ஐ.நா. பாதுகாப்பு கவுன்சிலில் இந்தியா உறுப்பினராக ஆசிய-பசிபிக் நாடுகள் ஒப்புதல்: பாகிஸ்தான் ஆதரவு

ஐ.நா. பாதுகாப்பு கவுன்சிலில் இந்தியா உறுப்பினராவதற்கு
பாகிஸ்தான், சீனா உள்ளிட்ட ஆசிய-பசிபிக் நாடுகள் ஆதரவு
அளித்துள்ளன.

ஐக்கிய நாடுகள் சபையில் 193 நாடுகள் உறுப்பினர்களாக
இடம்பெற்றுள்ளன. இந்த சபையின் முக்கிய அங்கமான
பாதுகாப்பு கவுன்சிலில் அமெரிக்கா, ரஷியா, பிரிட்டன், சீனா,
பிரான்ஸ் ஆகிய 5 நாடுகள் நிரந்தர உறுப்பினர்களாக உள்ளன.
தற்காலிக உறுப்பினர்களாக 10 நாடுகள் உள்ளன.

இந்த கவுன்சிலுக்கு 2 ஆண்டுகள் பதவிக்காலம் என்ற
அடிப்படையில், ஆண்டுதோறும் 5 தற்காலிக உறுப்பினர்களை
ஐ.நா. சபை தேர்வு செய்து அனுப்பி வருகிறது.

2021-22 ஆண்டுகளுக்கான உறுப்பினர் தேர்தல் அடுத்த ஆண்டு
ஜூன் மாதத்தில் நடைபெறவுள்ளது. அந்த தேர்தலில், இந்தியா
வேட்பாளராக போட்டியிடவுள்ளது.

இந்நிலையில், ஐ.நா. பாதுகாப்பு கவுன்சிலில் இந்தியா
உறுப்பினராவதற்கு ஆசிய-பசிபிக் குழுமத்தைச் சேர்ந்த
55 நாடுகள் ஆதரவு தெரிவித்துள்ளன.

இதுகுறித்து, ஐ.நா. சபையின் இந்தியாவின் நிரந்தர பிரதிநிதி
சையது அக்பருதீன் தனது சுட்டுரைப் பக்கத்தில் செவ்வாய்க்
கிழமை வெளியிட்ட பதிவில் கூறியிருப்பதாவது:

ஐ.நா. பாதுகாப்பு கவுன்சிலில் தற்காலிக உறுப்பினராக இந்தியா
இடம்பெறுவதற்கு ஆசிய-பிசிபிக் குழுமத்தில் மொத்தமுள்ள
55 நாடுகளும் ஆதரவு தெரிவித்துள்ளன.

இந்த நாடுகளுக்கு இந்தியா சார்பில் நன்றியைத் தெரிவித்துக்
கொள்கிறேன் என்று சையது அக்பருதீன் தெரிவித்துள்ளார்.

ஆசிய-பசிபிக் குழுமத்தில் இடம்பெற்றுள்ள 55 நாடுகளில்
ஆப்கானிஸ்தான், வங்கதேசம், பூடான், சீனா, இந்தோனேஷியா,
ஈரான், ஜப்பான், குவைத், கிர்கிஸ்தான், மலேசியா, மாலத்தீவு,
மியான்மர், நேபாளம், பாகிஸ்தான், கத்தார், சவூதி அரேபியா,
இலங்கை, சிரியா, துருக்கி, ஐக்கிய அரபு அமீரகம், வியத்நாம்
ஆகியவை குறிப்பிடத்தக்கவையாகும்.

இதற்கு முன்பு 1950-51, 1967-68, 1972-73, 1977-78, 1984-85, 1991-92,
2011-12 ஆகிய ஆண்டுகளில் ஐ.நா. பாதுகாப்பு கவுன்சிலில்
இந்தியா உறுப்பினராக இடம் பெற்றிருந்தது.

இந்த கவுன்சிலில் நிரந்தர உறுப்பினராக இடம்பெறுவதற்கு
இந்தியா பல ஆண்டுகளாக முயற்சி வருகிறது. மேலும்,
ஐ.நா. பாதுகாப்பு கவுன்சிலில் சீர்திருத்தம் கொண்டுவரப்பட
வேண்டும் என்றும் இந்தியா வலியுறுத்திவருகிறது.
-
-----------------------------
தினமணி