கடற்கரை கிராமங்களில் இன்று அஞ்சலி

கடற்கரை கிராமங்களில் இன்று அஞ்சலி

நாகர்கோவில் : இந்தியா உபட தெற்காசிய நாடுகளில்
கடந்த 2004ம் ஆண்டு டிசம்பர் 26ம் தேதி ஏற்பட்ட சுனாமிப் பேரலையால்
ஆயிரக்கணக்கானோர் இறந்தனர்.
சுனாமி தாக்குதலின் 5ம் ஆண்டு நினைவு தினம் இன்று அனுஷ்டிக்கப்படுகிறது.
ஆழிப்பேரலையின் கோர தாண்டவத்துக்கு குமரி மாவட்டத்தில் குழந்தைகள் உள்பட
800க்கும் அதிகமானோர் உயிர் இழந்தனர்.

30க்கும் மேற்பட்ட
கிராமங்கள் கடுமையாக பாதிக்கப்பட்டன. ஆண்டுகள் பல கடந்தாலும் இந்நிகழ்வு
பலரது மனதில் ஆறாத வடுவாக உள்ளது. தமிழகத்தில் சுனாமி தாக்குதலில்
இறந்தவர்களின் நினைவிடங்கள் மற்றும் புதைக்கப்பட்டுள்ள இடங்களில் இன்று
மலர்கள் தூவியும், மெழுகுவர்த்தி ஏந்தியும் அஞ்சலி செலுத்தும் பல்வேறு
நிகழ்ச்சிகளுக்கு ஏற்பாடு செய்யப்பட்டுள்ளன.

குமரி மாவட்ட கடலோர
கிராமங்களில் நினைவு ஊர்வலங்கள் நடத்தப்படுகின்றன. குமரி கடற்கரையில் உள்ள
சுனாமி நினைவு பூங்காவில் உள்ள நினைவு தூணில் கலெக்டர் ராஜேந்திர ரத்னூ
அஞ்சலி செலுத்துகிறார்.

நாகை மாவட்டம்: சுனாமியால் நாகை மாவட்டத்தில் 6,065 பேர் இறந்தனர். நினைவு
தினத்தையொட்டி மாவட்ட நிர்வாகம் மற்றும் கட்சிகள் சார்பில் அஞ்சலி
நிகழ்ச்சிகளுக்கு ஏற்பாடு செய்யப்பட்டுள்ளது. திமுக சார்பில் இன்று காலை
பழைய பஸ் நிலையத்தில் உள்ள மறைமலை அடிகளார் சிலையில் இருந்து துறைமுகம் வரை
அமைதி ஊர்வலம் நடக்கிறது. ஊர்வலத்தில் கனிமொழி எம்.பி. கலந்து கொள்கிறார்.
மாவட்டத்தில் உள்ள 54 மீனவ கிராமங்களிலும் அஞ்சலி நிகழ்ச்சிகள்
நடக்கின்றன.