வேகம்! ஐந்தாவது நடைமேடை பணி... கிண்டி ரயில் நிலையத்தில் ஜரூர்

-சென்னை :
கிண்டி புறநகர் மின்சார ரயில் நிலையத்தில், ஐந்தாவது
நடைமேடை கட்டுமான பணி, ஜரூராக நடக்கிறது.
சென்னை கடற்கரை - தாம்பரம் ரயில் பாதையில்,
கிண்டி ரயில் நிலையம் முக்கிய நிலையமாக உள்ளது.

இந்நிலையத்தில், இரண்டு எக்ஸ்பிரஸ் ரயில் பாதைகளும்,
இரண்டு புறநகர் மின்சார ரயில் பாதைகளும் உள்ளன.
நிலையத்துக்கு பயணியர் செல்ல, இருவழிகளிலும் நடை
மேம்பாலம் வழியாக தான், நடைமேடைக்கு செல்ல முடியும்.

கோரிக்கை

பயணியர் போக்குவரத்து அதிகம் உள்ளதாலும், நடைமேம்பாலம்
குறுகலாக உள்ளதாலும், காலை, மாலை வேளைகளில், பாலத்தில்
பயணியர் நெருக்கடியில் சிக்கும் நிலை உள்ளது.இதை தவிர்க்க,
நிலையத்தின் மேற்கு பக்கம், புறநகர் மின்சார ரயில்
தண்டவாளத்தையொட்டி, மாம்பலம் நிலையத்தில் உள்ளது போல,
ஐந்தாவது நடைமேடை கட்ட வேண்டும்.

இவ்வசதி ஏற்படுத்தப்பட்டால், மின்சார ரயிலுக்கு செல்லும்
பயணியர், நடை மேம்பாலத்தை பயன்படுத்த வேண்டியதில்லை
என, பொதுமக்கள் தரப்பில், தொடர்ந்து கோரிக்கை விடுக்கப்பட்டு
வந்தது.

இதையொட்டி, ஐந்தாவது பிளாட்பாரம் கட்டுமான பணி துவக்கப்பட்டு,
ஜரூராக நடக்கிறது.

'எஸ்கலேட்டர்'
இது குறித்து, ரயில்வே கட்டுமான பிரிவு அதிகாரி கூறியதாவது:
கடற்கரை - தாம்பரம் ரயில் பாதையில், கிண்டி முக்கிய நிலையமாக
இருப்பதாலும், பயணியர் போக்குவரத்து அதிகம் உள்ளதாலும்,
நடைமேம்பாலத்தில், பயணியர் நெருக்கடியை தவிர்க்க, ஐந்தாவது
நடைமேடை அமைக்கப்படுகிறது.

இந்த நடைமேடைக்கு, நடைமேம்பாலம் ஏறி செல்ல வேண்டியதில்லை.
இந்நிலையால், இந்த நடைமேடை கட்டப்படுவது, மாற்று திறனாளிகள்,
முதியோர், உடல் ஊனமுற்றோர், குழந்தைகளுடன் வரும் தாய்மார்களுக்கு
சிரமமின்றி ரயிலில் ஏறி பயணம் செய்ய உதவியாக இருக்கும்.

இத்துடன், தற்போது உள்ள நடைமேம்பாலம் புதுப்பித்து அமைக்கவும்,
நடை மேம்பாலங்களில் இருபுறத்திலும், 'லிப்ட், எஸ்கலேட்டர்' வசதியும்
செய்யப்பட உள்ளது. இவ்வாறு அதிகாரி கூறினார்.

- நமது நிருபர்-
தினமலர்