மலேசியா: விரைவுப் பேருந்து விபத்தில் 10 பேர் பலி

இன்று அதிகாலை ஈப்போ செலாத்தான் சாலைக்கட்டணச் சாவடிக்கு 8 கிலோமீட்டர் தொலைவில் வடக்கு-தெற்கு நெடுஞ்சாலையில் வடக்கு நோக்கிச் சென்றுகொண்டிருந்த இரண்டடுக்கு விரைவுப் பேருந்து ஒன்று சாலைத்தடுப்பில் மோதிக்கொண்டதில் பயணிகளில் 10 பேர் பலியானார்கள், இருவர் காயமுற்றனர்.

அந்த 12 பேரும் பேருந்தின் கீழ் அடிக்கில் அமர்ந்திருந்தனர் என்று மாநிலப் போக்குவரத்து போலீஸ் தலைவர் சுப்பிரண்டெண்ட் வான் அப்துல்லா இஷாக் கூறினார்.

பேருந்திலிருந்த மற்ற 36 பயணிகளும் இரண்டு ஓட்டுநர்களும் காயமின்றித் தப்பினர்.

காயமடைந்தவர்கள் ஈப்போ, ராஜா பெர்மைஸ்வரி பைனுன் மருத்துவமனைக்குக் கொண்டு செல்லப்பட்டனர். இறந்தவர்களின் சடலங்களும் அங்குதான் கொண்டு செல்லப்பட்டன.

நேற்றிரவு மணி 9-க்கு, 48 பயணிகளுடன் கிள்ளானிலிருந்து புறப்பட்ட அப்பேருந்து கங்காரை நோக்கிச் சென்றுகொண்டிருந்ததாக அப்துல்லா தெரிவித்தார்.

“சாலையில் ஓடிக்கொண்டிருந்த பேருந்து திடிரென்று கட்டுப்பாடிழந்து இடப்புறமாக சறுக்கிக்கொண்டு சென்று பின்னர் வலப்புறம் திரும்பி சாலைத்தடுப்பில் மோதிக்கொண்டு நின்றது”, என்று அவர் சொன்னார்.

சாலைத்தடுப்பு பேருந்தைத் துளைத்துக்கொண்டு சென்றது. அதுதான் உயிரிழப்புக்கும் இருவர் காயமடைந்ததற்கும் காரணமாகும் என்றாரவர்.

பேருந்தை ஓட்டிச் சென்ற ஓட்டுநரைப் போலீஸார் தடுத்து வைத்துள்ளனர்.

விபத்து நிகழ்வதற்குமுன், பேருந்து ஓட்டுநர் தூக்கக் கலக்கத்தில் இருந்ததுபோல் தோன்றியதாக பயணிகளில் ஒருவரான மரிஸியானா மஹ்மூட் கூறினார்.

மலேசியாவில் மாநிலங்களுக்கிடையில் ஓடும் பேருந்துகளில் விபத்துகள் நிகழ்வது சாதாரணமாகி விட்டது. சில பஸ் ஓட்டுநர்கள், தூங்காமலிருக்க மாத்திரைகள் உட்கொள்வதாகக் கூறப்படுகிறது.