை – அடியோட
நீக்கிக்கோ, நீயும்நானும் ஒண்ணுதான்னு
தோழமையில் காட்டிக்கோ
–
தொங்குந்தாலி நெஞ்சிமேல உறவைச் சேர்க்கட்டும்
உன்னைக் கண்ணுக்குள்ள கண்ணா வச்சு
காலம் தாங்கட்டும்…
உன்னைக் காலம் தாங்கட்டும்…

(கண்ணு பொன்னு கலங்காதே..)
————————————————-
வித்யாசாகர்

**ayyasamy ram** · **ayyasamy ram** Mon Aug 12, 2019 8:31 am

ஆனை பாரு! – பாப்பா பாட்டு
-
ஆனை பாரு!

ஆனை பாரு யானை பாரு

ஆடி அசைஞ்சு வருது பாரு!

கறுப்பு யானை கம்பீரமா

நாட்டை நோட்டம் விடுது பாரு!

தூணைப் போலக் காலைப் பாரு

நீண்ட தும்பிக் கையைப் பாரு!

முறத்தைப் போலக் காதைப் பாரு

விசிறி வீசும் அழகைப் பாரு!

மலையைப் போல உடம்பைப் பாரு

கடுகைப் போலக் கண்ணைப் பாரு!

குட்டிக் குட்டி வாலைப் பாரு

குனிய வச்சு ஏறிப் பாரு!

நீரை உறிஞ்சிக் குளிக்கும் பாரு

பூவாய்ச் சொரிந்து களிக்கும் பாரு!

வாழைப் பழத்தைக் கொடுத்துப் பாரு

வாகாய் உள்ளே தள்ளும் பாரு!

கழுத்தில் மணியைக் கட்டிப் பாரு

காத தூரம் கேட்கும் பாரு!

பிள்ளை யாரு முகத்தைப் பாரு

உள்ளம் துள்ளிக் குதிக்கும் பாரு!

ஆனை யோட பலத்தைப் பாரு

தும்பிக் கையில் இருக்கு பாரு!

நீயும் கொஞ்சம் உள்ளே பாரு

நம்பிக் கையில் தெரியும் பாரு!!

-கவிநயா
நன்றி- குங்குமம் தோழி

**ayyasamy ram** · **ayyasamy ram** Mon Aug 12, 2019 8:32 am

தம்பி என்ன தெரியுமா?
-
நெட்டையான காலுடனே
நீளமான கழுத்துடனே
சுட்டுப் பொசுக்கும் மணலில் கூடச்
சுமையைத் தூக்கிச் செல்லும்; அது
என்ன தெரியுமா? தம்பி என்ன தெரியுமா?
–
ஒட்டகம்
————————————-
–
முறத்தைப் போன்ற காதுடனே
முகத்தில் ஒற்றைக் கையுடனே
உரலைப் போன்ற காலுடனே
ஊர்வலத்தில் வருமே; அது
என்ன தெரியுமா? தம்பி என்ன தெரியுமா?
–
யானை
–
——————————–
–
பட்டுப் போன்ற உடலுடனே
பல நிறத்தில் இறகுடனே
கட்டையான குரலுடனே
களித்து நடனம் ஆடும்; அது
என்ன தெரியுமா? தம்பி என்ன தெரியுமா?
–
மயில்
—————————————-

வட்டமான முகத்துடனே
வளைந்திருக்கும் மூக்குடனே
முட்டை போன்ற கண்ணுடனே
வேட்டை ஆடும் இரவில்; அது
என்ன தெரியுமா? தம்பி என்ன தெரியுமா?
–
ஆந்தை-
–
————————————
-அழ.வள்ளியப்பா

Sponsored content · Sponsored content

சிறுவர் பாடல்கள் - தொடர் பதிவு

சிறுவர் பாடல்கள் - தொடர் பதிவு

Re: சிறுவர் பாடல்கள் - தொடர் பதிவு

Re: சிறுவர் பாடல்கள் - தொடர் பதிவு

Re: சிறுவர் பாடல்கள் - தொடர் பதிவு

Re: சிறுவர் பாடல்கள் - தொடர் பதிவு

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக