'அடடே' விளக்கமளித்த அமைச்சரின் வீட்டில் நண்டுகள்!

[img] [/img]
மும்பை :
மகாராஷ்டிராவில் அணை உடைந்ததற்கு நண்டுகள் தான்
காரணம் என 'அடடே' விளக்கமளித்த அமைச்சரின் வீட்டில்,
தேசியவாத காங்கிரஸ் தொண்டர்கள் நண்டுக்களை
விட்ட காட்சிகள் வெளியாகியுள்ளன.

மகாராஷ்டிரா மாநிலத்தில் தென்மேற்கு பருவமழை
அதிதீவிரமடைந்து வருகிறது. மும்பை உள்ளிட்ட பல்வேறு
பகுதிகளில் கொட்டித் தீர்த்த கனமழையால் மக்களின்
இயல்பு வாழ்க்கை கடுமையாக பாதிக்கப்பட்டது.

கனமழை காரணமாக பல்வேறு நீர்நிலைகள் நிரம்பி
வருகின்றன. ரத்னகிரி மாவட்டத்தில் உள்ள திவாரே
அணையில் தண்ணீர் வேகமாக நிரம்பியது. கடந்த சில
தினங்களுக்கு முன் திடீரென அணையின் ஒரு பகுதி
உடைந்து தண்ணீர் ஆக்ரோஷத்துடன் வெளியேறியது.

இதனால் அணையின் அருகிலுள்ள வீடுகள் வெள்ளத்தில்
அடித்துச் செல்லப்பட்டன. அந்த வீடுகளில் இருந்தவர்களை
காணவில்லை. இதையடுத்து மாவட்ட அதிகாரிகள்,
போலீசார், பேரிடர் மீட்புப் படையினர் மற்றும்
தன்னார்வலர்கள் சம்பவ இடத்திற்குச் சென்று மீட்பு
பணியில் ஈடுபட்டனர்.

திவாரே அணை உடைந்த விபத்தில் அடித்துச்
செல்லப்பட்டவர்களில் இதுவரை 20 பேரின் உடல்கள்
மீட்கப்பட்டுள்ளன. மற்றவர்களை தேடும் பணி தொடர்கிறது.

இந்நிலையில் திவாரே அணை உடைந்ததற்கு நண்டுகளே
காரணம் என அமைச்சர் வினோத கருத்தை வெளியிட்டார்.
அவர் வேறு யாருமல்ல, அம்மாநில நீர்வள பாதுகாப்புத்துறை
அமைச்சர் தனஜி சவந்த். இந்த கருத்தால் இவர் சர்ச்சையில்
சிக்கினார்.

இதனை எதிர்த்து தேசியவாத காங்., கட்சியினர் தாங்கள்
கொண்டு வந்த நண்டுகளை அமைச்சரின் வீட்டின் முன்
அவிழ்த்து விட்டனர். இதனால் பெரும் பரபரப்பு ஏற்பட்டது.
-
-----------------------------
தினமலர்