விமானத்தை தகர்க்க முயன்ற இளைஞர் கைது ..?

டெட்ராய்ட் : அதிநவீன வெடிபொருள் மூலம் நடுவானில் அமெரிக்க விமானத்தை தகர்க்க முயன்ற நைஜீரிய இளைஞரை பயணிகள் மடக்கி பிடித்தனர். இதனால் பெரும் அசம்பாவிதம் தவிர்க்கப்பட்டது. இளைஞருக்கு அல்&கய்தா தீவிரவாத அமைப்புடன் தொடர்பு இருப்பதாக தெரிய வந்துள்ளது.
ஹாலந்து தலைநகர் ஆம்ஸ்டர்டாம் நகரில் இருந்து அமெரிக்காவின் டெட்ராய்ட் நகருக்கு நார்த் வெஸ்ட் ஏர்லைன்சுக்கு சொந்தமான விமானம் நேற்று முன்தினம் புறப்பட்டது. அந்த விமானத்தில் பயணம் செய்த உமர் பரூக் அப்துல் முதாலப் (23) என்ற நைஜீரிய இளைஞர், விமானம் டெட்ராய்டில் தரையிறங்கும் நேரத்தில் மர்ம பொருளை விமானத்துக்குள் பற்ற வைத்தார்.

அது மத்தாப்பு போல ஒரு சில நொடிகள் எரிந்தது. கரும் புகை வெளியானது. பட்டாசு வெடிப்பதைப் போல சத்தமும் கேட்டது. இதைப் பார்த்த பயணிகள் அலறினர். சிலர் நைஜீரிய வாலிபர் மீது பாய்ந்து அவரை மடக்கிப் பிடித்தனர்.

இந்த சம்பவத்தில் உமர் பரூக்கின் ஆடை தீப்பற்றி அவரது உடலில் தீக்காயம் ஏற்பட்டது. அவரைத் தடுக்க மேலே விழுந்து புரண்ட இரண்டு பயணிகளுக்கும் தீக்காயம் ஏற்பட்டது. இதையடுத்து, பயணிகளும், விமான ஊழியர்களும் உமர் பரூக்கை விமானத்தின் முன்பகுதிக்கு இழுத்துச் சென்றனர்.
டெட்ராய்ட் விமான நிலையத்தில் இரவு 11.40க்கு விமானம் பத்திரமாக தரையிறக்கப்பட்டு பயணிகள் இறங்கியதும், தனி இடத்துக்கு கொண்டு செல்லப்பட்டது. அங்கு ஏற்கனவே தயாராக இருந்த போலீசார், விமானத்தை சுற்றி வளைத்தனர். வெடிகுண்டு செயலிழப்பு ரோபோ மூலம் விமானம் முழுவதும் சோதனையிடப்பட்டது.

உமர் பரூக்கை போலீசார் கைது செய்து விசாரணையை தொடங்கினர். பவுடர் பாக்கெட்டுக்குள்
ரசாயனத்தை செலுத்தி வெடிக்கச் செய்யும் நவீன தொழில்நுட்பத்தை இதுவரை அறியவில்லை என்று பாதுகாப்பு அதிகாரிகள் தெரிவித்தனர். நல்லவேளையாக அந்த பவுடர் வெடிக்காததால் பெரிய அசம்பாவிதம் தவிர்க்கப்பட்டதாக கூறினர்.

இச்சம்பவத்தை கேள்விப்பட்டவுடன், ஹவாய் பகுதியில் விடுமுறையில் தங்கியுள்ள அமெரிக்க அதிபர் ஒபாமா, விமான பாதுகாப்பை நாடு முழுவதும் பலப்படுத்த உத்தரவிட்டார். பாதுகாப்பு உயர் அதிகாரிகளுடன் ஆலோசனை நடத்தினார். விமான பாதுகாப்பு குறித்து எடுக்கப்பட்டுள்ள நடவடிக் கைகளை கேட்டறிந்து வருகிறார். ணுணுஇது தீவிரவாதிகளின் தாக்குதல் முயற்சி. கிறிஸ்துமஸ் பண்டிகையை சீர்குலைக்க தாக்குதல் நடத்த திட்டமிட்டிருக்கலாம்துது என வெள்ளை மாளிகை அதிகாரிகள் தெரிவித்தனர்.

நைஜீரிய இளைஞர் உமர் பரூக்கிடம் நடந்த தீவிர விசாரணையில் வெடிபொருளை ஏமனில் வாங்கியதாக கூறினார். அல்&கய்தா தீவிரவாதிகளுடன் தனக்கு தொடர்பு இருப்பதாக அவர் கூறியதாகவும், போலீஸ் தீவிர கண்காணிப்பு பட்டியலில் அவரது பெயர் சேர்க்கப்பட்டு ள்ளதாகவும் தகவல்கள் தெரிவிக்கின்றன.