எஞ்சியுள்ள அனைத்து சீனப் பொருள்களுக்கும் கூடுதல் வரி: டிரம்ப் உத்தரவு

இதுவரை சாதாரண வரி விதிக்கப்பட்டு வந்த அனைத்து சீனப்
பொருள்களுக்கு கூடுதல் வரி விதிக்க அமெரிக்க அதிபர்
டொனால்ட் டிரம்ப் உத்தரவிட்டுள்ளார்.

இதன்மூலம், சீனாவிலிருந்து இறக்குமதியாகும் ஏறத்தாழ அனைத்துப் பொருள்களுக்கும் வரிச் சுமை அதிகரிக்கப்பட்டுள்ளது.

ஏற்கெனவே, 20,000 கோடி டாலர் (சுமார் ரூ.13.98 லட்சம் கோடி) மதிப்பிலான சீனப் பொருள்கள் மீது இறக்குமதி வரியை அமெரிக்கா வெள்ளிக்கிழமை முதல் உயர்த்தியுள்ள நிலையில், டிரம்ப்பின் இந்த புதிய அறிவிப்பு இரு நாடுகளுக்கும் இடையிலான வர்த்தகப் போர் பதற்றத்தை மேலும் அதிகரிக்கும் என்று அஞ்சப்படுகிறது.

இதுகுறித்து அமெரிக்க வர்த்தகத் துறை மேம்பாட்டு அதிகாரி ராபர்ட் லைத்திஸர் வெளியிட்டுள்ள அறிக்கையில் தெரிவிக்கப்பட்டுள்ளதாவது:

இதுவரை கூடுதல் வரி விதிக்கப்படாத, முக்கியமான அனைத்து சீன இறக்குமதிப் பொருள்களுக்கும், கூடுதல் வரி விதிக்கப்பட வேண்டும் என்று அதிபர் டொனால்ட் டிரம்ப் உத்தரவு பிறப்பித்துள்ளார்.

முன்னதாக, ஏற்கெனவே அதிபர் பிறப்பித்த மற்றொரு உத்தரவின் அடிப்படையில் 20,000 கோடி டாலர் மதிப்பிலான சீனப் பொருள்களுக்கு இறக்குமதி வரி 10 சதவீதத்திலிருந்து 25 சதவீதமாக உயர்த்தப்பட்டுள்ளது.

தற்போது அதிபர் வெளியிட்டுள்ள புதிய உத்தரவின்கீழ், தோராயமாக 30,000 கோடி டாலர் மதிப்பிலான சீனப் பொருள்களுக்கு கூடுதல் வரி விதிக்கப்படும் என்றார் அவர்.

இதற்கிடையே, வர்த்தகப் போர் பதற்றத்தைத் தணிப்பதற்காக அமெரிக்கா மற்றும் சீனப் பிரதிநிதிகளிடையே வாஷிங்டனில் வெள்ளிக்கிழமை நடைபெற்ற பேச்சுவார்த்தை எந்த உடன்பாடும் எட்டப்படாமல் முடிவடைந்தது.

சீனாவின் நியாயமற்ற ஏற்றுமதிக் கொள்கைகளால் அமெரிக்க நலன்கள் பாதிக்கப்படுவதாகக் கூறி வரும் அமெரிக்க அதிபர் டொனால்ட் டிரம்ப், அந்த நாட்டிலிருந்து இறக்குமதியாகும் பொருள்களுக்கு கூடுதல் வரி விதிப்பதாக கடந்த ஆண்டு ஜனவரி மாதம் அறிவித்தார்.

சீனாவும், அதற்குப் பதிலடியாக அமெரிக்க பொருள்களுக்கு
கூடுதல் இறக்குமதி வரி விதித்தது.

இதன் காரணமாக இரு நாடுகளுக்கும் இடையே வர்த்தகப் போர்
பதற்றம் அதிகரித்து வந்தது. எனினும், அந்தப் பதற்றத்தைத்
தணிப்பதற்காக இரு தரப்பினரும் பல கட்டங்களாக பேச்சுவார்த்தையில்
ஈடுபட்டு வருகின்றர்.

இந்த நிலையில், வர்த்தகப் பேச்சுவார்த்தையில் முன்னேற்றம் ஏற்படாததால், 20,000 கோடி டாலர் மதிப்பிலான சீன இறக்குமதிப் பொருள்கள் மீதான இறக்குமதி வரியை 10 சதவீதத்திலிருந்து 25 சதவீதமாக உயர்த்தப் போவதாக கடந்த திங்கள்கிழமை டிரம்ப் அறிவித்தார்.

அவ்வாறு கூடுதல் வரி விதித்தால் அதற்கு தகுந்த பதிலடி கொடுக்கப்படும் என்று சீன வர்த்தகத் துறை அமைச்சகம் கடந்த வியாழக்கிழமை எச்சரித்திருந்தும், டிரம்ப்பின் அந்த அறிவிப்பு கடந்த வெள்ளிக்கிழமை அமலுக்கு வந்தது.

இந்தச் சூழலில், இதுவரை கூடுதல் வரிவிதிப்பிலிருந்து தப்பிய அனைத்து சீனப் பொருள்களுக்கும் வரிச் சுமையை அதிகரிக்கும் அமெரிக்காவின் அறிவிப்பால், உலகின் மிகப் பெரிய பொருளாதார சக்திகளான இரு நாடுகளுக்கும் இடையே வர்த்தகப் போர் பதற்றம் மேலும் அதிகரிக்கும் என்று அஞ்சப்படுகிறது.
-
தினமணி