தரை தட்டியது வீராணம் ஏரி; சென்னை குடிநீருக்கு சிக்கல்

-

கடலுார் மாவட்டம், காட்டுமன்னார்கோவில் அடுத்துள்ள,
வீராணம் ஏரியில் இருந்து, சென்னைக்கு குடிநீர்
அனுப்பப்படுகிறது.

இருப்பு:

மேட்டூர் அணையில் திறக்கப்படும் தண்ணீர், கல்லணை,
கீழணை வழியாக சென்று, வடவாறு வழியாக, வீராணம்
ஏரியில் தேக்கப்படுகிறது. வீராணத்தில் இருந்து, பாசனம்
மற்றும் சென்னைக்கு குடிநீர் அனுப்பப்படுகிறது.

கடந்த ஆண்டு, தொடர் மழை காரணமாக, ஆகஸ்டில்,
வீராணம் ஏரிக்கு தண்ணீர் வர துவங்கியது. தொடர்ந்து
ஏரியில், முழு கொள்ளளவு இருப்பு வைக்கப்பட்டு,
சென்னைக்கு, குடிநீர் அனுப்பப்பட்டு வருகிறது.

சரிவு:

இரு மாதங்களாக, தண்ணீர் வரத்து இல்லாத நிலையிலும்,
வீராணம் ஏரியில் இருந்து, தினமும் சென்னைக்கு, குடிநீர்
அனுப்பப்பட்டு வருகிறது.கடும் வெயில் மற்றும் குடிநீர்
அனுப்பியதால், ஏரியின் நீர் மட்டம் சரிந்தது. ஏரியில், தரை
தெரியும் அளவிற்கு தண்ணீர் வற்றி உள்ளது.

தற்போது, ஏரியின் மொத்த கொள்ளளவான, 1,465 மில்லியன்
கன அடியில், 280 மில்லியன் கன அடி மட்டுமே, தண்ணீர்
உள்ளது.

இதனால், வினாடிக்கு, 74 கன அடி நீர், சென்னைக்கு அனுப்பி
வந்த நிலையில், தற்போது, 40 கன அடி மட்டுமே அனுப்பப்
படுகிறது. ஒரு நாளைக்கு, 15 - 20 மில்லியன் கன அடி தண்ணீர்,
சென்னைக்கு அனுப்பப்படுகிறது.

தற்போதுள்ள நீர் இருப்பை கணக்கிட்டால், இன்னும்,
15 நாட்களுக்கு மட்டுமே, சென்னைக்கு குடிநீர் அனுப்ப முடியும்.
இந்நிலையில், மேட்டூரில் இருப்பு உள்ள, 14 டி.எம்.சி., தண்ணீரில்
, 1 டி.எம்.சி., தண்ணீர் பெற்று, வீராணத்தில் தேக்குவதற்கான
வாய்ப்பு உள்ளது.
-
------------------------------------
தினமலர்