மூத்த குடிமக்கள் ரெயில் டிக்கெட் மானியத்தை விட்டு கொடுக்கும் திட்டம்: ஆகஸ்ட் 31-க்குள் அமல்படுத்த முடிவு

by **ayyasamy ram** Mon Jun 24, 2019 9:17 pm

சென்னை:

சமையல் கியாஸ் மானியத்தை விட்டு கொடுக்கும் திட்டத்தை
மத்திய அரசு செயல்படுத்தியது போல இப்போது ரெயில்வே
துறையிலும் பயணிகள் டிக்கெட் மானியத்தை விட்டு கொடுக்கும்
திட்டத்தை அமல்படுத்த முடிவு செய்துள்ளது.

ரெயில் நிலையத்தில் வைபை வசதி ஏற்படுத்துதல், தனியாக
ரெயில் இயக்குதல் உள்பட 20-க்கும் மேற்பட்ட திட்டங்களை
100 நாட்களில் செயல்படுத்த மத்திய அரசு திட்டமிட்டுள்ளது.

இந்த 100நாள் திட்டத்தின் ஒரு பகுதியாக ரெயில் பயண சீட்டுகள்
மீதான சலுகையை விட்டுக் கொடுக்கும் திட்டத்தை அறிமுகப்
படுத்த ரெயில்வே அமைச்சகம் முடிவு செய்துள்ளது. இந்த திட்டத்தை
ஆகஸ்ட் 31-ந்தேதிக்கு முன்னதாக அறிமுகப்படுத்த தெற்கு
ரெயில்வே முடிவு செய்துள்ளது.

இதுதொடர்பாக சென்னை, மதுரை, திருச்சி, சேலம், திருவனந்தபுரம்,
பாலக்காடு ஆகிய 6 கோட்ட அதிகாரிகளுக்கு தலைமை வணிக
மேலாளர் கே.சங்கர சுப்பிரமணியன் ஒரு உத்தரவு பிறப்பித்துள்ளார்.
அதில் கூறி இருப்பதாவது:-

அலுவலக பதிவேட்டின்படி பயணிகள் போக்குவரத்தில் ஏற்படும்
வழக்கமான செலவில் 53 சதவீதம் திரும்ப கிடைக்கிறது. மானியம்
இல்லாத பயணச் சீட்டின் கட்டணம் 47 சதவீதம் அதிகமாக இருக்கும்
என்று குறிப்பிடப்பட்டுள்ளது.

இதுகுறித்து ரெயில்வே அதிகாரி ஒருவர் கூறியதாவது:-

சென்னை-மதுரை இடையே தூங்கும் வசதி, அடிப்படை கட்டணம்
ரூ.265 இதன் முழு கட்டணம் சுமார் ரூ.380-ரூ.390 இருக்கலாம்.

சென்னை-காட்பாடி இடையே அதிவிரைவு ரெயில்களில் முன்பதிவு
இல்லாத கட்டணம் ஒரு பயணச்சீட்டுக்கு சுமார் ரூ.35 அதிகரிக்கும்.

எல்லா ரெயில் நிலையங்களிலும் மானியம் இல்லாத கட்டணப்
பட்டியல் வைக்கப்படும். மானியத்தை விட்டு கொடுக்கும் திட்டம்
தொடர்பாக ரெயில்களின் உள்புறமும், ரெயில் நிலையங்கள்,
சமூக ஊடகங்கள் மூலமாக மிகப்பெரிய அளவில் விழிப்புணர்வு
பிரசாரம் செய்யப்படும்.

ரெயில் டிக்கெட் மானியத்தை திரும்ப கொடுக்கும் பிரசாரத்தை
தொடங்க ரெயில்வே வாரியம் முடிவு செய்துள்ளது.

ரெயில்வே நிர்வாகம் ஆண்டு பயணச்சீட்டு வருவாயை
5 முதல் 10 சதவீதம் வரை உயர்த்த இலக்கு வைத்துள்ளது.
மானியம் இல்லாத டிக்கெட் பதிவு விருப்பத்தை செயல்
படுத்துவதற்கு ஐ.ஆர்.சி.டி.சி. இணைய தளத்தை
மேம்படுத்துவதில் ரெயில்வே நிர்வாகம் ஈடுபட்டுள்ளது.

இவ்வாறு அவர் கூறினார்.

மூத்த குடிமக்களுக்காக மானியத்தை விட்டு கொடுக்கும் திட்டம்
2016-ம் ஆண்டு அறிமுகம் செய்யப்பட்டது. ரெயில்வே
டிக்கெட்டுக்காக மானியத்தை விட்டு கொடுக்கும் திட்டத்தை
அமல்படுத்த ஆகஸ்ட் 31-ந் தேதிக்குள் அறிவிக்க கெடு
வைக்கப்பட்டுள்ளது.

அதே நேரத்தில் மானியம் அல்லாத கட்டணம் வழக்கமான
கட்டணத்தை விட 47 சதவீதம் அதிகமாக இருக்கும் என்று
எதிர்பார்க்கப்படுகிறது.
-
----------------------------------
மாலைமலர்