கஞ்சிக்குழிக்கு, 'சபாஷ்'

-
கே.சூர்யா, பொள்ளாச்சி, கோவை மாவட்டத்திலிருந்து எழுதுகிறார்:'
---
கடவுளின் தேசம்' என்றழைக்கப்படும், கேரள மாநிலத்தில்
உள்ள, 'கஞ்சிக்குழி' என்ற கிராமம் குறித்த, 'வீடியோ'வை பார்த்து
வியந்தேன்.

கஞ்சிக்குழி கிராம பஞ்சாயத்தில்,1995ல், ஒவ்வொரு குடும்பத்தினரும்,
தங்களுக்கு தேவையான காய்கறிகளை, வீட்டில் தோட்டம் அமைத்து,
உற்பத்தி செய்து கொள்ள வேண்டுமென அறிவித்தது.

இதற்கான உதவி, ஆலோசனைகளை, கிராம பஞ்சாயத்து நிர்வாகமே
வழங்கியுள்ளது.

துவக்கத்தில், 60 வீடுகளில் மட்டுமே, இந்த காய்கறித் தோட்டங்கள்
அமைக்கப்பட்டன. 24 ஆண்டுகள் கழித்து, இன்று, 8,600 குடும்பங்கள்,
தங்கள் இல்லங்களில் தோட்டம் அமைத்து, காய்கறிகளை உற்பத்தி
செய்து வருகின்றன.

கடந்த ஆண்டில் மட்டும், கஞ்சிக்குழி கிராம பஞ்சாயத்தில்,
பொதுமக்களால் உற்பத்தி செய்யப்பட்ட காய்கறி, பழங்களின் அளவு,
40 ஆயிரம் டன்; ஆச்சரியமாகவும், மகிழ்ச்சியாகவும் இருக்கிறது.

கிராம பஞ்சாயத்து எப்படி இருக்க வேண்டும் என்பதற்கு, 'கஞ்சிக்குழி'
நல்லதொரு எடுத்துக்காட்டு. தோட்டங்கள் அமைப்பதற்கு, விதை, செடி,
உரம் அனைத்தும், பஞ்சாயத்து நிர்வாகம் மூலம், மானிய விலையில்
வழங்கப்படுகிறது.

இன்று, அந்த கிராம பஞ்சாயத்து, தம் தேவைக்கும் அதிகமாக காய்கறி,
பழங்களை உற்பத்தி செய்வதால், நெடுஞ்சாலைகளில் விற்க, உரிய
விற்பனை அங்காடிகளை அமைத்துள்ளது.

ஒவ்வொரு குடும்பமும், இதன் மூலம் கணிசமான வருவாயை ஈட்டி
வருகிறது. சிறப்பான ஒரு திட்டத்தை உருவாக்கி, அதை, களத்தில்
வெற்றிகரமாக அமல்படுத்திய, 'கஞ்சிக்குழி' கிராம பஞ்சாயத்துக்கு,
ஆயிரம், 'சபாஷ்' போடலாம்!

தமிழகத்தில், என்றைக்கு, இம்மாதிரியான உள்ளாட்சி நிர்வாகம் வரப்
போகிறது என, தெரியவில்லை!
-
------------------------------------------
இது உங்கள் இடம் - வாரமலர்