ஊட்டியில் 17ம் தேதி மலர் கண்காட்சி: கவர்னர் பன்வாரிலால் துவக்கி வைக்கிறார்

**ayyasamy ram** · **ayyasamy ram** Tue May 14, 2019 10:19 pm

-
ஊட்டி: ஊட்டியில் வரும் 17ம்தேதி, மலர் கண்காட்சி துவங்குகிறது. இதை, தமிழக கவர்னர் பன்வாரிலால் புரோகித் துவக்கி வைக்கிறார். இதற்கான ஏற்பாடுகள் தீவிரமாக நடந்து வருகிறது.

நீலகிரி மாவட்டம், ஊட்டியில் ஆண்டுதோறும் மே மாதம் மலர் கண்காட்சி நடத்தப்படுவது வழக்கம். இந்த ஆண்டுக்கான மலர் கண்காட்சி வரும் 17ம் தேதி (வெள்ளி) துவங்கி, 21ம் தேதி (செவ்வாய்) வரை 5 நாட்கள் நடக்கிறது.

மலர் கண்காட்சியை தமிழக கவர்னர் பன்வாரிலால் புரோகித் துவக்கி வைக்கிறார். இதற்காக அவர், வரும் 16ம் தேதி ெசன்னையில் இருந்து கோவைக்கு விமானம் மூலம் வருகிறார். அங்கிருந்து சாலை மார்க்கமாக ஊட்டி வந்து, தாவரவியல் பூங்கா வளாகத்தில் உள்ள ராஜ்பவன் மாளிகையில் தங்குகிறார்.

விழாவில் கவர்னர் கலந்துக்கொள்ளும் நிலையில், விழா ஏற்பாடுகள் மற்றும் பாதுகாப்பு பணிகள் மேற்கொள்வது குறித்து அனைத்து துறை அலுவலர்களுடன் நேற்று ஊட்டியில் உள்ள கலெக்டர் அலுவலகத்தில் ஆலோசனை கூட்டம் நடந்தது.

மாவட்ட கலெக்டர் இன்னசென்ட் திவ்யா தலைமை வகித்தார். கூட்டத்தில் விழா ஏற்பாடுகள், பாதுகாப்பு ஏற்பாடுகள் குறித்து விவாதிக்கப்பட்டது.

உள்ளூர் விடுமுறை: மலர் கண்காட்சியை முன்னிட்டு வரும் 17ம் தேதி நீலகிரி மாவட்டத்தில் உள்ள அரசு அலுவலகங்கள் மற்றும் பள்ளிகளுக்கு மாவட்ட நிர்வாகம் உள்ளூர் விடுமுறை அறிவித்துள்ளது.

இதுகுறித்து கலெக்டர் இன்னசென்ட் திவ்யா வெளியிட்டுள்ள அறிக்கையில், ‘‘ஊட்டியில் மலர் கண்காட்சியை முன்னிட்டு நீலகிரி மாவட்டத்திற்கு வரும் 17 தேதி ஒரு நாள் சிறப்பு உள்ளூர் விடுமுறை அளிக்கப்படுகிறது.

மாவட்டத்தில் உள்ள அனைத்து மாநில அரசு அலுவலகங்கள், கல்வி நிறுவனங்களுக்கு உள்ளூர் விடுமுறை அறிவிக்கப்படுகிறது. இந்த நாளில் மாவட்ட கருவூலம் மற்றும் சார்நிலை கருவூலங்களில் அரசு பாதுகாப்பான அவசர அலுவல்களை கவனிக்கும் பொருட்டு குறிப்பிட்ட பணியாளர்களுடன் செயல்படும்.

இதற்கு பதிலாக வரும் ஜூன் மாதம் 1ம் தேதி சனிக்கிழமை அன்று மாவட்டத்தில் பணி நாளாக அறிவிக்கப்படுகிறது’’ என தெரிவித்துள்ளார்.

1000 போலீசார் பாதுகாப்பு: சுற்றுலா பயணிகள் அதிகம் கூடும் பகுதிகளான தாவரவியல் பூங்கா, ரோஜா பூங்கா, படகு இல்லம் மற்றும் தொட்டபெட்டா போன்ற பகுதிகளில் குற்றங்களை கட்டுப்படுத்த 1000 போலீசார் பாதுகாப்பு பணியில் ஈடுபடுத்தப்பட உள்ளனர்.

கூட்டத்தை கண்காணிக்க முதன்முறையாக ஹெலிகேம் (கேமராக்கள்) பயன்படுத்த முடிவு செய்யப்பட்டுள்ளது.
----
தினகரன்

ஊட்டியில் 17ம் தேதி மலர் கண்காட்சி: கவர்னர் பன்வாரிலால் துவக்கி வைக்கிறார்

ஊட்டியில் 17ம் தேதி மலர் கண்காட்சி: கவர்னர் பன்வாரிலால் துவக்கி வைக்கிறார்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக