தமிழக அரசுக்கு 100 கோடி அபராதம்: தடை விதிக்க உயர்நீதிமன்றம் மறுப்பு!

சென்னையில் ஓடும் நதிகளை பராமரிக்கத் தவறியதாக
தமிழக அரசுக்கு 100 கோடி ரூபாய் அபராதம் விதித்து
தேசிய பசுமைத் தீர்ப்பாயம் பிறப்பித்த உத்தரவுக்கு
சென்னை உயர்நீதிமன்றம் தடை விதிக்க மறுத்துவிட்டது.

சென்னையில் உள்ள கூவம், அடையாறு நதிகளையும்,
பக்கிங்ஹாம் கால்வாய் உள்ளிட்ட நீர்நிலைகளையும்
பராமரிக்க தமிழக அரசு தவறிவிட்டதாக
ஜவஹர்லால் சண்முகம் என்பவர் மனு தாக்கல்
செய்திருந்தார்.

இந்த வழக்கை விசாரித்த தேசிய பசுமைத் தீர்ப்பாயம்,
கூவம், அடையாறு, பக்கிங்காம் கால்வாயைத் தூர்வாரிப்
பராமரிக்காமல் விட்டதால் சுற்றுச்சூழல் பாதிப்பு ஏற்பட
காரணமான பொதுப்பணித்துறைக்கு 100 கோடி ரூபாய்
அபராதம் விதித்து கடந்த பிப்ரவரி மாதம் உத்தரவிட்டது.

மேலும் ஏப்ரல் 23-ம் தேதி நேரில் ஆஜராக தலைமைச்
செயலாளர் கிரிஜா வைத்தியநாதனுக்கு உத்தரவிட்ட
பசுமை தீர்ப்பாயம் சுற்றுச்சூழல் பாதிப்புகளை ஆராயவும்,
மறுசீரமைப்பு நடவடிக்கைகளைக் கண்காணிக்கவும்
உத்தரவிட்டது.

மேலும் மத்திய, மாநில மாசுக்கட்டுப்பாட்டு வாரியங்கள்,
இந்திய அறிவியல் கழகம் (IASE), நீரி (NEERI)
அமைப்பு, மெட்ராஸ் இன்ஸ்டிட்யூட் ஆஃப் எக்கனாமிக்ஸ்
ஆகிய நிறுவனங்களிடமிருந்து, தலா ஒருவர் அடங்கிய
குழுவை நியமித்து, 3 மாதத்தில் அறிக்கை தாக்கல்
செய்யவும் உத்தரவிட்டது.

அபராத உத்தரவை எதிர்த்து தமிழக பொதுப்பணித்துறை
தரப்பில் சென்னை உயர் நீதிமன்றத்தில் மனுத்தாக்கல்
செய்யப்பட்டது.

இந்த மனு நீதிபதிகள் சுப்பையா மற்றும் சரவணன்
அடங்கிய அமர்வு முன் விசாரணைக்கு வந்தது. அப்போது,
கூவம், அடையாறு மற்றும் பக்கிங்ஹாம் கால்வாயை
பராமரிக்க மேற்கொண்ட நடவடிக்கைகளை கருத்தில்
கொள்ளாமலும், கூவம் நதியை சுத்தப்படுத்த
604 கோடி ரூபாய் ஒதுக்கப்பட்டு பணிகள் நடந்து வருவதை
கருத்தில் கொள்ளாமலும் இந்த உத்தரவு பிறப்பிக்கப்
பட்டதாக தமிழக அரசுத் தரப்பில் குற்றம் சாட்டப்பட்டது.
-

மேலும் ஏற்கனவே தீர்ப்பாயம் 2 கோடி ரூபாய் அபராதம்
விதித்து பிறப்பித்த உத்தரவுக்கு உயர் நீதிமன்றம் தடை
விதித்துள்ளதையும் அரசுத்தரப்பு வழக்கறிஞர் சுட்டிக்
காட்டினார்.

இதை ஏற்றுக்கொண்ட நீதிபதிகள், தேசிய பசுமைத்
தீர்ப்பாயம் 100 கோடி ரூபாய் அபராதம் விதித்து பிறப்பித்த
உத்தரவுக்கு இடைக்கால தடை விதித்திருந்தனர்.

இந்த நிலையில் இந்த வழக்கின் மீது இன்று இறுதி
விசாரணை நடத்தது. அப்போது நீதிபதிகள் ஏற்கனவே
விதிக்கப்பட்ட தடையை நீக்கி தமிழக அரசு மனுவை
தள்ளுபடி செய்து உத்தரவிட்டனர்.

இதனால், ரூ.100 கோடி அபராதம் செலுத்தும் நிலைக்கு
தமிழக அரசு உள்ளாகியுள்ளது.
-
-------------------------------------
நியூஸ் 18 -தமிழ்

இதில் கட்சிக்கு அபராதமா அல்லது அரசு நிர்வாகத்திற்கா?

யாருக்கு அபராதம் என்றால் நாட்டு மக்களுக்கே எனலாம். நீதி மன்றம் மட்டும் குற்றவாலிக்கு அடைக்கலம் கொடுத்து உணவு உடல் நலம் காத்து வாய்தா வாய்தா என காலம் கடத்தி காலம் ஓட்டுவதால் அரசுக்கு லாபமா என்ன ? சொல்வது யாவருக்கும் சுலபமாகும் சொன்னபடி நடப்பதுதான் கஷ்டம். சட்டத்தை மதிக்கல குற்றம் தைரியமாக செய்திட்டு தப்பிக்க நினைப்போருக்கு நீதி மன்றமே துணைபோகிறது எனலாம். பல்லாண்டாக ஏன் வழக்கு நடைபெறுகிறது. தீர்ப்பு வழங்க துணிவில்லையோ இனிதீர்ப்பு வழங்க ரோபோ கொண்டுவரனும் போல் உள்ளது,..................................

இந்த அபராதத் தொகையை யார் காட்டுவார்கள்?
இந்த அபராதத் தொகையை கட்டினால் மேற்கொண்டு பராமரிப்பு பணிகளை செய்யாமல் விட்டுவிடலாமா?
அல்லது எத்தனை நாட்களுக்குள் அவற்றை செய்து முடிக்க வேண்டும்?
செய்யதவறினால் என்ன நடவடிக்கை எடுக்கப்படும்?
பல கேள்விகள் எழுகிறது? இதற்கெல்லாம் நீதிமன்றம் பதில் சொல்லவில்லையா?