கை படாத லிங்கம்

-
சுவாமிக்கு எப்படி மாலை போடுவர்…’ என்று கேட்டால், ‘கையால் தான்…’ என்று, குழந்தை கூட சொல்லும். ஆனால், லிங்கத்தை தொடாமல், குச்சியால் ஆடை மற்றும் மாலை மாற்றும் அதிசயம், காஞ்சிபுரம் மாவட்டம், எலுமியங்கோட்டூரில், தெய்வநாயகேஸ்வரர் கோவிலில் நடக்கிறது.


தாரகாட்சன், கமலாட்சன், வித்யுன்மாலி என்ற அசுரர்கள், பறக்கும் கோட்டைகளில் சென்று, தேவர்கள் வசிக்கும் இடங்களில் இறங்கி விடுவர். கோட்டையின் அடியில் சிக்கும் தேவர்கள், அளவில்லாத கஷ்டமடைந்தனர். இவர்களை சம்ஹாரம் செய்ய, தேவர்களுடன் புறப்பட்டார், சிவன். ஆனால், அவர்கள், விநாயகரை வழிபட மறந்து விட்டனர்.


எந்த செயலை துவங்குவதாக இருந்தாலும், விநாயகரை வழிபட்டு, துவங்குவது மரபு. அவ்வாறு செய்யாததால், தன் தந்தை புறப்பட்ட தேரின் அச்சை முறித்தார், விநாயகர். தேர் நிலை குலைந்தது. அப்போது, சிவன் தடுமாறவே, கழுத்தில் இருந்த கொன்றை மாலை, இத்தலத்தில் விழுந்தது.
-
மாலை விழுந்த இடத்தில் சுவாமி, லிங்கமாக எழுந்தருளினார். இங்கு, பிற்காலத்தில் கோவில் எழுப்பப்பட்டது. தேவர்களின் படைக்கு தலைமையேற்று சென்றதால், தெய்வநாயகேஸ்வரர் என, பெயர் ஏற்பட்டது. இந்த லிங்கம், சுவாமியின் மாலை அம்சம் என்பதால், புனிதமாக கருதி, அர்ச்சகர்கள் தொடுவதில்லை.

குச்சியால் தான் ஆடை, மாலைகள் அணிவிக்கப்படும்.
ரம்பா, ஊர்வசி, மேனகா மூவரும், எந்நாளும் அழியாத அழகு பெற, தேவ குருவான பிரகஸ்பதியிடம் ஆலோசனை கேட்டனர். அவர், தெய்வநாயகேஸ்வரரை வழிபடும்படி கூறினார்.


அதன்படி, இங்கு வந்த ரம்பா, சிவனுக்காக, தீர்த்தம் ஒன்றை உருவாக்கினாள். அதில் மூவரும் நீராடி, 16 பட்டை உடைய, ரம்பாபுரிநாதர் என்ற லிங்கத்தையும், இங்கு பிரதிஷ்டை செய்தனர்; இதன் பயனாக, நிரந்தர அழகு பெற்றனர்.


ரம்பையர்களுக்கு அருள் செய்ததால், சிவனுக்கு, ரம்பேஸ்வரர் என்றும், தலத்திற்கு, ரம்பையங்கோட்டூர் என்றும் பெயர் உண்டானது. இது மருவி, எலுமியங்கோட்டூர் ஆனது. அம்பாள் பெயர், கனக குஜாம்பிகை. இங்குள்ள யோக தட்சிணாமூர்த்தி, வலக்கையை மார்பில் வைத்து, வலது பாதத்தை மடக்கி வைத்துள்ளார்; இது, ஒரு அபூர்வ வடிவம்.


ஞான சம்பந்தர் இப்பகுதிக்கு வந்த போது, முதியவர் வடிவில் வந்த சிவன், ‘இப்பகுதியில் சிவன் கோவில் உள்ளது; அவர் குறித்து பதிகம் பாடுக…’ என்று சொல்லி மறைந்தார். சம்பந்தருக்கு கோவில் தென்படவில்லை.

அதன் பின், பசுவாக மாறி, வழி மறித்த சிவன், தான் இருக்கும் இடத்தை சுட்டிக் காட்ட, சம்பந்தர் பதிகம் பாடினார்.
இதனால், இங்கு தினமும், கோ பூஜை நடக்கும். ஏப்., 2, 7 மற்றும் செப்., 5 முதல் 11ம் தேதி வரையிலும், மூலவர் மீது சூரிய ஒளி படரும்.
சென்னை – அரக்கோணம் சாலையில், 54 கி.மீ., துாரத்தில், கூவம் கிராமம் இருக்கிறது.

இந்த கிராமத்தில் இருந்து, 6 கி.மீ., துாரத்தில், எலுமியங்கோட்டூர் உள்ளது. காஞ்சிபுரத்தில் இருந்து, 25 கி.மீ., துாரத்தில், இக்கோவில் உள்ளது.

தி.செல்லப்பா
வாரமலர்