தியாகராஜ பாகவதருக்கு திருச்சியில் மணிமண்டபம்: முதல்வர் பழனிசாமி

திருச்சியில் தியாகராஜ பாகவதருக்கு மணிமண்டபம் அமைக்கப்படும் என்று முதல்வர் பழனிசாமி அறிவித்தார்.

சட்டப் பேரவையில் விதி 110-இன் கீழ் அவர் சனிக்கிழமை படித்தளித்த அறிக்கை:-

தியாகராஜ பாகவதரின் கலையுலக வாழ்வு 1934-ஆம் ஆண்டு "பவளக்கொடி' திரைப்படத்தின் மூலம் அரங்கேறியது.

அவர் நடித்த "ஹரிதாஸ்' திரைப்படம் பெரும் வரவேற்பைப் பெற்றது.

அவரது சங்கீத பாடல்கள் அன்றும், இன்றும் மக்கள் மனதில் ஒலித்துக் கொண்டே இருக்கும். அவர் பல வெற்றிப் படங்களை வழங்கி தனக்கென தனி முத்திரை பதித்தவர்.

அவரது சாதனைகளை அங்கீகரிக்கும் வகையிலும், அவரின் நினைவைப் போற்றவும் திருச்சி மாவட்டத்தில் ரூ.50 லட்சத்தில் எம்.கே.தியாகராஜ பாகவதருக்கு மணிமண்டபம் அமைக்கப்படும்.

ஏழு தமிழறிஞர்கள் படைப்புகள்: தமிழகத்தில் இதுவரை 149 தமிழறிஞர்களின் நூல்கள் நாட்டுடைமை ஆக்கப்பட்டு அவர்களது மரபுரிமையாளர்களுக்கு பரிவுத் தொகை அளிக்கப்பட்டுள்ளது.

அந்த வகையில், இந்தாண்டு உளுந்தூர்பேட்டை சண்முகம், கவிஞர் நா.காமராசு, முனைவர் இரா.இளவரசு, அடிகளாசிரியர், இறைக்குருவனார், ம.கோபாலகிருட்டிணன், பாபநாசம் குறள்பித்தன் ஆகியோரின் படைப்புகள் நாட்டுக்கு அர்ப்பணிக்கும் வகையில் நாட்டுடைமையாக்கப்படும்.

தமிழ்நாடு நாள்: தமிழ்நாடு உருவாக்கப்பட்ட 1956-ஆம் ஆண்டு நவம்பர் 1-ஆம் தேதியை கௌரவிக்கும் வகையில், ஆண்டுதோறும் நவம்பர் 1-ஆம் தேதியன்று தமிழ்நாடு நாள் என்ற பெயரில் விழா கொண்டாடப்படும்.

வாராணசி இந்து பல்கலைக்கழகம், குவாகாத்தி பல்கலைக்கழகம், பஞ்சாப் பல்கலைக்கழகம் ஆகியவற்றில் இயங்கி வரும் தென்னிந்திய மொழிகள் துறையில் தலா ஒரு தமிழ் உதவிப் பேராசிரியர் பணியிடம் தோற்றுவிக்கப்படும்.
திருக்குறள் மொழிபெயர்ப்பு: உலகப் பொதுமறையாம் திருக்குறள் தொடர்ந்து பல்வேறு மொழிகளில் மொழிபெயர்ப்பு செய்யப்பட்டு வருகிறது.

இந்த ஆண்டு இந்திய மொழிகளான அசாமி, சிந்தி மொழிகளிலும், உலக மொழியான ஈப்ரு மொழியிலும் திருக்குறள் மொழிபெயர்ப்பு செய்யப்படும்.
திராவிட மொழிகளை ஒப்பிட்டு தொடர்ச்சியாகப் பல்வேறு வகையான ஆய்வுகள் மேற்கொள்ளப்படும்.

தமிழறிஞர் ராபர்ட் கால்டுவெல் பெயரில் தமிழ் ஆய்விருக்கை தமிழ்ப் பல்கலைக்கழகத்தில் நிறுவப்படும் என்று முதல்வர் பழனிசாமி அறிவித்தார்.
-
தினமணி